Maci Źmitra Bułanava: Ja hanarusia, što syn u kletcy zastaŭsia čałaviekam

"My dva stryžni i pavinny trymacca, bo kali adzin złomicca, to i druhomu budzie ciažka", - tak kazała synu napiaredadni sudu Kłaŭdzija Bułanava. Paśla prysudu 3 hady turmy Źmitru Bułanavu maci najbolš kłapocić stan zdaroŭja syna.

Paśla prysudu 3 hady turmy Źmitru Bułanavu maci najbolš kłapocić stan zdaroŭja syna.

My dumali, što buduć niejkija źmieny, jakija dazvolać našym dzieciam atrymać inšyja prysudy. My čakali, što buduć niejkija novyja pavievy, jakija dazvolać nam abniać dziaciej. Na žal, hetaha nie adbyłosia. Toje, što ja bačyła na pasiadžeńni - niaŭciamnaja mova sudździ, jakaja čytała sabie pad nos: skazali, što sudździa straciła hołas. Maŭlaŭ, spačatku byli prablemy ź ciskam, ciapier z hołasam. Toje, što synu dali 3 hady i skazali, što niama nijakich supraćpakazańniaŭ - heta kaža ab tym, što jany chavajuć toje, što ź im zrabili, kali ŭziali jaho z domu, zastudzili i vyklikali paŭtornuju vostruju reŭmatoidnuju ataku. Dalej - ruletka: 50 na 50 moža być abvastreńnie chvaroby i pry jahonym dyjahnazie - endakardyt - śmiarotnaść składaje 21-50%. Heta ŭ dobrych klinikach.

Jak Źmicier uspryniaŭ prysud?

My paśpieli tolki pierahlanucca. Uspryniaŭ narmalna, jon čakaŭ hetaha, i ŭ liście mnie pisaŭ, što jaŭna daduć 3-3,5 hadoŭ. Bo nikoha nie chvalavała ni što kazaŭ advakat, ni što kazaŭ jon. Išli pa ahulnaj schiemie, da hetaha i pryjšli.

A što moža paŭpłyvać na ŭłady, kab vašaha syna vyzvalili?

Tut usio treba mianiać - tady budzie narmalna pracavać zakanadaŭstva i ŭsio astatniaje.

Ni vy, ni vaš syn nikoli nie mieli dačynieńnia da palityki. Jak mianiajecca vaša staŭleńnie ciapier?

Absalutna źmianiłasia! Ja ŭciahvajusia ŭ toje, da čaho nikoli nie mieła i navat nie chacieła mieć dačynieńnia, bo zaŭsiody ličyła, što palityčnyja rečy robiacca nie zaŭsiody sumlenna. A ciapier nas heta zakranuła, i ja mižvoli taksama ŭciahvajusia ŭ heta, i razumieju, što pavinna ŭciahnucca abaviazkova, kab vyciahnuć syna z hetaj situacyi.

Chto vas padtrymlivaje ŭ takoj situacyi?

Maje siabry, ź jakimi ja siabruju jašče sa škoły, i ŭ Dzimy jość dziaŭčyna, jakaja taksama padtrymlivaje i jaho, i mianie. Jość siastra, plamieńnica - maje svajaki, ja taksama paznajomiłasia z maci, u jakich syny ŭ takoj ža situacyi, i my ŭžo ź imi bližejšyja, čym sa svajakami. I kali ja pisała chadajnictva za svajho syna, jaho padpisali kala 70 čałaviek z našaha atačeńnia, jakija prasili, kab sud byŭ spraviadlivym. Na žal, nichto nie prysłuchaŭsia ni da ich, ni da mianie.

Kab była ciapier mahčymaść u Źmitra pačuć vas, što b vy jamu skazali?

Ja jamu napisała heta raniej. Ja skazała: "Syn, ja adčuvaju honar za ciabie, što ŭ kletcy, u jakuju ciabie pasadzili pad zamok, jak źviera, ty zastaŭsia čałaviekam".

• 0
• 0
• 0
• 0
• 0
• 0
• 0
• 0