Ścisła

Hieroj za kratami

Źmitra Kaśpiaroviča, źvinavačanaha ŭ złosnym chulihanstvie za sprobu vyviesić nacyjanalny ściah na Mienharvykankamie, 27 lutaha asudzili na 5-miesiacovy aryšt. Za kratami chłopiec z 17 studzienia.

Studenty ŭ abaronu siabroŭki

Z Akademii veterynarnaj medycyny ŭ Viciebsku 25 lutaha adličyli moładzievuju aktyvistku druhakurśnicu Luboŭ Kučynskuju. Aficyjnaja pryčyna — niepaśpiachovaść (3 niazdadzienyja ispyty). Zvarot da kiraŭnictva akademii ŭ abaronu dziaŭčyny padpisali bolš za 100 studentaŭ: jany ličać vyklučeńnie pakarańniem za jaje palityčnuju dziejnaść.

Školnika trasuć za nalepku

U Žodzinie 21 lutaha milicyjanty zatrymali 10-klaśnika Dzianisa Čerkasa, bo ŭ jaho na sšytku była nalepki «Ja za svabodu». Jany ŭvarvalisia ŭ kabinet, kab pravieryć zaplečnik junaka, i zavieźli vučnia ŭ pastarunak.

23 lutaha ŭ Śvietłahorsku milicyjanty pieratreśli zaplečniki 10-klaśnikaŭ Aleha Hajdučenki j Antona Śviakołkina, aktyvistaŭ TBM: u horadzie źjavilisia nalepki pra manu dziaržaŭnych telekanałaŭ. Takija ž nalepki znajšli ŭ chłopcaŭ. U kamisii ŭ spravach niepaŭnaletnich im pahražali za nalepki štrafami 1 młn rub.

Sudy adkładzienyja

Sudovy praces u spravie Taciany Chomy i administracyi BDEU, pryznačany na 23 lutaha, pieraniesieny.

Sud nad moładzievymi aktyvistami z Barysava Alaksandram Kazakovym i Źmitrom Zubrom, źvinavačanymi ŭ supracivie milicyjantam, 23 lutaha nie pačaŭsia: abvinavačanym nie dastavili svoječasova pozvy, kab jany mahli paznajomicca z materyjałami spravy.

Skrabca vyvieźli ŭ turmu

Siarhieja Skrabca 26 lutaha nakiravali ŭ kaloniju «Vićba-3» u pasiołku Vićba Viciebskaj vobłaści.

Zabaranili pieradavać Bibliju

Aktyvisty niezarehistravanaj arhanizacyi «Małady front» 23 lutaha pieradavali Arturu Fińkieviču, jaki znachodzicca ŭ śledčym izalatary (SIZA) №1 Miensku pradukty charčavańnia j inšyja rečy. Supracoŭniki SIZA admovilisia pieradavać aryštantu Bibliju, bo jana nie ŭvachodzić u pieralik dazvolenych dla pieradačy vydańniaŭ.

Pieratrusy ŭ naziralnikaŭ

U Mahilevie 21 lutaha pieratrus adbyŭsia ŭ Aksany Zakreŭskaj, Siarhieja Łapucina, u Bychavie — u baćkoŭ Alaksieja Kuprejeva, u Navapołacku — u Źmitra Sałaŭjova, Alaksieja Trubkina, Hanny Korby, u Połacku — u Dzianisa Sałdacienki, u pas.Baravucha (Połaččyna) — u Anatola Kachančyka. 22 lutaha adbyŭsia pieratrus u Bieraści ŭ Iny Apanasienki. U Pružanach pieratrus adbyŭsia ŭ kvatery Alesia Dajneki, jakoha zmušali pryznacca, što jon uvachodzić u «Partnerstva».

U Viciebsku

Pradprymalnika Anufryja Ramanoviča 21 lutaha Viciebski sud aštrafavaŭ na 5 bazavych vieličyniaŭ (145 tys.) za raspaŭsiud drukavanaj pradukcyi biez vychodnych źviestak. Pry pieratrusie ŭ jahonym ofisie 3 studzienia kanfiskavali 58 tys. kalandarykaŭ z partretam A.Milinkieviča.

