Mikoła Statkievič paćvierdziŭ fakt katavańniaŭ u SIZA KDB

Vajskovaja prakuratura dapytała byłoha kandydata ŭ prezidenty.

U škłoŭskaj turmie dniami dapytali byłoha kandydata na prezydenta Mikołu Statkieviča ŭ spravie raśśledavańnia faktu katavańniaŭ źniavolenych u SIZA KDB. Raśśledavańnie pravodzić vajskovaja prakuratura. Pra dopyt «Svabodzie» paviedamiła žonka palitviaźnia Maryna Adamovič.

«My byli tam u piatnicu razam z advakatam, i jana była na dopycie z hetaj nahody — raśśledavańnia faktaŭ katavańniaŭ u KDB. Usie fakty, vykładzienyja jahonymi papiarednikami, jon paćvierdziŭ. Vyhladaje jon dobra: badziory, upeŭnieny ŭ sabie».

Taksama ŭ Škłovie adbyvaje pakarańnie jašče adzin asudžany za ŭdzieł u akcyi pratestu 19 śniežnia — Aleh Hniedčyk. Pavodle maci, Valanciny Piatroŭny, na jaho i inšych palitviaźniaŭ znoŭ cisnuć, kab pisali zajavy ab pamiłavańni. Havoryć Valancina Hniedčyk: «Na ich byŭ psychalahičny cisk, kab jany pisali listy na pamiłavańnie — ich ža tam, zdajecca, piać čałaviek. Kaniečnie, nichto takich listoŭ pisać i nie źbiraŭsia i, nibyta, usio pierapyniłasia. Ale paźniej iznoŭ pačałosia hetaje ŭździejańnie, kab pisali ab pamiłavańni. U čym jano vyjaŭlałasia, hetaje ŭździejańnie — mahčyma, nie addavali listoŭ, ci jašče jak — nia viedaju. Choć by majo serca ŭsio heta vytryvała».

Valancina Hniedčyk taksama paviedamiła, što listujecca ź siabram svajho syna — Vasilom Parfiankovym, jaki adbyvaje 4 hady turmy ŭ Voršy: «Vasia mnie piša kožny tydzień — jon małajčyna, aptymist. Piša, što ŭsio ŭ jaho dobra, što pracuje — robić ramonty ŭ kamerach. Navat mianie jašče padtrymlivaŭ. Kali listoŭ ad Aleha nie było, ja Vasiu pra heta pisała. I jon mianie supakojvaŭ, što, Valancina Piatroŭna, nie chvalujciesia, usio naładzicca. Słovam, Vasia małajčyna — jon nia nudzicca».

Naprykancy lipienia ŭ mahiloŭskuju turmu byŭ pieraviedzieny jašče adzin palitviazień Aleh Fiedarkievič. Padčas sustrečy jon paviedamiŭ svajakam, što ŭmovy ŭtrymańnia stali lepšymi, čym u SIZA, ale za čas źniavoleńnia pahoršyłasia zdaroŭje, kaža svajačka Volha Ŭładzimiraŭna: «Skardziŭsia, što balić serca. Heta padčas siadzieńnia ŭ źniavoleńni pačałosia, bo raniej jon na serca nikoli nia skardziŭsia, tolki zaraz. Ničoha, akramia vitaminaŭ ź minerałami, nie prasiŭ, nijakich lekaŭ, ale na serca skardzicca».

50-hadovy Aleh Fiedarkievič musić jašče zastavacca ŭ turmie amal try hady: za ŭdzieł u akcyi pratestu 19 śniežnia jaho asudzili na 3,5 hoda źniavoleńnia.

• 0
• 0
• 0
• 0
• 0
• 0
• 0
• 0