Stała viadoma, dzie zimuje viartlavaja čarotaŭka

Paśla piaci hod daśledvańniaŭ, admysłovaja ekśpiedycyja adkryła ŭ Sieniehale miesca zimoŭki viartlavaj čarotaŭki — eŭrapiejskaj vierabjinaj ptuški, jakoj pahražaje źniknieńnie.

U suviazi z hetym Łars Łachmann (Lars Lachmann) (pradstaŭnik RSPB (BirdLife ŭ Vialikabrytanii), jakoje spryčyniłasia da arhanizacyi ekśpiedycyi ŭ Zachodniuju Afryku)) skazaŭ, što «viedańnie taho, dzie jany zimujuć, daje nam mahčymaść paŭtaryć u Afrycy paśpiachovyja dziejańni pa achovie vida, jakija byli zroblenyja ŭ Eŭropie».

Ekśpiedycyja adkryła vialikuju kolkaść čarotavak na terytoryi prykładna ŭ 100 kv.km ŭ miežach nacyjanalnaha parku Džoŭdž (the Djoudj National Park), jaki źjaŭlajecca TVP (terytoryjaj, važnaj dla ptušak) u Zachodnim Sieniehale. Papiarednija acenki, jakija byli zrobleny dla hetaha miesca, kažuć pra 5‑10 tysiač zimujučych tam viartlavych čarotavak.

Daśledčyki z BirdLife International, APB (BirdLife ŭ Biełarusi) i RSPB skambinavali ŭžo isnujučyja z dapamohaj navukovaha analizu dadzienyja i ŭjaŭleńni z tradycyjnymi metadami pracy «ŭ poli», kab vyrašyć zahadku miescaŭ zimoŭki hetaha vidu čarotavak, jakaja «nie paddavałasia» šmat hadoŭ.

Kamanda vučonych praanalizavała radyjaizatopny sastaŭ pierjaŭ viartlavych čarotavak, jakija byli adłoŭleny na miescach hniezdavańnia ŭ Eŭropie, kab źmienšyć hieahrafiju pošukaŭ. Atrymanyja dadzienyja byli paraŭnanyja ź viadomymi ŭžo mapami raspaŭsiudu izatopaŭ u Zachodniaj Afrycy.

Hetyja dadzienyja pakazvali, što ptuški zimujuć na terytoryjach, jakija lažać adrazu na poŭdzień ad Sachary. Analiz niešmatlikich nazirańniaŭ čarotavak u Afrycy razam z kamputarnym madelavańniem patencyjalna padychodziačych pa klimatyčnych umovach miescaŭ pryvioŭ daśledčykaŭ na terytoryi ŭzdoŭž raki Sieniehał.

«Heta doŭhačakanaje adkryćcio, jakoje daje natchnieńnie dla dalejšaj pracy jak daśledčykam z Eŭropy, tak i z Afryki« – tak prakamentavaŭ hetaje zdareńnie Pol K. Ndanhanha (Paul K. Ndanganga), kaardynatar Rabočaj hrupy BirdLife pa afrykanskich vidach. «Dziakujučy tamu, što zaraz my viedajem dakładnyja terytoryi, jakija važnyja dla zimoŭki čarotavak, my možam pačynać nastupny krok – sfakusiravać našy namahańni na manitorynhu hetych miescaŭ, kab być upeŭnienymi, što hetyja terytoryi adekvatna achoŭvajucca i ŭpraŭlajucca».

Łars Łachmann dadaŭ: «Vydatna, što značnaja častka ptušak zimuje na ŭžo achoŭvajemaj terytoryi – vyhladaje na toje, što nacyjanalny park Džoŭdž prymaje na zimoŭku treciuju častku ŭsioj suśvietnaj papulacyi hetaha vidu. Hetaje bałota, jakoje znachodzicca na paŭdniovym uskrajku Sachary, znachodzicca pad pahrozaj źniščeńnia praz pavieličeńnie pustynnych terytoryj na poŭdzień z‑za źmienaŭ klimatu».

Viartlavaja čarotaŭka dramatyčna źmienšyła svaju kolkaść za apošniaje stahodździe, i zaraz usia suśvietnaja papulacyja aceńvajecca ŭ 15000 par – hałoŭnym čynam z‑za asušeńnia nizinnych bałot – miescaŭ jaje hniezdavańnia. Pa acenkach navukoŭcaŭ, za apošnija 100 hod płošča ich źmienšyłasia na 95%. U Biełarusi hniazduje prykładna 60% suśvietnaj papulacyi vidu.

Budučaja praca «ŭ poli» razam z analizam spadarožnikavych zdymkaŭ dapamoža znajści inšyja patencyjnyja miescy zimoŭki viartlavych čarotavak u Paŭdniovaj Maŭrytanii i inšych krainach Zachodniaj Afryki.

Achova ptušak Biełarusi z spasyłkaj na birdlife.org, pierakłaŭ Dźmitry Vinčeŭski

• 0
• 0
• 0
• 0
• 0
• 0
• 0
• 0