Janukovič za ŭdzieł Ukrainy ŭ amerykanskaj systemie PRA
My hatovyja dałučycca da pieramovaŭ adnosna amerykanskaha antyrakietnaha ščyta i navat pryniać udzieł u budaŭnictvie hetaj systemy — zajaviŭ premjer Ukrainy Viktar Janukovič
My hatovyja dałučycca da pieramovaŭ adnosna amerykanskaha antyrakietnaha ščyta i navat pryniać udzieł u budaŭnictvie hetaj systemy — zajaviŭ premjer Ukrainy Viktar Janukovič.
Hetaja zajava była niečakanaściu, bo prarasiejski Janukovič da hetaha času vykazvaŭsia na temu ščyta dastatkova skieptyčna. Jon patrabavaŭ bolej infarmacyi i navat kazaŭ, što budaŭnictva elementaŭ ščyta ŭ Polščy pahoršyć stasunki Kijeva z Varšavaj.
U niadzielnym teleinterviju, adkazvajučy na pytańnie, kali Ŭkraina pradstavić svaju aficyjnuju pazycyju ŭ spravie ščyta, Janukovič skazaŭ: «Navat dziaržavy, što naležać da NATO, nia majuć na hety kont adzinaha pohladu. Ja liču, što na dadzieny momant usie stratehičnyja partnery, zaanhažavanyja ŭ stvareńni antyrakietnaha ščyta, pavinny sieści za stoł pieramovaŭ. Heta datyčyć taksama i Ŭkrainy».
Na dumku Janukoviča, Ukraina mahła b dałučycca da budaŭnictva ščyta, uličvajučy svaje techničnyja mažlivaści. «U nas jość systemy nazirańnia za kaśmičnaj prastoraj, jakija my ciapier vykarystoŭvajem supolna z Rasiejaj», — kazaŭ ukrainski premjer.
Ton Janukoviča źmianiŭsia paśla taho, jak u Kijeŭ naviedaŭsia na minułym tydni kiraŭnik amerykanskaj Ahiencyi pa supraćrakietnaj abaronie hien. Hienry Oberynh. Jon zapeŭniŭ ukrainskija ŭłady, što ščyt nie nakiravany suprać niejkaj dziaržavy, hałoŭnaj metaj jość abarona ZŠA i ich sajuźnikaŭ ad ataki z boku niepradkazalnych dziaržavaŭ, pieradusim Iranu.
Prychilna da budaŭnictva ščyta stavicca ŭkrainski prezydent Viktar Juščanka, jakomu farmalna padparadkoŭvajecca zamiežnaja i abaronnaja palityka. Juščanka krytykavaŭ Janukoviča, što jahonyja skieptyčnyja vykazvańni adnosna ščyta nie byli ŭzhodnienyja z kiraŭnikom dziaržavy. Juščanka moža ŭpłyvać na Janukoviča pahrozami daterminovych parlamenckich vybaraŭ. Vidać, što mienavita sa strachu pierad vybarami kiraŭnik ukrainskaha ŭradu źmiakčyŭ svaju pazycyju ŭ pytańni antyrakietnaha ščyta.
Ciapier čytajuć
Babaryka turemščykam: «U mianie było, ciapier niama, ale jość šaniec, što budzie. A ŭ vas nie było, niama i nie budzie. I ŭ vašych dziaciej nie budzie»99
Kamientary