Biełarusa zabivajuć za ściah

«My ŭsie pryvykajem da absurdu i žorstkaści biełaruskaha žyćcia, ale ŭsiamu jość miaža, — piša redaktarka sajta Chartyja'97. —

U XXI stahodździ ŭ krainie ŭ centry Jeŭropy ŭ turmie pamiraje ad haładoŭki apazicyjanier Siarhiej Kavalenka.

Ci viedajecie vy jašče krainu ŭ śviecie, dzie za vyviešvańnie ściaha aryštoŭvajuć i prysudžajuć da turemnaha terminu? U Biełarusi heta adbyvajecca ŭžo 17 hadoŭ, z taho samaha refierendumu 1995 hoda.

Biełaruskija demakraty vyviešvajuć nacyjanalny ściah pa načach, kab nie być aryštavanymi, chavajuć jaho pad adzieńniem, razhortvajuć na demanstracyjach, ryzykujučy atrymać ŭdar amapaŭskaj dubinkaj. Heta pałatno biełaha i čyrvonaha koleraŭ stała siońnia simvałam biełaruskaha supracivu dyktatury i baraćby za svabodu.

Los Siarhieja Kavalenki, mužnaść, ź jakoj jon adstojvaje prava biełarusaŭ mieć sapraŭdnyja nacyjanalnyja simvały, nie pavinny pakinuć nikoha abyjakavym.

Ź siaredziny śniežnia da kanca sakavika ź pierapynkam na 20 dzion Kavalenka trymaŭ haładoŭku, za čas jakoj schudnieŭ na 50 kiłahramaŭ. Potym jaho kinuli ŭ «psichušku», adtul — znoŭ u turmu, dzie biełarus znoŭ admoviŭsia ad ježy. Jon patrabuje admieny niezakonnaha prysudu, vyzvaleńnia ŭsich palitviaźniaŭ i lehalizacyi nacyjanalnaj simvoliki.

Nichto nie viedaje, ci pieražyvie Kavalenka hetuju haładoŭku.

Admova ad ježy na praciahu dvuch miesiacaŭ užo pryviała da niezvarotnych pracesaŭ u jaho arhaniźmie. Jašče adna haładoŭka moža stać fatalnaj.

Ale śviet maŭčyć, jak maŭčać sami biełarusy. 13 maja na aficyjnym uzroŭni ŭ krainie adznačaŭsia Dzień dziaržaŭnaha ściaha. U ramkach akcyi «Hanarymsia radzimaj svajoj» sałdaty nasili pa centralnaj płoščy Minska vielizarnaje čyrvona-zialonaje pałatno. Čym jany hanaracca? Turmami, u jakich pamirajuć palitviaźni, zabitymi i vykradzienymi apazicyjanierami, vykradzienym pravam vybaru, adsutnaściu svabod, halečaj i reputacyjaj krainy jak «apošniaj dyktatury Jeŭropy»?

Źniščajucca nie tolki inšadumcy — źniščajecca pamiać ludziej, historyja i mova cełaha naroda. Jaki dyktatar u śviecie jašče tak nienavidzić historyju svajoj krainy, ludziej, jakija jaje pamiatajuć i šanujuć?

Ja nie viedaju, jak jašče možna vyratavać Siarhieja Kavalenku, akramia jak kryčać na ŭvieś śviet: ludzi, nie budźcie abyjakavymi. Biełarusa zabivajuć za ściah u XXI stahodździ ŭ centry Jeŭropy.

U svoj čas mianie ŭraziła akcyja «Koni-2012», arhanizavanaja maładymi amierykancami. Sprabujučy spynić lidara terarystyčnaj arhanizacyi Uhandy «Armija supracivu Hospada» Džozefa Koni, jaki prasłaviŭsia žachlivym hvałtam, u tym liku nad dziećmi, žychary ZŠA pačali kampaniju hramadzianskaj salidarnaści z uhandyjcami. Akcyja doŭžycca da hetaha času. Tysiačy i tysiačy ludziej vychodziać na vulicy, patrabujučy mižnarodnaha pieraśledu i aryštu Koni, i prymušajučy svoj urad reahavać na toj kašmar, jaki adbyvajecca ŭ hetaj krainie ŭ centralnaj Afrycy.

Ich deviz — «Niama ničoha macniejšaha za ideju tych, čyj čas pryjšoŭ». Ich ideja — prostyja hramadzianie ŭ stanie paŭpłyvać na ŭrady i mohuć rabić historyju.

Kali ludzi pa ŭsim śviecie pačnuć uzdymać kožny dzień biełaruski ściah ci nasić biełyja i čyrvonyja kolery, heta moža vyratavać žyćcio nie tolki Siarhieju Kavalenku. Heta moža vyratavać Biełaruś».

• 0
• 0
• 0
• 0
• 0
• 0
• 0
• 0