U amierykanskim Saŭt-Ryviery prajšoŭ tradycyjny Biełaruski fiestyval — fotarepartaž
Prajšoŭ jon la biełaruskaj carkvy sv. Jeŭfrasińni Połackaj.
U subotu, 23 lipienia, amierykanskija biełarusy praviali ŭ horadzie Saŭt-Ryvier (Ńju-Džersi) svoj tradycyjny hadavy fiestyval.
Prajšoŭ jon na zasadžanym drevami placy kala carkvy sv. Jeŭfrasińni Połackaj, što ŭ jurysdykcyi Kanstancinopalskaha patryjarchata. U prahramie mastackaje častki fiestyvalu byli: narodnyja tancy, biełaruskija vieršy, pieśni, muzyka. Prahramu arhanizavali i praviali Valancin i Taćciana Dziamieščyki, kiraŭniki carkoŭnaha choru, supolna z chareohrafam Viłaj Leŭčuk.
U budynku Biełaruska-Amierykanskaha Centra, što pobač z carkvoj, prajšła łatareja, pracavali bar i restaran z nacyjanalnymi stravami, pradavalisia suvieniry, biełaruskija knižki.
Saŭt-Ryvier -- horad u centralnaj častcy štata Ńju-Džersi. Biełarusy stali pierasialacca siudy ŭ kancy XIX st., hnanyja ekanamičnym kryzisam z Rasijskaj impieryi. U pačatku XX st. słavianskija vychadcy ź Biełarusi składali ŭ Saŭt-Ryviery da traciny nasielnictva, zasialiŭšy pieravažna paŭdniovuju častku horada. Mienavita emihranty z vakolic Maładziečna i Vilejki pabudavali ŭ S-R. carkvu śviatych Piatra i Paŭła, tady ŭ jurysdykcyi RPC.
Źbiełarusizavaŭsia Saŭt-Ryvier u pačatku 1950-ch ź pierasialeńniem u jaho niekalkich dziasiatkaŭ biełaruskich emihrantaŭ z łahieroŭ dla pieramieščanych asob u Niamieččynie. Biełarusy zasnavali prychod sv. Jefrasińni Połackaj u jurysdykcyi kanstancinopalskaha patryjarchata, zbudavali carkvu, Biełaruska-amierykanski hramadski centr. U Saŭt-Ryviery dziejničali, i dziejničajuć zaraz, niekalki hramadskich i sacyjalnych arhanizacyj, vydavalisia haziety i časopisy, časopis "Biełaruskaja dumka" -- nie błytać z hihinskim! -- vydajecca i pa siońnia. U rysie horada znachodziacca asobnyja biełaruskija mohiłki.
Źniavoleny raskazaŭ, jak siadzieŭ u kałonii ŭ Hłybokim u susiedniaj kamiery sa Statkievičam3
Kamientary