Nivodzin z čynoŭnikaŭ nia daŭ prostaha adkazu na pytańnie žurnalistaŭ, što budzie rabić biełaruski bok u vypadku, kali Rasieja admovicca płacić myta, ci byli ŭžo takija vypadki.
Pieramovy nakont pastavak u Biełaruś enerhanośbitaŭ skončanyja, zajaviŭ na admysłovaj pres‑kanferencyi pieršy namieśnik ministra enerhietyki Biełarusi Eduard Taŭpianiec. «My majem nadziejny piacihadovy kantrakt z Rasiejaj na štohadovyja pastaŭki hazu ŭ nieabchodnych abjomach, sioleta atrymajem 21,2 młrd kubičnych metraŭ hazu, jašče 0,6 młrd pry techničnych mahčymaściach», — zajaviŭ E.Taŭpianiec. Pavodle jaho słovaŭ biełaruski bok niezadavoleny prapanavanym koštam hazu, ale varta pamiatać pra žorstkija ŭmovy pačatku pieramovaŭ.
Taksama sp. Taŭpianiec paviedamiŭ pra padpisańnie kantraktaŭ z Rasiejaj i Ŭkrainaj na pastaŭku elektraenerhii ŭ Biełaruś na hety hod u nieabchodnym abjomie. U jakaści adnoj z budučych alternatyŭnych krynicaŭ elektraenerhii jon nazvaŭ Kazachstan, ź jakim užo try hady viaducca pieramovy. U chutkim časie buduć zadziejničanyja prahramy enerhaźbieražeńnia, siarod jakich skaračeńnie enerhazatratnaj pramysłovaści, a taksama źmieny ŭ enerhazabieśpiačeńni pobytavaha sektaru.
Namieśnik staršyni kancernu «Biełnaftachimu» Uładzimier Vołkaŭ zapeŭniŭ, što zapasaŭ pierachodnaha rezervovaha fondu nafty chopić prynamsi na čas pieramovaŭ. Jon adznačyŭ, što pradpryjemstva pracuje ŭ zvyčajnym režymie. «My spadziajemsia na svaich rasiejskich partneraŭ, bo majem uzajemavyhadny biznes», — zajaviŭ namieśnik staršyni «Biełnaftachimu».
Uviadzieńnie Biełarusiaj naftavaha myta ŭ pamiery 45 dalaraŭ jość naturalnym sposabam kampensavać niepaźbiežnyja vydatki biełaruskaha boku ŭ vyniku dziejańniaŭ Rasiei, prakamentavaŭ sytuacyju namieśnik ministra justycyi Biełarusi Ihar Tušynski. Ź im pahadziŭsia načalnik kiraŭnictva źniešniaj palityki MZS Anton Kudasaŭ: «Heta nia miera ŭ adkaz na ŭviadzieńnie Rasiejaj tranzytnaha myta, a srodak abarony biełaruskich prapryjemstvaŭ i spažyŭcoŭ». Pry hetym čynoŭniki adznačyli, što Biełaruś nie parušała i nie parušaje mižnarodnaje i biełaruskaje zakanadaŭstva.
Varta adznačyć, što nivodzin z udzielnikaŭ pres‑kanferencyi nia daŭ prostaha adkazu na pytańnie žurnalistaŭ, što budzie rabić biełaruski bok u vypadku, kali Rasieja admovicca płacić myta, ci byli ŭžo takija vypadki. Čynoŭniki raspłyvista kazali pra toje, što baki buduć dziejničać u ramkach isnych pahadnieńniaŭ i mižnarodnaha zakanadaŭstva, a taksama pra toje, što Biełaruś painfarmavała rasiejski bok i ciapier čakaje adpaviednaj reakcyi. Pry hetym było padkreślena, što Biełaruś nie apuścicca da metadaŭ «Hazpramu».
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary