Ekśpiert: U «Itery» byli padstavy ŭsumnicca ŭ akupnaści «Minsk-Sici»

U «Itery» byli padstavy ŭsumnicca ŭ zapłanavanych terminach akupnaści prajekta budaŭnictva Minsk-Sici. Takoje mierkavańnie BiełaPAN vykazaŭ dyrektar biełaruskaha ofisa mižnarodnaj kansałtynhavaj kampanii Colliers International Andrej Aleškin, kamientujučy skasavańnie dahavora pamiž Biełaruśsiu i rasijskaj kampanijaj «Itera» — inviestaram prajekta «Minsk-Sici».

«Ekanomika prajekta praličvałasia na toj etap raźvićcia rynku nieruchomaści, kali prajekt pačynaŭ realizoŭvacca. Ale tady i rynak, i staŭki arendy byli inšymi. Ciapier usio źmianiłasia i ŭ Jeŭropie, i ŭ Rasii, i ŭ Biełarusi. Staŭki arendy ŭpali, taksama jak i košt žylla. Ekanomika pakazała nie zusim tyja vyniki, jakija čakalisia», — adznačyŭ Aleškin.

Pavodle słoŭ ekśpierta, kali adkinuć kamiercyjnuju častku prajekta i ŭziać tolki žyllo, «to pry ciapierašnim košcie kredytavańnia (51—60%) raźvić taki prajekt niemahčyma ni pry jakich umovach, ni pry nijakich tannych hrošach».

Aleškin padkreślivaje, što žyllo i kamiercyjnaja nieruchomaść pamiž saboj uzajemaźviazany: «Kali nie budzie žylla ŭ vialikich abjomach, to nie patrebny handlovyja centry. A kali niama handlovych centraŭ, nie budzie i biźniesu, adpaviedna nie treba i biźnies-centry. Heta ŭzajemaźviazanyja rečy, jakija pasłužyli nahodaj, kab usumnicca ŭ akupnaści takich vielizarnych inviestycyj u zapłanavanyja terminy».

Pavodle acenki ekśpierta, akupnaść układańniaŭ u budaŭnictva Minsk-Sici pry ciapierašniaj situacyi na rynku «dobra, kali składaje na siońnia 20 hadoŭ». «Ale, dumaju, akupnaść navat vyšejšaja», — skazaŭ Aleškin.

Pavodle jaho mierkavańnia, znajści adnaho novaha inviestara «na takoje sałodkaje miesca naŭrad ci atrymajecca». «Z takim abjomam budaŭnictva ciapier nivodny inviestar nie spravicca. Samy aptymalny varyjant — razdrabnić prajekt siarod niekalkich inviestaraŭ, kab kožny ź ich realizoŭvaŭ niejkuju častku prajekta», — adznačyŭ ekśpiert.

Nahadajem, u studzieni hetaha hoda Alaksandr Łukašenka zajaviŭ, što Biełaruś nie suprać pieradać budaŭnictva Minsk-Sici Kitaju.

Andrej Aleškin zhodny z tym, što kitajskija kampanii mohuć uvajści ŭ prajekt. «Biezumoŭna, u Kitaja šmat tannych resursaŭ. Ale prosta tak Kitaj nie budzie ŭkładvacca. Kampanii taksama buduć ličyć akupnaść», — adznačyŭ ekśpiert.

Pavodle jaho słoŭ, kab paskoryć realizacyju prajekta i nie dapuścić paŭtoru situacyi z «Iteraj», «nieabchodna nanova praličyć ekanomiku prajekta, praanalizavać patencyjalny popyt, prystasavać prajekt da siońniašniaha stanu rynku, pamienšyć abjomy i raźvivać paetapna».

• 0
• 0
• 0
• 0
• 0
• 0
• 0
• 0