«Biełaruś — kraina, dzie panuje strach i biaspraŭje»: rodnyja palitviaźniaŭ napisali Łoryn

Svajaki biełaruskich palitviaźniaŭ źviarnulisia z adkrytym listom da pieramožcy konkursu «Jeŭrabačańnie» šviedskaj śpiavački Łoryn ŭ suviazi ź jaje vizitam u Biełaruś i ŭdziełam u fiestyvali «Słavianski bazar» u Viciebsku (12 lipienia).

Aŭtary lista infarmujuć Łoryn ab situacyi z pravami čałavieka ŭ našaj krainie, ab tym, što ŭ biełaruskich turmach znachodziacca ludzi, jakija advažylisia vystupić suprać režymu, što ŭ Biełarusi ŭžyvajucca katavańni i śmiarotnaje pakarańnie.

«My, maci i žonki palitviaźniaŭ, chočam, kab Vy, Łoryn, viedali: Biełaruś — heta kraina, dzie panuje strach i biaspraŭje, niama niezaležnaha suda, dzie ŭžyvajecca śmiarotnaje pakarańnie.

Biełaruś — adzinaja kraina ŭ Jeŭropie, dzie suprać prezidenta i šerahu vysokapastaŭlenych čynoŭnikaŭ uviedzieny sankcyi ES za parušeńnie pravoŭ čałavieka, za falsifikacyju vynikaŭ vybaraŭ, za pieraśled apanientaŭ.

Vaš vystup, darahaja Łoryn, adbudziecca ŭ adzinaj krainie ŭ Jeŭropie, dzie kandydataŭ u prezidenty padčas vybarčaj kampanii źbivajuć, paśla vybaraŭ katujuć u turmie KDB i chavajuć na hady za kraty.

My — svajaki biełaruskich palityčnych źniavolenych, nie možam upłyvać na Vašaje rašeńnie vystupić na adkryćci „Słavianskaha bazaru“. My nie možam pazbavić našych suhramadzian prava atrymać asałodu ad Vašaj muzyki i Vašaha vykanalnickaha talentu. Ale my spadziajemsia, Vy budziecie pamiatać, što hetaje śviata zaŭsiody vykarystoŭvaŭsia uładaj, jak mahutnaja prapahandysckaja nahoda, jak sposab demanstracyi mižnarodnaj padtrymki kirujučamu režymu. Kali łaska, nie dajcie im skarystacca Vašym imiem i prysutnaściu ŭ svaich metach!», — pišuć rodnyja palitviaźniaŭ.

Nahadajem, što Łoryn u Azierbajdžanie sustrakałasia z pravaabaroncami.

List padpisali Maryna Adamovič — žonka kandydata ŭ prezidenty Mikałaja Statkieviča; Ludmiła Mirzajanava — maci byłoha palitviaźnia Fiodara Mirzajanava; Alena Lichavid — maci byłoha palitviaźnia Mikity Lichavida; Maryna Łobava — maci palitviaźnia Eduarda Łobava; Taćciana Sieviaryniec — maci palitviaźnia Paŭła Sieviarynca; Taćciana Franckievič — maci palitviaźnia Alaksandra Franckieviča; Nasta Pałažanka — niaviesta palitviaźnia Źmiciera Daškieviča; Valancina Alinievič — maci palitviaźnia Ihara Alinieviča; Alaksandr Dziadok — baćka palitviaźnia Mikałaja Dziadka; Jula Bandarenka — dačka byłoha palitviaźnia Źmitra Bandarenki.

• 0
• 0
• 0
• 0
• 0
• 0
• 0
• 0