Letuviskija deputaty raźbirajucca sa svajoj specsłužbaj
Prezydent Adamkus pad ciskam Sojmu musić achviaravać kiraŭnikom Departamentu dziaržbiaśpieki. A pačałosia ŭsio z trahičnaha vypadku ŭ Bieraści. Piša Alaksandar Kłaskoŭski.
U Letuvie razharelisia žarści vakoł Departamentu dziaržaŭnaj biaśpieki.
Sojm uziaŭsia za specsłužbu paśla trahičnaha vypadku ŭ Bieraści. Pamiatajecie, tam zahinuŭ letuviski dyplamat, jon ža aficer Departamentu dziaržbiaśpieki Paciunas?
Uchapiŭšysia za nitku, parlamenckaja kamisija razmatała vialiki kłubok.
U vyniku siońnia prezydent Adamkus “vykazaŭ razumieńnie, što kiraŭnik Departamentu dziaržbiaśpieki Arvidas Pocius nia moža nadalej zajmać svaju pasadu” .
Pry hetym Adamkus zrabiŭ zaŭvahu i deputatam: maŭlaŭ, zanadta šmat emocyjaŭ! Ale, vidavočna, u jaho nie było inšaha vyjścia, akramia jak sastupić nacisku zakanadaŭčaje ŭłady.
Paralel ź biełaruskaj sytuacyjaj možacie pravieści sami.
Vysnovy nastolki vidavočnyja, što i kamentavać nia chočacca.
Ułazić u perypetyi skandału vakoł letuviskaj specsłužby taksama nia jość metaj hetaha dopisu.
Chaču padkreślić inšaje.
Apošnija niekalki dzion ja mieŭ mahčymaść hladzieć letuviskija telekanały. I navat nia viedajučy movy, adčuvaŭ napał žarściaŭ. I ŭ ścienach Sojmu, i ŭ studyi atrymlivali mikrafon pradstaŭniki roznych partyjaŭ.
Ź inšaha boku, kraina nie skałanajecca, a prosta žyvie narmalnym palityčnym žyćciom. I nieba nia valicca na letuviskuju ziamlu ad taho, što biez anijakaj cenzury, u žyvym etery, vystupajuć apazycyjanery. Jany, darečy, i zvalili šefa specsłužby.
Za tyja dni, što aŭtar hetych radkoŭ prabyŭ u Vilni, daviałosia pabačyć na teleekranie ci nia ŭsiu halereju tamtejšych palitykaŭ: i Brazaŭskasa, i Łandsberhisa, i Kubilusa, i Paŭłaŭskasa – usich nie pieraličyć.
Nie pašenciła ŭbačyć tolki viedajecie kaho?
Prezydenta.
...A byŭ ža i ŭ Biełarusi šaniec zastacca parlamenckaj respublikaj!
Ciapier čytajuć
Čamu amierykancy tak irvucca na Miesiac, što tam buduć zdabyvać? I što da taho biełarusam? Tłumačyć biełaruski astrafizik1
Kamientary