Śpiecnazaŭcu, jaki ŭžyŭ śpiecsrodki padčas matča ŭ Babrujsku, prychodziać paviedamleńni z pahrozami

Praciah «hazavaha» incydentu ŭ Babrujsku. Baćka paciarpiełaha dziciaci choča, kab hiendyrektar «Dynama» pahladzieŭ u vočy jaho synu. Hałoŭny «hieroj» zdareńnia śpiecnazaviec Uładzimir Recikaŭ raskazvaje pra brud, jaki ljecca na jaho. Načalnik Recikava ličyć, što toj dziejničaŭ u adpaviednaści z zakonam i što minskija fanaty nie ŭmiejuć siabie pavodzić.

Baćka dziciaci: «Niachaj Stralcoŭ pahladzić u vočy majmu synu»

Historyja z hazavym incydentam u Babrujsku moža atrymać praciah. Baćka paciarpiełaha dziciaci dumaje, ci źviartacca ŭ prakuraturu. Juryj aburany tym, jak supracoŭniki milicyi sprabujuć zrabić jaho vinavatym u zdareńni. Taksama jon choča sustrecca z hiendyrektaram «Dynama» Valeryjem Stralcovym.

— Ciapier kažuć, byccam supracoŭniki mahiloŭskaha śpiecnaza nie bačyli dziciaci na siektary. Usio jany vydatna bačyli! Usio-tki my stajali ŭ pieršym šerahu. Pa słovach pres-aficera UUS Mahiloŭskaha abłvykankama, ja vinavaty i ŭ tym, što z synam znachodziŭsia na fan-siektary.

Juryj admaŭlaje infarmacyju, byccam niekatoryja zaŭziatary imknulisia vybiehčy na pole.

— Niachaj hladziać videa i adkazvajuć za svaje słovy! Tolki milicyi praściej skinuć vinu na inšych. Nie viedaju, ci budu źviartacca ŭ prakuraturu. Vydatna razumieju, što sprava projhryšnaja. Ź inšaha boku, kali pierastać pra heta kazać, milicyja adčuje poŭnuju biespakaranaść. Dzie harantyi, što, kali b u taho praparščyka byŭ u rukach pistalet ci aŭtamat, jon nie staŭ by stralać? Toje, što fanaty radujucca hału, — nie padstava vykarystoŭvać śpiecsrodki.

Pradstaŭnik UUS Mahiloŭskaha abłvykankama ledź nie abvinavaciŭ Juryja ŭ tym, što jon pryvioŭ dzicia ŭ fanacki siektar. Maŭlaŭ, heta nie miesca dla dziciaci. Tam matam łajucca…

— Niachaj spačatku milicyja navučycca svaje maciuki prytrymlivać, — paryruje zaŭziatar i vykazvaje hatoŭnaść raskazać pra toje, jak razmaŭlaje sama milicyja padčas matčaŭ.

Z hienieralnym dyrektaram «Dynama» Valeryjem Stralcovym Juryj choča pahutaryć:

Na nastupnym chatnim matčy abaviazkova padydu da jaho ź dziciem, i niachaj Valeryj Ivanavič pahladzić u vočy majmu synu. Chaciełasia b ubačyć jaho reakcyju. Darečy, Stralcoŭ addaŭ ukazańnie, kab paśla matča futbalisty bolš nie padychodzili da zaŭziataraŭ dziakavać za hulniu!

Raman Posachaŭ: «Pravierka skončycca praz 10 dzion»

Načalnik adździaleńnia infarmacyi i hramadskich suviaziaŭ UUS Mahiloŭskaha abłvykankama, da jakoha žurnalisty źviarnulisia, kab daviedacca telefon kamandzira taho samaha padraździaleńni milicyi śpiecyjalnaha pryznačeńnia, jaki dziažuryŭ na matčy, byŭ niehavarki.

— Doŭha vy jašče budziecie musolić hetuju temu? Moža, chopić? Prosta razdźmuli historyju. Voś rastłumačcie, kolki heta budzie praciahvacca?

— Da taho času, pakul nie atrymajem vyčarpalnuju infarmacyju.

— Na dadzieny momant pravodzicca pravierka. Tamu pakul nijakich kamientaroŭ nie budzie.

