U Minsku znoŭ stralali

11 pratakołaŭ ab administracyjnych pravaparušeńniach składziena ŭ dačynieńni da kiroŭcy, jaki nočču 4 červienia ŭ stanie ałkaholnaha apjanieńnia ŭciakaŭ ad pahoni DAI. Pieraśled vioŭsia ŭ Minsku i za miežami horada.

Jak paviedamili va ŭpraŭleńni Dziaržaŭtainśpiekcyi HUUS Minharvykankama, pieraśled kiroŭcy aŭtamabila «Ford-Sjera», jaki nie padparadkavaŭsia patrabavańniu supracoŭnika DAI ab spynieńni, pačaŭsia na pačatku pieršaj nočy na praśpiekcie Mašerava. Praciahvaŭsia pa vulicach Krapotkina, Arłoŭskaj. Uvieś hety čas inśpiektary patrabavali spynicca. Vyjechaŭšy na płošču Banhałor, vadziciel «Forda» ledź nie sutyknuŭsia ź inšaj mašynaj, paśla čaho na zabaranialny sihnał śviatłafora paviarnuŭ naprava na Bahdanoviča. Na ŭsim učastku pieraśledu ad vulicy Kulman da vulicy Niamihi jon ihnaravaŭ sihnały śviatłaforaŭ i ŭsialak svaimi dziejańniami stvaraŭ realnuju pahrozu žyćciu i zdaroŭju inšych udzielnikaŭ darožnaha ruchu. Pry sprobie paraŭniacca ź im parušalnik naŭmysna išoŭ na taran słužbovaha aŭtamabila.

Učastak vulicy Prytyckaha ad Alšeŭskaha da praśpiekta Puškina «Ford» prajechaŭ pa pałasie sustrečnaha ruchu, vymušajučy inšych udzielnikaŭ spyniacca i manieŭravać, kab paźbiehnuć sutyknieńnia.

Dalej na vysokaj chutkaści (kala 150 km/hadz) ruch ažyćciaŭlaŭsia pa Prytyckaha ŭ napramku MKAD. Na vulicy Prytyckaha była ažyćcioŭlena čarhovaja sproba błakiravać parušalnika słužbovym aŭtamabilem, adnak jon znoŭ pajšoŭ na taran, čym vymusiŭ inśpiektaraŭ rezka źnizić chutkaść.

Vyjechaŭšy za miežy horada, pry adsutnaści na darozie inšych aŭtamabilaŭ, inśpiektar DAI Centralnaha RUUS Minska adkryŭ ahoń. Papieradžalny vystrał byŭ ažyćcioŭleny ŭvierch, nastupnyja try — pa zadnich kołach aŭtamabila, u vyniku jakich abodva koły byli prabityja.

Adnak zatrymać parušalnika ŭdałosia tolki jašče praź niekalki kiłamietraŭ.

U dačynieńni da zatrymanaha było składziena 11 administracyjnych pratakołaŭ, u tym liku za kiravańnie transpartnym srodkam asobaj, jakaja znachodzicca ŭ stanie ałkaholnaha apjanieńnia, za nievykanańnie nieadnarazovych patrabavańniaŭ supracoŭnika milicyi ab spynieńni transpartnaha srodku, za nievykanańnie patrabavańniaŭ sihnałaŭ, ukazańniaŭ śviatłafora abo rehuliroŭščyka, za parušeńnie praviłaŭ abhonu abo vyjezd na pałasu sustrečnaha ruchu ŭ vypadkach, kali heta zabaroniena praviłami darožnaha ruchu, za stvareńnie avaryjnaj situacyi.

• 0
• 0
• 0
• 0
• 0
• 0