Kałanizacyja Marsa pačniecca praz 10 hadoŭ?

Pakul nacyjanalnyja kaśmičnyja ahienctvy pieraličvajuć svaje biudžety i skaračajuć praź niedastatkovaje finansavańnie mnohija prahramy,

za realizacyju daŭniaj mary čałaviectva zavajavać Mars uziałasia inicyjatyŭnaja hrupa, jakaja abjadnała jeŭrapiejskich pradprymalnikaŭ i navukoŭcaŭ.

Prajekt padtrymali najbujniejšyja pryvatnyja kampanii aerakaśmičnaj haliny, u tym liku SpaceX, što niadaŭna zapuściła pieršy pryvatny kaśmičny karabiel da Mižnarodnaj kaśmičnaj stancyi.

Łaŭreat Nobieleŭskaj premii pa fizicy za 1999 hod Hierard Choft — kvantavy tearetyk, viadomy taksama jak adzin z raspracoŭščykaŭ kancepcyi «hałahrafičnaha Suśvietu» — nazvaŭ prajekt «śmiełaj i ŭzrušalnaj inicyjatyvaj ludziej, nadzielenych ujaŭleńniem i pradbačańniem» i pahadziŭsia być hramadskim pasłom MarsOne.

Zhodna z užo raspracavanaj «darožnaj kartaj» marsijanskaja kałonija budzie rehularna pašyracca, papaŭniajučysia čatyrma novymi pasialencami kožnyja dva hady. Prajekt nie praduhledžvaje viartańnia kałanistaŭ na Ziamlu, choć u budučyni — z rostam kałonii i ŭdaskanaleńniem technałohij — mahčymaść čartarnaha złučeńnia z matčynaj płanietaj nie vyklučajecca.

Košt pieršaj stadyi prajekta — pabudovy i zasialeńnia pieršaj marsijanskaj kałonii — hrupa aceńvaje ŭ 6 młrd dalaraŭ.

Arhanizatary ličać, što ideja kałanizacyja Marsa daŭno naśpieła, ale jaje hramadski i ekanamičny patencyjał nie vykarystoŭvajecca, choć hramadski rezanans takoha pačynańnia budzie vielizarnym.

«Kaho moža pakinuć abyjakavym kałanizacyja inšaj płaniety? Chto admovicca nazirać, abmiarkoŭvać ci ŭdzielničać u samym hrandyjoznym pradpryjemstvie čałaviectva?»

Miedyjny składnik sapraŭdy budzie hrać vialikuju rolu ŭ MarsOne: nie tolki adbor i treniroŭka kałanistaŭ, ale i ŭsie nastupnyja stadyi prajekta, uklučajučy žyćcio ŭ kałonii, buduć tranślavacca na Ziamlu ŭ realnym časie.

Z hetaj metaj na soniečnaje i areasinchronnuju arbitu (anałah hieasinchronnaj) miarkujecca zapuścić 2 spadarožniki-retranślatary, jakija zabiaśpiečvajuć kruhłasutačnuju pieradaču dadzienych (za vyklučeńniem adnaho redkaha «ślapoha» akna praciahłaściu ŭ 2 hadziny, kali Sonca budzie znachodzicca pamiž Ziamloj i Marsam, a Mars — pamiž areastacyjanarnym i inšym spadarožnikam). Za ich raspracoŭku i vytvorčaść budzie adkazvać brytanskaja kampanija Surrey Satellite Technology, jakaja maje vopyt u raspracoŭcy telekamunikacyjnych spadarožnikaŭ.

Arhanizatary padkreślivajuć, što dla MarsOne nie spatrebicca raspracoŭvać nijakich pryncypova novych technałohij, bo sučasnaha ŭzroŭniu raźvićcia kasmanaŭtyki i sistem aŭtanomnaha žyćciezabiaśpiečańnia całkam dastatkova dla pabudovy i padtrymki pieršaj zasielenaj kałonii na inšaj płaniecie.