Barysa Chamajdu nakoratka zatrymali 22 lutaha padčas pikietu z zaklikam bajkatavać prezydenckija vybary.

23 lutaha padčas rasklejki abviestak pra sustreču z A.Milinkievičam byli nakoratka zatrymanyja Vital Broŭka j Źmicier Karatkievič. Na ich skłali pratakoły za antysanitaryju.

U Viciebsku padčas raspaŭsiudu «Narodnaj voli» nakoratka zatrymanyja moładzievyja aktyvisty Dzianis Dzianisaŭ i Maksim Vołkaŭ. U ich kanfiskavali 415 asobnikaŭ hazety.

U Homieli

U Homieli 21 lutaha na pryvatnuju kvateru, arandavanuju Siarhiejem Staryčenkam, aktyvistam štabu Alaksandra Kazulina, pranikli major milicyi j ludzi ŭ cyvilnym. Haspadar kvatery śćviardžaje, što nia viedaje, jakim čynam milicyjanty adamknuli dźviery. Jany sprabavali vyśvietlić asoby prysutnych (adbyvaŭsia schod aktyvistaŭ vybarčaha štabu) i zdymali ich na videakameru.

Śviatasłava Šałamava 21 lutaha aštrafavali na 10 b.v. (290 tys.) za parušeńnie Vybarčaha kodeksu: pry zatrymańni 8 lutaha ŭ jaho kanfiskavali nalepki ź lahatypami biełaruskich telekanałaŭ i nadpisam «Nam chłusiać», a taksama ŭlotki-karykatury na telekanały. Aktyvista biespadstaŭna źvinavacili, što ŭ jaho ŭlotkach byŭ zaklik nie hałasavać za dziejnaha prezydenta. U jaho kvatery supracoŭniki KDB praviali pieratrus.

23 lutaha milicyjanty kanfiskavali ŭ hrupy aktyvistaŭ A.Milinkieviča 1400 aficyjna vydadzienych ulotak. Kiraŭnik hrupy Andrej Tołčyn paviedamiŭ, što kanfiskavali taksama stend z partretam adzinaha kandydata, stoł i kresła.

25 lutaha milicyjanty nakoratka zatrymali ahitataraŭ z hrupy A.Milinkieviča Siarhieja Tryfanava j Leanida Ŭdovienku: ich źvinavacili, što ahitavali ŭ nienaležnym miescy. U pastarunku ŭ ich skanfiskavali bolš za 150 bukletaŭ adzinaha kandydata i ŭlotki.

Andreja Aksionava i A.Tołčyna nakoratka zatrymali 25 lutaha. U kožnaha ź ich kanfiskavali składny stolik, na jakim byli raskładzieny ŭlotki Milinkieviča. Milicyjanty tłumačać, što stoliki kanfiskujucca na padstavie ŭkazu Alaksandra Łukašenki №31, jaki zabaraniaje zahruvaščvać vulicy dy inšyja miescy hramadzkaha karystańnia.

26 lutaha padčas raspaŭsiudu bukletaŭ Milinkieviča nakoratka zatrymali Piatra Kuźniacova i Źmitra Załatarova. U zatrymanych 26 lutaha Jurasia Zacharanki, Kaciaryny Haŭrylenki, Leanida Tužyka kanfiskavali składnyja stoł i kresła, a taksama buklety.

Kali Anatola Papłaŭnaha sprabavali 26 lutaha zavieści ŭ pastarunak za raspaŭsiud ahitacyjnych ulotak, jon sieŭ u śnieh. Nieści ahitatara milicyjanty nie schacieli.

Padčas raspaŭsiudu «Narodnaj voli» 26 lutaha nakoratka zatrymanyja siostry Alena j Halina Pracko.

U Vietcy

U Vietcy 21 lutaha padčas razdačy hazetaŭ «Narodnaja vola» i «Tovariŝ» nakoratka zatrymali Maryju Bahdanovič i Ludmiłu Sudziłoŭskuju. Milicyjanty patłumačyli zatrymańnie tym, što nia viedajuć takich hazetaŭ.