— Kali skončycca pravierka?

— Aryjentavana praz 10 dzion.

— Padčas pravierki supracoŭnik śpiecnaza, jaki ŭžyŭ śpiecsrodki, praciahnie vykonvać svaje abaviazki?

— Pa-vašamu, jaho treba adchilić ad słužby abo zvolnić? Jon chiba ŭčyniŭ złačynstva? Usio stanie viadoma paśla zakančeńnia pravierki. Tady i telefanujcie.

Praparščyk Recikaŭ: «Takoje adčuvańnie, što ja staŭ izhojem»

Praparščyk mahiloŭskaha śpiecnaza Uładzimir Recikaŭ užo staŭ vielmi viadomaj asobaj. Adnak jamu takaja papularnaść zusim nie daspadoby.

— Vy ž viedajecie, dzie ja pracuju? Kali łaska, voś i źviartajciesia pa kamientary da majho kiraŭnictva i ŭ pres-centr UUS. Prosta, jak mnie zdajecca, pa fakcie, jaki adbyŭsia, uźnikaje šmat niezrazumiełaściaŭ. Tamu ja kamientavać ničoha nie budu.

Skažu vam adno, a vy napišacie ŭsio pa-inšamu — ja ŭžo ŭ hetym pierakanaŭsia. Jak? Bačyŭ brud, jaki na mianie vylili ŭ «Adnakłaśnikach». U vyniku daviałosia zabłakavać staronku. Na moj numar prychodziać sms z pahrozami, što mianie treba paviesić, ukryžavać, spalić i ŭsio ŭ hetym rodzie. Takoje adčuvańnie, što ja staŭ izhojem. A ŭsio dziakujučy vam, žurnalistam. Dziakuj.

Kamandzir: «Recikaŭ — prafiesijny i dobry supracoŭnik»

Kab kančatkova rasstavić usie kropki nad «i», źviarnulisia pa tłumačeńni da kamandzira padraździaleńnia milicyi śpiecyjalnaha pryznačeńnia Mahiloŭskaha UUS. Siarhiej Vołkaŭ spačatku kazaŭ, što fanaty vybiehli na futbolnaje pole, potym admoviŭsia ad svaich słovaŭ. Zrazumieła tolki adno: kamandzir upeŭnieny, što jaho padnačalenyja dziejničali ŭ ramkach zakonu.

— Siarhiej Siamionavič, Vy prysutničali na hulni «Biełšyna» — «Dynama» (Minsk)?

— Mianie nie było.

— U intervju haziecie «Kamsamolskaja praŭda ŭ Biełarusi» Vy zajavili, što «niekatoryja zaŭziatary «Dynama"vybiehli na futbolnaje pole». Adkul takaja infarmacyja?

— Hladzieŭ videarolik na sajcie «Chartyja-97».

— Ja taksama hladzieŭ videa, ale nie zaŭvažyŭ fanataŭ na poli. Takoha ž mierkavańnia prytrymlivajecca i namieśnik načalnika ŭpraŭleńnia achovy pravaparadku i prafiłaktyki UUS Mahiloŭskaha abłvykankama Dźmitryj Ivanavič Parkoŭ, jaki davaŭ kamientary pra toje, što zdaryłasia, našamu sajtu.

— Adzin z zaŭziataraŭ vybieh na biehavuju darožku i abdymaŭsia z futbalistami.

— Ale ž vy skazali, što «niekatoryja zaŭziatary vybiehli na futbolnaje pole»…

— Było b lepš, kali b usiu infarmacyju vy pytalisia ŭ pres-słužby.

— Užo cikaviŭsia.

— Voś vam ciapier skažy słova, a vy dapišacie jašče piać lišnich.

— Skazanaje Vami budzie pieradadziena ŭ poŭnym abjomie i bieź źmianieńniaŭ.

— Kali łaska, źviartajciesia ŭ pres-słužbu ŬUS.

— A mahli b Vy acharaktaryzavać svajho padnačalenaha Uładzimira Recikava?

— Prafiesijny i dobry supracoŭnik, za pieryjad słužby zarekamiendavaŭ siabie sa stanoŭčaha boku. Adrazu paśla vojska, dzie i atrymaŭ krapavy bieret, jon pryjšoŭ pracavać u AMAP.

