Źmicier Chviedaruk: "U "amerykancy" było lepš, čym na Akreścina"

U sieradu viečaram a 19:30 ź mienskaj turmy "amerykanka" vyzvalili "maładafrontaŭcaŭ" Źmitra Chviedaruka i Aleha Korbana. Jany byli zatrymanyja 4 lutaha i troje sutak znachodzilisia ŭ adzinočnych kamerach mienskaj "amerykanki" - turmy KDB. Zdavałasia, jany paŭtorać los ichnaha starejšaha siabra Źmitra Daškieviča, jakoha paśla aryštu bolej nia vypuścili.

Adnak artykuł 193 Kryminalnaha kodeksu (udzieł u niezarehistravanaj arhanizacyi), pavodle jakoha chłopcy prachodziać padazravanymi, nie praduhledžvaje ŭtrymańnia pad vartaj. Prajšło troje sutak, Chviedaruka i Korbana vypuścili pad padpisku ab niavyjeździe da sudu.

"Naša Niva" pieršaj uziała nievialikaje interviju ŭ Źmitra Chviedaruka.

"U pryncypie, ni na što nia skardžusia, umovy ŭ turmie byli dosyć narmalnymi, značna lepšyja, čym na Akreścina. U nas była bializna, nie było patreby spać na hołych doškach. Štopraŭda, nie było prybyralni, było tolki viadro, kudy my i vymušanyja byli spraŭlać svaju patrebu. Staŭleńnie z boku achovy taksama było całkam narmalnym. Siadzieli ŭ adzinočnych kamerach, choć i pobač adzin ad adnaho. U psychalahičnym planie siadzieńnie ŭ "adzinočcy" było vielmi składanym, nie było nijakich knižak, kab pačytać, ty zastajeśsia sam-nasam sa tolki sa svaimi dumkami. Dva razy nas vyklikali na dopyty. Mianie -- u aŭtorak, a Aleha -- u paniadziełak. Siońnia i sa mnoj, i z Aleham taksama byŭ praviedzieny nievialiki dopyt. Jašče ŭ niadzielu, kali "hebešniki" razmaŭlali z nami, to byli vielmi pryjaznymi, sprabavali havaryć navat pa-siabroŭsku. Na dalejšych dopytach zadavali dosyć prostyja pytańni, časam pa kole, było vielmi cikava nazirać za ich metadami. Uziali padpisku pra toje, što my nia maje prava raskazvać pra padrabiaznaści pracesu, a taksama padpisku ab niavyjeździe z krainy. Jašče padpisali dakumenty, što ŭ nas byli kanfiskavanyja kamputary i pa ich budzie pravodzicca pravierka. Karmili vielmi drenna, tamu apošnija dva dni ja trymaŭ haładoŭku. Da apošniaha nia vieryłasia, što mianie vypuściać, navat kali siońnia advakat skazaŭ, što, mahčyma, vypuściać, ja nie pavieryŭ u heta. Mianie padazrajuć u kiravańni mienskaj arhanizacyi "Maładoha frontu", a Aleha Korbana – u kiravańni adnym z adździełaŭ mienskaj arhanizacyi. Źbirajusia nadalej žyć svaim realnym žyćciom. Ja hatovy iści da kanca. Tamu ad hramadzkaj dziejnaści nie admaŭlajusia".

Zaŭtra a 12:00 na ŭpravie Partyi BNF adbudziecca pres-kanferencyja z udziełam Źmitra Chviedaruka i Aleha Korbana.

• 0
• 0
• 0
• 0
• 0
• 0
• 0
• 0