U Rahačovie

21 lutaha ŭ Rahačovie zatrymany aŭtamabil Valerja Rybčanki: u jaho kanfiskavali 600 asobnikaŭ hazety «Narodnaja vola» i 4000 asobnikaŭ vydańnia «Tovariŝ». Z časam hazety viarnuli.

26 lutaha ŭ Rahačovie padčas raspaŭsiudu bukletaŭ Milinkieviča j «Narodnaj voli» nakoratka zatrymanyja Ŭładzimier Chadasievič i Ŭładzimier Tamkovič. Ich abvinavacili, što ahitavali ŭ nie pryznačanym dla hetaha miescy — na rynku.

Skarystaŭšysia z karykaturaŭ

U redakcyi hazety «Zhoda» 22 lutaha adbyŭsia pieratrus u źviazku ź pieradrukam karykaturaŭ na praroka Muchamada. Supracoŭniki KDB praviali pieratrus taksama ŭ kvatery hałoŭnaha redaktara j vydaŭca Alaksieja Karala. Redaktara j jahonaha namieśnika Alaksandra Źdźvižkova pytali ŭ KDB. Raspačataja kryminalnaja sprava za raspalvańnie rasavaj nacyjanalnaj ci relihijnaj varažniečy i roźni (art.130 č.1 KK).

Damokłaŭ mieč nad Chelsynskim kamitetam

27 lutaha Minjust vynies papiaredžańnie RHA «Biełaruski Chelsynski kamitet» za niavypłatu 157 młn rub. padatkaŭ u biudžet: heta hrošy, jakija BCHK atrymaŭ u ramkach prahramy TACIS. Minjust abaviazvaje arhanizacyju zapłacić hrošy ciaham miesiaca. Tym časam BCHK jašče abskardžvaje sudovaje rašeńnie.

Ziemlakoŭ zapałochvajuć

U sudzie Zelvy 22 lutaha aštrafavali na 145 tys.rub. Hiermana Radyhina, źbiralnika podpisaŭ za Milinkieviča.

U Astraŭcy pozvu na dopyt da prakurora 22 lutaha atrymała Nina Višnieŭskaja, jakaja źbirała podpisy za Milinkieviča i Alaksandra Kazulina.

Prakuror Biarozaŭskaha rajonu zavioŭ spravu pra administracyjnaje pravaparušeńnie na sacyjał-demakrata Alaksandra Kuźmina i Łarysu Mažejku ź Biełaaziorsku, aktyvistaŭ hrupy Kazulina: ich vinavaciać, što zbor podpisaŭ daručyli inšym ludziam.

U Mahilovie

21 lutaha ŭviečary ŭ Mahilovie nakoratka zatrymany Ŭładzimier Šancaŭ, jaki pieravoziŭ 26 000 pieradvybarčych ulotak A.Milinkieviča i 400 asobnikaŭ hazety «Tovariŝ». Ulotki ŭ milicyi pieraličvali ŭsiu noč. Urešcie viarnuli z prabačeńniami. Pryčym sami pryvieźli.

U Navapołacku

22 lutaha zatrymali studenta-treciakurśnika Jaŭhiena Radčykava: jon prymacavaŭ da ściany budynku nalepku «My chočam novaha». U milicyi na jaho skłali pratakoł za vyviešvańni abviestak u nie pryznačanych dla hetaha miescach.

U spravie Fińkieviča

Moładzievym aktyvistam Alaksieju Šydłoŭskamu i Alaksandru Atroščankavu 23 lutaha dadomu zatelefanavaŭ śledčy Pieršamajskaha rajonu Miensku i zaprapanavaŭ 24 lutaha źjavicca na dopyt jak śviedkŭ u spravie aktyvista niezarehistravanaha «Maładoha frontu» Artura Fińkieviča. Chłopcy paprasili śledčaha prysłać im pozvy ŭ adpaviednaści z patrabavańniami zakonu. U adkaz toj zajaviŭ, što abvieścić ich u vyšuk.

