Łukašenka padpisaŭ: bolš za troch nie źbiracca

Alaksandr Łukašenka padpisaŭ papraŭki ŭ zakon ab masavych mierapryjemstvach i šerah zakonaŭ, jakija rehulujuć hramadska-palityčnuju dziejnaść u krainie. Abodva dakumienty padpisanyja biełaruskim kiraŭnikom 8 listapada, 11 listapada — zarehistravany ŭ Nacyjanalnym rejestry pravavych aktaŭ, paviedamlaje Nacyjanalny pravavy internet-partał Biełarusi.

Zakonaprajekty byli pryniatyja pałataj pradstaŭnikoŭ 3 kastryčnika, u pieršy ž dzień raboty asieńniaj siesii, pryčym na zakrytym pasiadžeńni i adrazu ŭ dvuch čytańniach. U adroźnieńnie ad nižniaj pałaty, saviet respubliki abmiarkoŭvaŭ ich u adkrytym farmacie.

Novy zakon ab masavych mierapryjemstvach robić bolš žorstkimi praviły ich praviadzieńnia.

Arhanizacyja luboha zboru hramadzian pavinna być sankcyjanavanaja ŭładami — heta datyčycca i fłešmobaŭ, i zboru hramadzian, arhanizavanaha z vykarystańniem internetu.

Da atrymańnia dazvołu na praviadzieńnie masavaha mierapryjemstva jaho arhanizatary nie majuć prava abjaŭlać, u tym liku ŭ internecie, pra datu, čas i miesca jaho praviadzieńnia. Akramia taho, arhanizatarami nie mohuć być asoby, jakija dapuścili parušeńnie paradku praviadzieńnia takoha mierapryjemstva na praciahu hoda z momantu nakładańnia administracyjnaha spahnańnia.

Papraŭki ŭ zakanadaŭstva, jakoje rehuluje hramadska-palityčnuju dziejnaść,

robiać kryminalna karalnym zamiežnaje finansavańnie niedziaržaŭnych arhanizacyj u parušeńnie zakanadaŭstva Biełarusi.

Dakumient zabaraniaje respublikanskim i miascovym hramadskim abjadnańniam, ich sajuzam zachoŭvać hrašovyja srodki, kaštoŭnyja mietały i inšyja kaštoŭnaści ŭ bankach i niabankaŭskich kredytna-finansavych arhanizacyjach, jakija znachodziacca na terytoryi zamiežnych dziaržaŭ.

«Papraŭki ŭ zakon ab masavych mierapryjemstvach absalutna svoječasovyja. Jany skiravanyja nie na parušeńnie pravoŭ i svabod hramadzian, a na ich vyraznaje i niaŭchilnaje vykanańnie» — tak prakamientavaŭ zakonaprajekt žurnalistam ministr unutranych spraŭ Anatol Kulašoŭ.

Pavodle jaho słoŭ, u zakonaprajekcie ŭsio ŭzhodniena MUS ź inšymi arhanizacyjami dziaržaŭnaha kiravańnia.

Nahadajem, pryniaćcie hetych zakonaŭ vyklikała vialiki rezanans u hramadstvie. Lidary biełaruskich NDA i pravaabaroncy ŭ sumiesnaj zajavie zaklikali ŭłady admianić zakonaprajekt.

Na ich dumku, papraŭki ŭ zakon «Ab masavych mierapryjemstvach» «parušajuć pravy hramadzian na mirnyja schody, harantavanyja jak Kanstytucyjaj Biełarusi, tak i bazavymi normami mižnarodnaha prava, ŭvodziać administracyjnuju adkaznaść hramadzian za niavinnyja dziejańni i biaździejnaści».

Nie ŭvodzić u dziejańnie novyja zakony aficyjny Minsk taksama zaklikali pradstaŭniki mižnarodnaj hramadskaści, u tym liku Jeŭrasajuz i ABSIE. Na ich dumku, novaŭviadzieńni ŭ zakanadaŭstva jašče bolš abmiažujuć fundamientalnyja prava na svabodu schodaŭ i asacyjacyj u Biełarusi.

Adnak 28 kastryčnika Kanstytucyjny sud (KS) Biełarusi, jaki razhledzieŭ zakonaprajekty «u paradku abaviazkovaha papiaredniaha kantrolu», pryznaŭ ich zakonnymi.

• 0
• 0
• 0
• 0
• 0
• 0
• 0
• 0