U Homieli sud nie zadavoliŭ isk žančyny, jakuju pryciahnuli da administracyjnaj adkaznaści, pierabłytaŭšy jaje ź ciozkaj pa proźviščy
Sud Savieckaha rajona Homiela admoviŭ žycharcy abłasnoha centra Ludmile Miraniency ŭ zadavalnieńni isku ab spahnańni maralnaj škody z rajonnaj administracyi.
Jak paviedamiŭ pravaabaronca Leanid Sudalenka, administracyjnaja kamisija pry administracyi Savieckaha rajona ŭ 2010 hodzie niezakonna aštrafavała žančynu, a sud admianiŭ hetuju pastanovu. Poŭnaja ciozka Ludmiły Miranienki parušyła praviły handlu.
Adnak administracyjnaja kamisija nie razabrałasia i pryciahnuła da adkaznaści nievinavatuju hramadzianku z-za poŭnaha supadzieńnia pašpartnych danych. Ludmiła Miranienka była aštrafavanaja.
Žančyna paŭhoda sprabavała dakazać svaju nievinavataść. Jana źviarnułasia ŭ sud, i pastanova kamisii była admienienaja. U pratakole ab pravaparušeńni supracoŭniki kamisii sfalsifikavali asabisty podpis Miranienki, što paćviardžajecca zaklučeńniem ekśpiertyzy.
Niezakonnaje pryciahnieńnie da administracyjnaj adkaznaści, jakoje paciahnuła pryčynieńnie maralnaj škody, žančyna acaniła ŭ 10 młn. rubloŭ. "Falsifikacyja z boku kamisii źniavažyła maju čałaviečuju i hramadzianskuju hodnaść, prymusiła mianie praciahły čas adčuvać svaju biezabaronnaść pierad samavolstvam i ŭsiodazvolenaściu dziaržaŭnych orhanaŭ, usumnicca ŭ dziejsnaści pryncypu zakonnaści i spraviadlivaści. Ja była ŭ rospačy i biezvychodnaści. Maje maralnyja pakuty vyjaŭlajucca ŭ adčuvańni tryvohi, pastajannaha niespakoju na praciahu paŭhoda sudovaha razhladu i da momantu admieny niezakonnaj pastanovy i spynieńnia administracyjnaj spravy", — napisała iściec u skarzie ŭ sud.
Tym nie mienš sud paličyŭ, što žančyna nie maje prava na pakryćcio maralnaj škody, bo jana nie adbyvała aryšt, a ŭsiaho tolki była pakaranaja štrafam. "Tolki čałaviek sam moža vyznačyć, paciarpieŭ jon maralna, ci nie, a nie sud. Prava hramadzianina na kampiensacyju maralnaj škody harantavanaje Kanstytucyjaj. Rašeńni suda pieršaj instancyi supiarečać pastanovie plenuma Viarchoŭnaha suda "Ab praktycy ŭžyvańnia sudami zakanadaŭstva, jakoje rehuluje kampiensacyju maralnaj škody", pakolki adkazčyk, źjaŭlajučysia dziaržaŭnym orhanam, niezakonna pryciahnuŭ žančynu da administracyjnaj adkaznaści, što pryčyniła joj značnuju maralnuju škodu", — prakamientavaŭ pravaabaronca.
Jon dapamoh Ludmile Miraniency skłaści kasacyjnuju skarhu ŭ Homielski abłasny sud, dzie hramadzianka budzie abskardžvać rašeńnie suda Savieckaha rajona.
Śpiecsłužby atrymali dostup da pierapiski ŭ Signal, choć sama prahrama ŭžo była vydalenaja. Toje samaje mahło być i z TH. Jak tak i jak zaścierahčysia?22
Kamientary