Takaja svaboda

Z BDATU 22 lutaha vyklučyli byłoha sakratara BRSM fakultetu pradprymalnictva j kiravańnia Vieniadykta Klaŭze, jaki ŭvajšoŭ u inicyjatyŭnuju hrupu Milinkieviča.

U Škłovie

U Škłovie 24 lutaha nakoratka zatrymali moładzievaha aktyvista Sieržuka Niahacina: z zaplečnika ŭ jaho kanfiskavali brašury dy nalepki. 25 lutaha ŭ carkvu v.Vysokaja na Škłoŭščynie, dzie Niahacin dapamahaje ŭ jakaści dziaka, źjaviŭsia lejtenant kryminalnaha vyšuku, jaki nehatyŭna charaktaryzavaŭ chłopca pierad śviatarom.

U Miensku

23 lutaha milicyjanty zatrymali Ŭładzimiera Kiškurnu, Ihara Arłova i Leanardu Muchinu, jakija razdavali ahitacyjnyja ŭlotki A.Milinkieviča. U pastarunku milicyjanty zajavili, što razdavać pieradvybarčyja ŭlotki možna tolki ŭ admysłova adviedzienych miescach. Daviedaŭšysia pra zatrymańnie aktyvistaŭ, pryjechaŭ sam A.Milinkievič. Hetaha było dastatkova, kab aktyvistaŭ vypuścili. Adnak paźniej im uručyli pozvy ŭ milicyju.

Za palakami cikujuć

Aŭtamabil polskich aktyvistaŭ, jakim jany pryjechali ŭ Miensk na kancert, zładžany ambasadaj, dahledzieli ŭviečary 25 lutaha. Kiroŭcu Antonu Borysu, bratu Anžaliki Borys, jaki čakaŭ Juzafa Pažeckaha i Andreja Pačobuta, supracoŭniki «Ałmazu» prystavili da hałavy pistalet i paviedamili, što ŭ mašynie pieravozicca zbroja, adnak znajšli j kanfiskavali 58 asobnikaŭ časopisu «Magazyn Polski na uchodzstwie». Mašynu dastavili ŭ pastarunak, dzie na Borysa j Pačobuta skłali pratakoł.

U Kazłoŭščynie

U miastečku Kazłoŭščyna Dziatłaŭskaha rajonu ŭčastkovy 24 lutaha sarvaŭ abviestki pra sustreču ź Miliniekvičam, choć jany visieli na došcy abviestak.

U Vialejcy

U Vialejcy 25 lutaha nakoratka zatrymali Mikołu Susłu, jaki razdavaŭ haradžanam ulotki A.Milinkieviča i hazetu «Narodnaja vola».

U Kalinkavičach

Raspaŭsiudnikaŭ ahitacyjnaj pradukcyi Milinkieviča ŭ Kalinkavičach Dzianisa Rabianka i Alaksieja Manieviča nakoratka zatrymali 26 lutaha i skanfiskavali 107 bukletaŭ. Pierad zatrymańniem nieviadomy ŭ cyvilnym zaklikaŭ haradžanaŭ bić ahitataraŭ.

U Babrujsku

26 lutaha ŭ Babrujsku padčas raspaŭsiudu ŭlotak Milinkieviča i «Narodnaj voli» nakoratka zatrymali moładzievych aktyvistaŭ Dzianisa Šejka i Alesia Čyhira: z pastarunku ich vypuścili paśla pravierki ŭlotak i hazety.

Na Bieraściejščynie

Aŭtamabili z ahitacyjnaj pradukcyjaj Milinkieviča 27 lutaha spyniali na šašy Bieraście—Pinsk niekalki razoŭ.

Źbićcio junaka

U Biełaaziorsku za hrafici 26 lutaha zatrymany moładzievy aktyvist Arciom Hovin. U rajadździele milicyi chłopca źbili, i jon patrapiŭ u bolnicu z strasieńniem mozhu.

• 0
• 0
• 0
• 0
• 0
• 0
• 0
• 0