Biesprecedentny krok: Biełaruś adłučyli ad Bałonskaha pracesu minimum na 3 hady
Biełaruskaje pytańnie źniataje z paradku dnia najbližejšaha samitu ministraŭ adukacyi Jeŭrapiejskaj prastory, što projdzie na nastupnym tydni ŭ Buchareście.
Biełarusi kančatkova admoŭlena ŭ jaje žadańni dałučycca da Bałonskaha pracesu. Biełaruskaje pytańnie całkam źniataje z paradku dnia najbližejšaha samitu ministraŭ adukacyi Jeŭrapiejskaj prastory vyšejšaj adukacyi, jaki projdzie na nastupnym tydni ŭ Buchareście. Nastupny šaniec dałučycca da pracesu naša kraina atrymaje tolki ŭ 2015 hodzie.
Biełarusi, jakaja ŭ śniežni 2011 hoda padała zajaŭku na dałučeńnie da Jeŭrapiejskaj prastory vyšejšaj adukacyi, što jadnaje ŭsie krainy Jeŭropy, admoŭlena ŭ siabroŭstvie ŭ hetaj arhanizacyi.
Pryčyna ŭ tym, što Biełaruś nie vykonvaje pryncypy i nie trymajecca kaštoŭnaściaŭ Bałonskaha pracesu, takich jak akademičnaja svaboda, instytucyjnaja aŭtanomija i studencki ŭdzieł u kiravańni vyšejšaj adukacyjaj.
U studzieni 2012 hoda pracoŭnaja hrupa BP (Bologna Follow-Up Group), jakaja zajmajecca biahučymi pytańniami Jeŭrapiejskaj prastory vyšejšaj adukacyi, rekamiendavała admović Biełarusi ŭ jaje dałučeńni da Bałonskaha pracesu. Adnak kančatkovaje rašeńnie musili pryniać 47 ministraŭ adukacyi na samicie ŭ Buchareście 26–27 krasavika.
Ciapier stała viadoma, što na novym pasiadžeńni pracoŭnaj hrupy biełaruskuju zajaŭku na dałučeńnie vyrašana było całkam źniać z paradku dnia samitu.Ab hetym piša European Voice. Nastupnaja sustreča ministraŭ projdzie ŭ 2015 hodzie ŭ Jerevanie. Tam biełaruskaja zajaŭka moža być razhledžanaja nanoŭ.
Admova Biełarusi stała biesprecedentnym krokam dla Jeŭrapiejskaj prastory vyšejšaj adukacyi.Dahetul nie było vypadkaŭ, kab zajaŭku krainy, što žadała ŭvajści ŭ Bałonski praces, adchilali z-za jaje nieadpaviednaści kryteram prastory. U Bałonski praces pryniali navat takija dalokija ad demakratyi krainy, jak Kazachstan i Azierbajdžan.
«My ličym, što dazvoł Biełarusi dałučycca da Bałonskaha pracesu byŭ by vykarystany dziaržaŭnaj prapahandaj, adnak zrabiŭ by mała karysnaha dla studentaŭ i vykładčykaŭ u takich napramkach, jak ich prava na atrymańnie adukacyi i praviadzieńnie daśledavańniaŭ»,— kaža staršynia Jeŭrapiejskaha studenckaha sajuza Ałan Poł.
Hienieralny sakratar Jeŭrapiejskaj prastory vyšejšaj adukacyi Łesli Ŭiłsan kaža, što niajasna, ci zmahli b biełaruskija VNU i ich studenty šmat zajmieć ad dałučeńnia da Bałonskaha pracesu.
«Adnak biełaruskija ŭłady mohuć vykarystać siabroŭstva ŭ adzinaj jeŭrapiejskaj prastory jak pryznańnie ich palityki ŭ sfery vyšejšaj adukacyi», — kaža hienieralny sakratar.
A pakul Jeŭropa budzie padtrymlivać biełaruskich studentaŭ i vykładčykaŭ praź finansavańnie admysłovych adukacyjnych prahram, Jeŭrapiejskaha humanitarnaha ŭniviersiteta ŭ Vilni i takija prahramy abmienu, jak Tempus i Erasmus Mundus.
Ciapier u prahramach ES u sfery vyšejšaj adukacyi ŭdzielničajuć tolki 5 biełaruskich VNU. Za dva hady 230 biełaruskich studentaŭ zmohuć pavučycca ŭ Eŭropie pa prahramie Erasmus Mundus.
Ciapier čytajuć
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary