Bašarymavu pradjavili abvinavačvańnie, Surapinu — pakul nie. Čakali mišak z fotaaparatam?

23 lipienia skončyŭsia 10-dzionny termin zatrymańnia studenta žurnalistyki BDU Antona Surapina, adnak na volu jon nie vyjšaŭ. Abvinavačvańnie jamu pakul nie pradjaŭlenaje. Z udziełam zatrymanaha žurnalista siońnia pravodzilisia pracesualnyja dziejańni. Jaho pakinuli ŭ turmie dla dalejšaha razhladu. Heta ŭsia infarmacyja, jakuju zmahła paviedamić advakatka Antona Surapina paśla naviedvańnia KDB, infarmuje pres-słužba Biełaruskaj asacyjacyi žurnalistaŭ.

Zatrymany student pieradaŭ pryvitańnie ŭsim, chto jaho padtrymlivaje. Antonu Surapinu viadoma ab tym rezanansie, jaki vyklikaŭ jaho aryšt.

Surapina śpiecsłužbisty zatrymali 13 lipienia. Jon padazrajecca ŭ «dapamahańni niezakonnamu pierasiačeniu miažy Respubliki Biełaruś».

Pa hetaj ža spravie raniej, 6 lipienia, śpiecsłužby zatrymali staličnaha ryełtara Siarhieja Bašarymava. Jak paviedamlaje Charter97.org, 16 lipienia jamu pradjavili abvinavačvańnie pa č. 3 art. 371 KK «Niezakonnaje pierasiačeńnie Dziaržaŭnaj miažy Respubliki Biełaruś».

Paćviardžeńnia infarmacyi pra abvinavačvańnie Bašarymavu z aficyjnych krynic pakul niama.

Arhanizatar palotu miedźviedziroŭščyka švied Kromveł zajaviŭ, što z Bašarymavym kantaktavaŭ tolki ŭ spravie źniaćcia kvatery ŭ Minsku. Nasamreč, Bašarymaŭ zajmaŭsia zdačaj u arendu ŭ tym liku adnoj z kvater nasuprać Administracyi prezidenta. U toj ža čas

Kromveł zajaŭlaŭ, što ŭ Minsku ŭ ich napahatovie byŭ čałaviek, hatovy sfatahrafavać skidańnie miadźviedzikaŭ. Mahčyma, biełaruskija śpiecsłužby miarkujuć, što hetym čałaviekam moh być Bašarymaŭ.

Šviedy, u svaju čarhu, ručajucca, što ažyćciavili svaju akcyju biez padtrymki biełarusaŭ, bo nie chacieli padstaŭlać ich pad udar. Chto afarmlaŭ zaprašeńni dla šviedaŭ, kab jany mahli aformić vizy? Kromveł kaža, što heta było toje samaje ryełtarskaje ahienctva Bašarymava.

Absurdnaści situacyi dadaje toj momant, što biełaruskija ŭłady dahetul nie pryznali faktu skidańnia miadźviedzikaŭ.

Svaim palotam hrupa šviedaŭ chacieła źviarnuć uvahu na parušeńni svabodaŭ čałavieka ŭ Biełarusi. Im heta ŭdałosia. A novyja aryšty ŭ Minsku vykličuć novuju chvalu publikacyj u suśvietnych ŚMI.

Siarhieju Bašarymavu pahražaje surovaje pakarańnie — ad 3 da 7 hadoŭ pazbaŭleńnia voli.

kadebisty dapytali taksama 16-hadovuju dziaŭčynu ź Ivianca Kaciu Skurat. U čym jaje padazrajuć, da kanca nie jasna.

• 0
• 0
• 0
• 0
• 0
• 0
• 0
• 0