Niabiesny turyzm

Lohkaść, ź jakoj samalot sa šviedskimi lotčykami trapiŭ u nieba našaj krainy i raskidaŭ cacki, ździŭlaje. Skandynavam udałosia zrabić toje, što niedastupna dla bolšaści našych suajčyńnikaŭ — palubavacca krajavidami Biełarusi z vyšyni ptušynaha palotu.

Kolki kaštuje atrymać tyja ž emocyi, što i jany? My abrali čatyry šlachi — paloty na samalocie, viertalocie i pavietranym šary, a taksama skačok z parašuta.

Parašut

U Biełarusi z časoŭ roskvitu Dobraachvotnych tavarystvaŭ udziejańnia armii, avijacyi i fłotu (DTSAAF) zachavałasia 11 aerakłubaŭ. Samym papularnym źjaŭlajecca minski, jaki znachodzicca ŭ Baravoj. Skačok z vyšyni 3 kiłamietraŭ razam ź instruktaram kaštuje 1,2 miljona rubloŭ. Adnak, kab zekanomić, možna pajechać u rehijony. Naprykład, u Viciebsku za taki samy skačok daviadziecca zapłacić 950 tysiač rubloŭ, a ŭ Syčkovie pad Babrujskam — kala 890 tysiač rubloŭ.

Što da samastojnych skačkoŭ, to treba spačatku prajści piacihadzinny instruktaž (kaštuje kala 100 tysiač rubloŭ). Sam palot z vyšyni 900 mietraŭ kaštuje ad 300 da 650 tysiač u zaležnaści ad miesca.

Zrešty, mnohija minskija ekstremały abirajuć tańniejšy varyjant i skačuć z ułasnymi parašutami z dachaŭ minskich vysotak. Jany ličać, što 75-90 mietraŭ — dastatkovaja vyšynia, kab paśpieć adčuć siabie ŭ palocie i ŭ patrebny momant paciahnuć za kołca. Praŭda, za takija niebiaśpiečnyja skački možna atrymać niemały štraf ci navat być aryštavanym.

Viertalot

Tytuniovy mahnat Pavieł Tapuzidzis letaś adkryŭ u Ratamcy na Minskim mory «Robinsan Kłab». Siarod inšych zabavak jon daje mahčymaść pakatacca na viertalotach. Košt palotu składaje kala $500 za hadzinu. Možna abmiežavacca i 15 chvilinami, zapłaciŭšy, adpaviedna, kala $130. Hetyja sumy možna padzialić na troch pasažyraŭ — bolš u viertalot nie ŭlezie.

Jak paviedamili ŭ słužbie prakatu kłuba, maršrut uklučaje ŭ siabie palot nad sanatoryjem «Junactva», viaślarnym kanałam, Zasłaŭjem i inšymi abjektami ŭ zachodnim nakirunku ad Minska.

Maksimalnaja praciahłaść palotu viertalota Robinson R44 składaje 3 hadziny, a krejsierskaja chutkaść dasiahaje 240 km/h.

Samalot

Raniej u Ratamcy na miescy kłuba Tapuzidzisa znachodziłasia «Avijaranča». Paśla niekalkich trahičnych vypadkaŭ jano zakryłasia. Ź niadaŭniaha času «Avijaranča» pracuje kala ahrasiadziby «Zaračany» ŭ Puchavickim rajonie. «Razynka» adpačynku — pavietrany maršrut pa vakolicach — nazyvajecca «Pary nad Zaračanami».

Pavietrany šar

«Padymi mianie pa-nad ziamloju, padymi mianie ŭ śvietły abšar», śpiavaŭ u kancy 1990-ych N.R.M. Ciapier sustreć u niebie śvitanak ci zachod sonca stała našmat praściej. Z pavietranymi šarami ŭ Biełarusi pracuje kampanija «Aeratur Bałuns».

Samaja niedarahaja prapanova ad jaje — tak zvany «pryviazny palot». Pavietrany šar uzdymajecca na vyšyniu da 50 mietraŭ i visić uviersie na praciahu 10 chvilin. Heta kaštuje $30 z kožnaha pasažyra.

Za toje, kab palatać na vyšyni da 1 kiłamietra, daviadziecca zapłacić kala $250 z čałavieka za hadzinu. «Zhodna z tradycyjaj, paśla pieršaha palotu vas čakaje prysvajeńnie hrafskaha tytuła i vydača siertyfikata», — adznačajuć u «Aeratury». Na vyšyni možna zładzić i viasielle. Jano budzie kaštavać pryblizna $500 z čałavieka.

Što da terytoryi palotu, to šar moža ŭźlacieć ź luboj placoŭki płoščaj 50ch50 mietraŭ pry najaŭnaści dazvołu.

• 0
• 0
• 0
• 0
• 0
• 0
• 0
• 0