Vybary ŭ Saary: «Piraty» ŭmacavali svaje pazicyi

Chryścijanska-demakratyčny sajuz fiederalnaj kanclerki Anhieły Merkiel zachavaŭ svaje pazicyi ŭ ziamielnym parłamiencie. Jak i try hady tamu, jon atrymaŭ 19 miescaŭ. Trochi ŭmacavalisia pazicyi sacyjał-demakrataŭ: ciapier SDPN maje ŭ łandtahu 17 deputataŭ — na čatyry bolš, čym u 2009 hodzie. Zatoje na dva mandaty mienš atrymała Levaja partyja (było 11, zastałosia 9 deputataŭ). U cełym ža levyja i levacentrysty zaniali ŭ łandtahu 34 miescy — na adno bolš, čym dva hady tamu. Ledź-ledź zdoleła pierastupić paroh parłamienta Partyja zialonych. Jana nabrała roŭna 5 pracentaŭ hałasoŭ i atrymała dva miescy.

Znoŭ prahučaŭ tryvožny zvanočak dla libierałaŭ. Svabodnaja demakratyčnaja partyja, najbolš viadomym dziejačam jakoj źjaŭlajecca fiederalny ministr zamiežnych spraŭ Hvida Vestervele, apynułasia ścienami saarskaha łandtaha. Heta druhaja adčuvalnaja paraza libierałaŭ. U minułym hodzie jany nie zmahli prajści ŭ sienat Bierlina, jaki maje status fiederalnaj ziamli. Ahladalniki miarkujuć, što SvDP čakajuć ciažkija vyprabavańni na sioletnich majskich vybarach u Šleźvih-Holštajnie i ŭ Paŭnočnym Rajnie — Viestafalii (u hetaj ziamli upłyŭ libierałaŭ vielmi słaby).

Z druhoha boku, vybary ŭ Saary pakazali, što svaje pazicyi na palityčnaj arenie Niamieččyny ŭmacoŭvaje novaja palityčnaja hrupoŭka — Niamieckaja partyja pirataŭ. Letaś na vybarach u bierlinski sienat jana atrymała 8,9 pracenta hałasoŭ i 15 mandataŭ. Saar — druhaja ziamla, u parłamiencie jakoj apynulisia «piraty». Jany nabrali 7,4 pracenta hałasoŭ i majuć u łandtahu 4 miescy.

Za «pirataŭ» hałasujuć pieravažna tyja hramadzianie Niamieččyny, jakija raniej na vybary nie chadzili. Hałasuje moładź, asabliva samyja maładyja vybarščyki.

Hałoŭny łozunh «pirataŭ» — svaboda karystańnia internetam i asłableńnie achovy intelektualnaj ułasnaści (tamu partyja i nazyvajecca partyjaj pirataŭ). Partyja patrabuje taksama bolšaj prazrystaści palityki.

Tryccać hod tamu pieravarot u partyjnaj sistemie Niamieččyny ździejśnili zialonyja. Ličycca, što «piraty» mohuć ździejśnić novy pieravarot. Ahladalniki adznačajuć, što novaja partyja ŭvachodzić u palityčnuju sistemu Federatyŭnaj Respubliki bolš imkliva, čym zialonyja. «Piraty» majuć svaje struktury va ŭsich ziemlach i bujnych haradach krainy, ciapier jany stvarajuć svaje struktury ŭ małych haradach. Šparkamu rostu partyi spryjajuć novyja infarmacyjnyja technałohii. Prychilniki «pirataŭ» praź internet mohuć u udzielničać u partyjnych schodach, praź internet vynosić na abmierkavańnie kalehaŭ svaje prapanovy. Abmierkavańnie pieradvybarčych partyjnych słohanaŭ i łozunhaŭ taksama adbyvajecca ŭ siecivie.

Partyju pirataŭ nielha nazvać ni levaj, ni pravaj. Ideałohija partyi paprostu nie raspracavanaja. I ŭ hetym, ličycca, jaje słabaść. Druhaja słabaść u tym, što partyja nie maje ŭstojlivaha kiraŭnictva, taho, što nazyvajecca jaje hałoŭkaj. Krainie najbolš viadomy tolki lider novaj palityčnaj arhanizacyi Siebaścian Nerc (Nerz).

Vyniki vybaraŭ u Saary Siebaścian Nerc acaniŭ jak pazityŭny sihnał. Ahladalniki ličać što 6 traŭnia Partyja pirataŭ moža atrymać mandaty ŭ łandtahu Šleźviha-Holštajna, a 13 traŭnia — u łandtahu Paŭnočnaha Rajnu — Viestfalii.

Travieńskija vybary pakažuć, ci ŭstojlivaja tendencyja da asłableńnia ŭ palityčnym žyćci Niamieččyny pazicyj Svabodnaj demakratyčnaj partyi i da ŭmacavańnia pazicyj Partyi pirataŭ.

• 0
• 0
• 0
• 0
• 0
• 0
• 0
• 0