Volha Komar iznoŭ na arenie. Asudziła pravaabaronca za «niecenzurnuju łajanku»

Sud Frunzienskaha rajona Minska pryznaŭ viciebskaha pravaabaroncu Paŭła Levinava vinavatym pa art. 17.1 KoaAP (drobnaje chulihanstva) i pakaraŭ jaho administracyjnym aryštam terminam na 10 sutak. Rašeńnie vyniesła sudździa Volha Komar

(17 lutaha jana pryhavaryła da čatyroch hadoŭ pazbaŭleńnia voli Vasila Parfiankova — abvinavačvanaha pa spravie ab masavych biesparadkach. Jeŭrasajuz unios jaje ŭ śpis nieŭjaznych. — BiełaPAN.).

Jak paviedamiła staršynia viciebskaj arhanizacyi Abjadnanaj hramadzianskaj partyi Volha Karač, śviedkami niecenzurnaj łajanki Levinava na sudzie vystupali dva milicyjaniery, jakija jaho i zatrymlivali. Hetyja ž milicyjaniery vystupali śviedkami na sudzie suprać Karač i Paŭła Stanieŭskaha. 19 krasavika pry zatrymańni milicyjaniery skazali Levinavu, što jon padazrajecca ŭ dačynieńni da terakta ŭ minskim mietro. «Siońnia na sudzie hetaje pytańnie navat nie ŭzdymałasia», — adznačyła Karač.

Siońnia ž sud Frunzienskaha rajona adpraviŭ na dapracoŭku administracyjnuju spravu ŭ dačynieńni da aktyvista hramadzianskaj kampanii «Naš dom» Paŭła Stanieŭskaha. Jak paviedamiŭ BiełaPAN aktyvist, jaho abvinavacili ŭ niecenzurnaj łajancy (art. 17.1 KoAP). Na sudzie milicyjaniery-śviedki błytalisia ŭ pakazańniach. Adzin havaryŭ, što aktyvist łajaŭsia matam da zatrymańnia, druhi — što paśla. «Milicyjaniery chłusiać, tolki ja nie viedaju, ź jakoj metaj. Jany viedajuć, što ŭ vyniku ja mahu atrymać da 15 sutak aryštu, i ŭsio roŭna chłusiać», — zajaviŭ Stanieŭski.

***

Jak paviedamlałasia raniej, 19 krasavika ŭ kvateru dački pravaabaroncy Valeryja Ščukina ŭ Minsku, dzie jon razam ź siabrami i svajakami adznačaŭ svoj dzień naradžeńnia, pryjšli supracoŭniki milicyi. Pravieryŭšy dakumienty ŭ prysutnych, jany pajšli, ale zatym viarnulisia i ŭsich zatrymali. Va UUS Frunzienskaha rajona było dastaŭlena 18 čałaviek. Ich apytali, u niekatorych uziali adbitki palcaŭ, a taksama sfatahrafavali. U dačynieńni da Volhi Karač, Paŭła Levinava, žurnalista Aleha Barščeŭskaha i Paŭła Stanieŭskaha byli składzieny administracyjnyja pratakoły.

20 krasavika sud Frunzienskaha rajona Minska pryznaŭ Aleha Barščeŭskaha vinavatym u niecenzurnaj łajancy i pakaraŭ jaho aryštam terminam na 10 sutak. Volha Karač taksama abvinavačvałasia ŭ niecenzurnaj łajancy i była aštrafavana na 20 bazavych vieličyń (700 tys. rubloŭ).

«Naša zatrymańnie supracoŭnikami milicyi i siońniašni sud — heta štości nievierahodnaje, łahična heta rastłumačyć nalha», — ličyć Karač. Pavodle jaje słoŭ, milicyjaniery śviedčyli ŭ sudzie, što jana 19 krasavika vykazvałasia niecenzurna i akazvała fizičnaje supraciŭleńnie supracoŭnikam milicyi.

«Mianie sutki pratrymali bieź ježy ŭ chałodnym pamiaškańni, a zatym dastavili ŭ sud, skłaŭšy prosta śmiešny pratakoł — što nibyta ja zładziła bojku z supracoŭnikami milicyi i vosiem milicynieraŭ nie mahli sa mnoj spravicca. Kali vieryć pratakołam milicyi, to dom dački Ščukina ŭ adzin dzień pieratvaryŭsia ŭ niejki kryminalny asiarodak: ja bjusia ź milicyjaj, u hety čas maje kalehi łajucca matam i taksama bjucca», — skazała Karač.

• 0
• 0
• 0
• 0
• 0
• 0
• 0
• 0