Rezka pavialičvajecca dziaržpošlina za atrymańnie i zamienu pravoŭ kiroŭcy
U Biełarusi 9 žniŭnia rezka pavialičvajecca dziaržpošlina za atrymańnie i zamienu pravoŭ kiroŭcy.
U Biełarusi košt pasłuh, što akazvajuć dziaržaŭnyja orhany, u tym liku padraździaleńni DAI (vydača vadzicielskich paśviedčańniaŭ, numarnych znakaŭ i inš.), u asnoŭnym zaležyć ad bazavaj vieličyni. Pamiery dziaržpošlin rehulujucca dvuma dakumientami: Padatkovym kodeksam i ŭkazam prezidenta № 200 «Ab administracyjnych pracedurach, jakija ažyćciaŭlajucca dziaržaŭnymi orhanami i inšymi arhanizacyjami pa zajavach hramadzian».
Novym Padatkovym kodeksam, jaki nabyŭ moc 1 studzienia 2012 hoda, byŭ praduhledžany pamier dziaržpošliny za atrymańnie (zamienu) vadzicielskaha paśviedčańnia ŭ 4 bazavyja vieličyni. «Vidavočna, što hetyja źmianieńni prapracoŭvalisia i byli ŭniesieny jašče letaś, da rašeńnia ab pavyšeńni pamieru bazavaj vieličyni. Jak viadoma, z 1 krasavika 2012 hoda pamier bazavaj vieličyni byŭ ustanoŭleny ŭ 100 tysiač rubloŭ, što pryviało b da apłaty hramadzianami za vadzicielskaje paśviedčańnie ŭ pamiery 400 tysiač rubloŭ», — adznačyli ŭ Ministerstvie ŭnutranych spraŭ.
Z ulikam vyšejskazanaha MUS vyjšła ź inicyjatyvaj u Saviet ministraŭ ab źnižeńni pamieru dziaržpošliny na atrymańnie (zamienu) paśviedčańnia kiroŭcy. Heta prapanova i była realizavana va ŭkazie prezidenta № 197 «Ab uniasieńni dapaŭnieńniaŭ i źmianieńniaŭ va ŭkaz prezidenta Respubliki Biełaruś ad 26 krasavika 2010 h. № 200».
Takim čynam, z 9 žniŭnia dziaržpošlina za atrymańnie (abmien) vadzicielskaha paśviedčańnia składzie 200 tysiač rubloŭ.
Da taho jak ukaz nabyŭ moc, dziaržpošlina za vadzicielskija paśviedčańni składała 0,5 bazavaj vieličyni — 50 tysiač rubloŭ.
Kamientary