«Niechta zachacieŭ pastavić Astapčuk u takuju prynižalnuju situacyju»
Dopinh, jaki znajšli ŭ biełaruski, nie moh palepšyć jaje vynik, adnak i załaty miedal viarnuć nie zmoža.
Kiraŭnik Nacyjanalnaha antydopinhavaha ahienctva Alaksandr Vanchadła kaža Jeŭraradyjo, što jość 21 dzień, kab rasśledavać dopinhavy skandał Nadziei Astapčuk. «21 dzień — heta termin, praź jaki my možam padać u sud. Za hety termin my pavinny pravieści rasśledavańnie».
Sumnieńni ŭ tym, što Astapčuk śviadoma prymała dopinh, maje spartyŭny žurnalist Barys Tasman. Jon havoryć, što, mahčyma, spartsmienku i jaje treniera niechta padstaviŭ i navatadpomściŭ joj: «Dla mianie bolš łahičnaj vyhladaje viersija, što niechta vielmi zachacieŭ pastavić ich u takuju situacyju — skandalnuju i prynižalnuju».
Dopinh u biełarusaŭ znachodzili i raniej. I miedaloŭ pazbaŭlali. Ale vypadak z Astapčuk moža stać siensacyjnym.Sprava ŭ tym, što spartsmienka pierad Alimpijadaj prajšła ź dziasiatak testaŭ. Usie — čystyja. Apošni pierad pajezdkaj u Łondan — 30 lipienia. Daśledavańni ŭ kiolnskaj łabaratoryi ŭ Hiermanii (!) pakazali, što nijakaha dopinhu jana nie ŭžyvała. A pieršy stanoŭčy test byŭ uziaty 5 žniŭnia, pierad spabornictvami. Ale «Prymabałan», jaki znajšli ŭ arhaniźmie Astapčuk, pačynaje dziejničać paśla 2–3 tydniaŭ prymianieńnia, raskazvaje Vanchadła.
«Heta nie toj preparat, jaki prymianiajecca ŭ hetkich vypadkach. Kab jon padziejničaŭ — nieabchodna 2–3 tydni prymać. Tamu sumnieńni. Taki preparat niama sensu prymianiać adzin raz!»
Kamu moža spatrebicca skandał vakoł Nadziei Astapčuk, robicca zrazumiełym, kali ŭzhadać pra zatrymańnie KDB hałoŭnaha treniera nacyjanalnaj kamandy pa lohkaj atletycy Anatola Badujeva,a taksama urača zbornaj Paŭła Drynieŭskaha. Heta adbyłosia ŭ kancy traŭnia. Za niekalki dzion da zatrymańniaŭ u «Presbole» źjaviłasia publikacyja Barysa Tasmana pra tajamničaha «kilera», jaki vymahaje u spartsmienaŭ hrošy ŭzamien za vyrašeńnie prablemy z antydopinhavymi ahienctvami. Maŭlaŭ, častka atletaŭ płaciła, a častka — ŭzbuntavałasia.
Tasman havoryć, što ŭ Fiederacyi lohkaj atletyki paśla Badujeva zastałosia šmat ludziej, jakija mohuć adpomścić.
«Jany ciapier zmahajucca za ŭładu ŭ biełaruskaj lohkaj atletycy, i jany majuć na heta padstavy. Ja nie pakazvaju na ich palcam, maŭlaŭ, voś, heta jany zrabili. Ale, tearetyčna, jany majuć padstavy — ich stanovišča, žyćcio, vierahodna, — źmianilisia ŭ horšy bok».
U Kamitecie dziaržbiaśpieki na zapyt Jeŭraradyjo spravu Badujeva nie kamientujuć. Choć za kratami jon užo dva z pałovaj miesiacy.
Ale nadziei, viarnuć załaty miedal Astapčuk, amal niama.Ekśpierty kažuć, što maksimum, na što moža ciapier raźličvać biełaruskaja spartsmienka — hadavaja dyskvalifikacyja zamiest dvuchhadovaj. Spraviadlivaść možna šukać tolki unutry krainy. Pakul idzie vyśviatleńnie situacyi — kryminalnaja sprava nie uzbudžanaja.
Kamientary