— Jon budzie pakarany?

— Kali vyniesiem zaklučeńnie, tady i pahavorym. Na dadzieny momant pravodzicca pravierka i dajecca pravavaja acenka.

— Usia hetaja šumicha ŭ presie niejak paŭpłyvała na pracazdolnaść vašaha padnačalenaha?

— Pra jakuju šumichu vy kažacie?

— U presie tolki lanivy nie abmiarkoŭvaje dziejańni supracoŭnika mahiloŭskaha śpiecnaza.

— Absalutna nijakaj šumichi ja nie baču. Prajšoŭ futboł, supracoŭniki milicyi zabiaśpiečyli hramadski paradak, pastupiła infarmacyja, što byli ŭžytyja śpiecsrodki. Ciapier pravodzicca pravierka.

— Takija vypadki raniej mieli miesca?

— Kali byli fakty parušeńnia hramadskaha paradku, to ŭžyvali śpiecsrodki. Mienavita ślezaciečny haz — nie.

— A jak ža matč «Dniepr» — «Minsk», na jakim dastałosia pryjezdžym fanatam?

— Tady haz nie ŭžyvali.

— Tym nie mienš, z pačatku futbolnaha siezonu dziejańni mahiloŭskaha śpiecnaza abmiarkoŭvajucca ŭžo nie pieršy raz.

— Pačakajcie. Što da fanataŭ «Minska»: byŭ fakt parušeńnia hramadskaha paradku, a supracoŭniki mahiloŭskaha AMAPa spynili hety fakt u adpaviednaści z zakonam. U Babrujsku taksama była sproba zaŭziataraŭ vybiehčy na futbolnaje pole, ale im nie dali takoj mahčymaści. Nasamreč nie razumieju vašaha pytańnia. Chočacie pryvieści da taho, što supracoŭniki AMAPa takija drennyja i naŭmysna ŭsio pravakujuć?

— Prosta chaču zrazumieć, čamu mienavita ŭ Mahilovie adbyvajecca ŭsio samaje cikavaje. U tym ža Minsku ničoha takoha nie davodziłasia nazirać.

— Napeŭna, u Minsku fanaty ŭmiejuć siabie pavodzić. Kali vyjazdžajuć niekudy — nie. Moža, nam traplajecca takaja katehoryja zaŭziataraŭ.

— Čamu tady ŭ inšych haradach Biełarusi ŭsio spakojna?

— Zadavajcie pytańnie im. Ja adkazvaju za siabie. Byli fakty parušeńnia hramadskaha paradku, i supracoŭniki milicyi dziejničali stroha ŭ adpaviednaści z zakonam. Mnie zdajecca, vam niama pra što pisać, voś i sprabujecie zrabić siensacyju.

— Raboty bolš čym dastatkova, ale nieabchodna razabracca ŭ kankretnaj prablemie.

— Dzie vy bačycie prablemu? U supracoŭnikach milicyi abo ŭ zaŭziatarach?

— U dadzienym vypadku — u supracoŭnikach milicyi.

— Jak pavodziać siabie zaŭziatary ŭ hramadskim miescy na masavych mierapryjemstvach, vy nie bačycie ŭ hetym prablemy?

— Ciapier my razhladajem kankretny vypadak.

— Zaŭziatary sprabavali vybiehčy na futbolnaje pole. Jak rastłumačyć ich pavodziny, kali jany rvanulisia sa svaich miescaŭ? Asabista ja bačyŭ, jak adzin čałaviek vybieh na biehavuju darožku.

— Ale ž niekalki chvilin tamu Vy śćviardžali, što niekalki zaŭziataraŭ vybiehli niepasredna na futbolnaje pole!

— Čaho vy čaplajeciesia za papiaredniaje pytańnie? Jany rvanulisia sa svaich miescaŭ i chacieli vybiehčy na futbolnaje pole. Jak heta rastłumačyć?

— Siarhiej Siamionavič, a vy ŭvohule futboł hledzicie?

— Ładna, usiaho dobraha.

• 0
• 0
• 0
• 0
• 0
• 0
• 0
• 0