I prosić paviedamić, "ci raspačata kryminalnaja sprava pa fakcie chałatnaha vykanańnia słužbovych abaviazkaŭ vajennasłužačymi SPA".
Biełaruski Chielsinkski kamitet (BCHK) prosić Hienprakuraturu paviedamić, "ci raspačata kryminalnaja sprava pa fakcie chałatnaha vykanańnia słužbovych abaviazkaŭ vajennasłužačymi SPA, jakija nie zafiksavali fakta parušeńnia dziaržaŭnaj miažy Biełarusi".
Zvarot nakiravany ŭ suviazi sa źniavoleńniem pad vartu žurnalista Antona Surapina. 20-hadovy student Instytuta žurnalistyki BDU pieršym vykłaŭ na svaim sajcie Belarusian News Photos fotazdymki cacačnych miadźviedziaŭ, skinutych 4 lipienia nad Iviancom i Minskam sa šviedskaha samalota, jaki niezakonna pierasiek dziaržaŭnuju miažu. Pavodle słoŭ Antona, fotazdymki jamu byli vysłanyja pa elektronnaj pošcie.
U dačynieńni da Surapina raspačata kryminalnaja sprava. Małady žurnalist abvinavačvajecca ŭ "dapamahańni naŭmysnamu niezakonnamu pierasiačeńniu miažy, učynienamu arhanizavanaj hrupaj asob" (č. 3 art. 371 KK), jamu pahražaje da 7 hadoŭ pazbaŭleńnia voli.
Surapin byŭ zatrymany 13 lipienia i ŭtrymlivajecca ŭ śledčym izalatary KDB.Aficyjnaje abvinavačańnie jamu pavinna być pradjaŭlena da siaredziny dnia 23 lipienia.
Infarmacyja ab tym, ci raspačata kryminalnaja sprava pa fakcie chałatnaha vykanańnia słužbovych abaviazkaŭ vajennasłužačymi SPA, nieabchodna pravaabarončaj arhanizacyi "dla pravilnaj i abjektyŭnaj acenki fakta ŭtrymańnia pad vartaj" Antona Surapina, skazana ŭ zvarocie, tekst jakoha apublikavany na sajcie BCHK (http://belhelcom.org).
Treba adznačyć, što biełaruskija vajennyja i pamiežniki admaŭlali fakt niezakonnaha pierasiačeńnia miažy zamiežnym samalotam, pakul arhanizatary akcyi, supracoŭniki šviedskaj pijar-kampanii Studio Total, nie vykłali ŭ internecie videa, jakoje paćviardžaje jaho.
Historyja z "plušavym desantam" atrymała šyroki hramadski rezanans i dała padstavu sumniavacca ŭ bojehatoŭnaści nie tolki biełaruskich, ale i sajuznych srodkaŭ SPA.
"Usie pytańni, jakija zadaje hramadskaść nakont bojehatoŭnaści sajuznych SPA, absalutna zakanamiernyja", — zajaviŭ 15 lipienia ŭ Viciebsku dziaržsakratar Sajuznaj dziaržavy Biełarusi i Rasii Ryhor Rapota.
Jon nie staŭ kamientavać sam fakt pierasiačeńnia pavietranaj miažy Sajuznaj dziaržavy zamiežnym samalotam, "pakul nie zavieršana rasśledavańnie". Ale padkreśliŭ: "Kali fakt pierasiačeńnia miažy paćvierdzicca, buduć zroblenyja adpaviednyja vysnovy. U luboj spravie byvajuć pamyłki, niedapracoŭki i razhildziajstva".
Ciapier kamisija prezidenta pravodzić pravierku ŭsich złučeńniaŭ i vajskovych čaściej Vajenna-pavietranych sił i vojskaŭ supraćpavietranaj abarony Biełarusi.
Miž tym, 16 lipienia Alaksandr Łukašenka padpisaŭ ukaz № 321 "Ab uznaharodžańni miedalom "Za biezdakornuju słužbu" I, II, III stupieni". U liku ŭznaharodžanych — hrupa pradstaŭnikoŭ vojskaŭ SPA.
Kamientary