Žurnalista aštrafavali za pracu na zamiežnaje radyjo

Homielski žurnalist Anatol Hatoŭčyc, karespandent niedziaržaŭnaha infarmahienctva BiełaPAN, pakarany štrafam — 2 bazavyja vieličyni [62 tys. rubloŭ]. Jaho abvinavacili ŭ «niezakonnym ažyćciaŭleńni dziejnaści ŭ intaresach zamiežnych ŚMI». Sudździa vyniesła rašeńnie ciaham 15 chvilin pry adsutnaści publiki, — paviedamlaje słužba manitorynhu BAŽ.

26 sakavika ŭ sudzie Centralnaha rajona Homiela była razhledžana administracyjnaja sprava ŭ dačynieńni žurnalista Anatola Hatoŭčyca. Jaho abvinavačvali ŭ parušeńni praviłaŭ žurnalisckaj dziejnaści ŭ adpaviednaści z artykułam 40 «Zakona ab druku i inšych ŚMI», a taksama Pałažeńnia Savieta ministraŭ ad 1997 hoda ab dziejnaści zamiežnych ŚMI ŭ Respublicy Biełaruś. U pryvatnaści ŭ tym, što žurnalist zapisvaŭ razmovy, nie papiaredžvajučy svaich surazmoŭcaŭ, pradstaŭlaŭsia žurnalistam BiełaPAN, pracujučy pry hetym dla inšych ŚMI.

Razhlad spravy byŭ pryznačany na 15 hadzin. U 15.45 advakata Piatra Barysava, jakomu Anatol Hatoŭčyc davieryŭ pradstaŭlać svaje intaresy ŭ sudzie, vyklikali da sudździ Maryny Damnienka, kab nibyta niešta vyśvietlić. Kali jon ŭvajšoŭ u kabiniet sudździ, jana ab`iaviła, što sudovaje pasiedžańnie raspačataje i nie dazvoliła advakatu paklikać tych, chto pryjšoŭ na sud.

Razhlad spravy praciahvaŭsia 15 chvilin u prysutnaści Piatra Barysava.

Sudździa Maryna Damnienka paśladoŭna adchiliła chadajnictvy advakata ab tym, kab ŭ razhladzie spravy ŭziaŭ udzieł siabra BAŽ z adukacyjaj jurysta Leanid Sudalenka, kab Leanid Sudalenka vystupiŭ u jakaści śviedki. Sudździa dvojčy admoviła, kab u jakaści śviedak u sud byli vyklikanyja słužbovyja asoby, u čyich apytańniach, składzienych supracoŭnikami KDB pa Homielskaj vobłaści śćviardžajecca, što Anatol Hatoŭčyc nie papiaredžvaŭ ich pra zapis razmovy dla publičnaha karystańnia.

Takim čynam, na razhlad spravy nie byli dapuščanyja aktyvisty hramadzianskich arhanizacyj Homiela i vobłaści, a taksama žurnalisty — ŭsiaho likam 21 čałaviek.

Kali advakat vyjšaŭ z kabinieta sudździ i paviedamiŭ pra rašeńnie, jakoje jana pryniała — pakarać Anatola Hatoŭčyca štrafam pamieram u 2 bazavyja vieličyni, prysutnyja byli aburanyja zakrytym sudovym raźbiralnictvam. Ahulnaja dumka: nie pačynali sud tak doŭha, spasyłajučysia na zaniatuju zalu, a paśla ŭsio zrabili tajemna i chutka tamu, što pabačyli jak mnoha ludziej pryjšło.

Advakat paviedamiŭ, što matyvirovačnuju častku rašeńnia sud padrychtuje da 28 sakavika.

Anatol Hatoŭčyc namierany abskardzić pastanovu suda.

• 0
• 0
• 0
• 0
• 0
• 0
• 0
• 0