Януковіч за ўдзел Украіны ў амэрыканскай сыстэме ПРА
Мы гатовыя далучыцца да перамоваў адносна амэрыканскага антыракетнага шчыта і нават прыняць удзел у будаўніцтве гэтай сыстэмы — заявіў прэм’ер Украіны Віктар Януковіч
Мы гатовыя далучыцца да перамоваў адносна амэрыканскага антыракетнага шчыта і нават прыняць удзел у будаўніцтве гэтай сыстэмы — заявіў прэм’ер Украіны Віктар Януковіч.
Гэтая заява была нечаканасьцю, бо прарасейскі Януковіч да гэтага часу выказваўся на тэму шчыта дастаткова скептычна. Ён патрабаваў болей інфармацыі і нават казаў, што будаўніцтва элемэнтаў шчыта ў Польшчы пагоршыць стасункі Кіева з Варшавай.
У нядзельным тэлеінтэрвію, адказваючы на пытаньне, калі Ўкраіна прадставіць сваю афіцыйную пазыцыю ў справе шчыта, Януковіч сказаў: «Нават дзяржавы, што належаць да НАТО, ня маюць на гэты конт адзінага погляду. Я лічу, што на дадзены момант усе стратэгічныя партнэры, заангажаваныя ў стварэньні антыракетнага шчыта, павінны сесьці за стол перамоваў. Гэта датычыць таксама і Ўкраіны».
На думку Януковіча, Украіна магла б далучыцца да будаўніцтва шчыта, улічваючы свае тэхнічныя мажлівасьці. «У нас ёсьць сыстэмы назіраньня за касьмічнай прасторай, якія мы цяпер выкарыстоўваем супольна з Расеяй», — казаў украінскі прэм’ер.
Тон Януковіча зьмяніўся пасьля таго, як у Кіеў наведаўся на мінулым тыдні кіраўнік амэрыканскай Агенцыі па супрацьракетнай абароне ген. Генры Обэрынг. Ён запэўніў украінскія ўлады, што шчыт не накіраваны супраць нейкай дзяржавы, галоўнай мэтай ёсьць абарона ЗША і іх саюзьнікаў ад атакі з боку непрадказальных дзяржаваў, перадусім Ірану.
Прыхільна да будаўніцтва шчыта ставіцца ўкраінскі прэзыдэнт Віктар Юшчанка, якому фармальна падпарадкоўваецца замежная і абаронная палітыка. Юшчанка крытыкаваў Януковіча, што ягоныя скептычныя выказваньні адносна шчыта не былі ўзгодненыя з кіраўніком дзяржавы. Юшчанка можа ўплываць на Януковіча пагрозамі датэрміновых парлямэнцкіх выбараў. Відаць, што менавіта са страху перад выбарамі кіраўнік украінскага ўраду зьмякчыў сваю пазыцыю ў пытаньні антыракетнага шчыта.
Цяпер чытаюць
Рэдактара незалежнай баранавіцкай газеты «Інтэкс-Прэс» Янукевіча прысудзілі да 14 гадоў калоніі, яго намесніка Пакаленку — да 12 гадоў8
Каментары