6 śniežnia ŭ Minsku, u Nacyjanalnym histaryčnym muziei, adbyłasia ŭračystaja prezientacyja častki adšukanaha archiva Usievałada Ihnatoŭskaha i pieradača jaje ŭ dar muzieju.
U 2011 hodzie spoŭniłasia 90 hadoŭ Instytutu biełaruskaj kultury (z 1929 hoda — Biełaruskaja akademija navuk, ciapier — Nacyjanalnaja akademija navuk Biełarusi), 130 hadoŭ z dnia naradžeńnia pieršaha prezidenta akademii Usievałada Ihnatoŭskaha, a taksama 80 hadoŭ z dnia jaho śmierci.
Na uračystaj cyrymonii dyrektar muzieja Siarhiej Viečar adznačyŭ: «U tyja zmročnyja časy, vy viedajecie, kali čałaviek źnikaŭ, źnikali i jaho rodnyja, blizkija, źnikali jaho archivy, materyjały — kab ničoha pra jaho nie napaminała. Tamu vielmi važna, što hetyja materyjały — nievialičkaja častka archiva Usievałada Ihnatoŭskaha, jakaja zachavałasia ŭ vichury dvaccataha stahodździa, dziakujučy kankretnym ludziam patrapili da nas u muziej».
Pavodle słoŭ dyrektara Instytuta historyi NAN Biełarusi Viačasłava Daniłoviča, ź imiem Ihnatoŭskaha źviazana cełaja epocha ŭ historyi Biełarusi, jon adyhraŭ vialikuju rolu ŭ stanaŭleńni biełaruskaha nacyjanalnaha ruchu, byŭ jaho aktyŭnym udzielnikam.
«Archiŭ Ihnatoŭskaha całkam nie zachavaŭsia, — raskazaŭ Siarhiej Viečar, — tamu heta nievialikaja jaho častka maje vyklučnuju kaštoŭnaść. Tut jość navat niekatoryja fotazdymki z vyjavaj Ihnatoŭskaha (ab hetym kazaŭ siońnia Uładzimir Lachoŭski), jakija mała chto viedaje. I uvohule dakumienty pieryjadu 1921–1927 hadoŭ — najbolš plonnaha pieryjadu dziejnaści vučonaha i palityčnaha dziejača — dadajuć novyja rysy da jaho žyćcia i tvorčaści. A dla muzieja jašče važna, što heta miemaryjalnyja rečy, jakija majuć niepasrednaje dačynieńnie da takoha vydatnaha dziejača Biełarusi».
Kamientary