Paspračacca z hetym składana, choć adno vuzkaje miesca ŭ prajekcie ŭsio ž jość: kali prablemu abarony ad kaśmičnaj radyjacyi padčas siamimiesiačnaha palotu da Marsa jašče možna vyrašyć z dapamohaj kapsuły-schovanki, to jak marsijanskija pieršapasialency buduć abaraniacca ad pavyšanaha ŭzroŭniu kaśmičnaj radyjacyi na Marsie, pazbaŭlenym ščylnaj atmaśfiery i mahnitnaha pola, pakul niajasna.

Tamu pieršym kałanistam, jakija źbirajucca žyć na Marsie doŭha (praktyčna ŭsio astatniaje žyćcio) daviadziecca albo zasypać žyłyja moduli marsijanskim hruntam, albo abkładvać ich błokami zamierzłaj vuhlekisłaty i vadzianoha lodu (vada, dakładniej vadarod, taksama maje dobryja achoŭnyja ŭłaścivaści). U hetym vypadku dla

pasielišča nieabchodna zahadzia vybrać miesca, dzie jość pakłady padpavierchnievaha lodu, jaki budzie zabiaśpiečvać kałanistaŭ vadoj, kisłarodam i vuhlakisłym hazam, nieabchodnym dla vyroščvańnia raślin.

Zrazumieła, što pieršaj pieraškodaj, ź jakim sutykniecca MarsOne, — heta startavaje finansavańnie.

Atrymać pačatkovaje ŭstojlivaje finansavańnie, pierakanaŭšy patencyjnych startavych inviestaraŭ ukłaści hrošy ŭ kałanizacyju Marsa, budzie składana, ale heta, ličać aŭtary, tolki pytańnie času.

Klučavyja elemienty ekśpiedycyi — rakietanośbit Falcon 9, jaki vyviedzie na nizkuju ziamnuju arbitu moduli dla zborki kaśmičnaha karabla, u jakim kałanisty palaciać da Marsa, a taksama jaho ruchalnuju ŭstanoŭku i spuskavy marsijanski modul (pavialičanaja viersija karabla Dragon, niadaŭna paśpiachova vyviedzienaha na arbitu i prystykavanaha da MKS) -buduć raspracavanyja kampanijaj SpaceX. Kampanija Thales Alenia Space, što pabudavała niekalki siekcyj MKS, hatovaja skanstrujavać transpartny žyły modul, u jakim buduć žyć astranaŭty padčas pieralotu da Marsa.

Viadomy

arhumient skieptykaŭ, što «palot da Marsa mahčymy, ale niepatrebny», a pieršym marsijanskija kałanistam prosta nie budzie čym zaniacca ŭ kamianistaj pustyni, inicyjatary prajekta ličać vielmi słabym.

Na ich dumku, pieršaje

pasielišča na Marsie stanie epachalnaj i absalutna biesprecedentnaj padziejaj, sapraŭdnym cyvilizacyjnym ryŭkom, psichałahičnyja, maralnyja i fiłasofskija aśpiekty jakoha (nie kažučy ŭžo pra technałahičnyja) tolki treba asensavać, a zvyčajnyja skiepsis i apielacyja da zdarovaha sensu napiaredadni novaha frantyra prosta pierastajuć pracavać — dastatkova ŭspomnić historyju ŭsich pieršaprachodcaŭ.

Niezaležna ad taho, jak aceńvać MarsOne, hety prajekt śviedčyć, što i ŭnutry kaśmičnaj haliny, i siarod zvyčajnych ludziej, skłałasia ŭstojlivaja hrupa entuzijastaŭ i łabistaŭ, jakija ličać marsijanskuju ekśpiedycyju nieabchodnaj, a ich apanienty ŭžo nie ŭ stanie prapanavać raŭnaznačnaj alternatyvy, što zachaplaje ŭjaŭleńnie hetak ža mocna, jak palot na Mars.

• 0
• 0
• 0
• 0
• 0
• 0
• 0
• 0