Apakalipsis pačynajecca

Apakaliptyčnaje bačańnie źmienaŭ pryrodnaha asiarodździa pradstaŭlaje dakład navukoŭcaŭ pra vyniki hlabalnaha paciapleńnia.

Drennyja naviny prynieśli ŭ Brusel navukoŭcy ź źviazanaj z AAN Mižuradavaj kamisii pa spravach źmieny klimatu (IPCC), jakaja abjadnoŭvaje bolš za sto dziaržavaŭ. Ź ich dakładu možna daviedacca, čym ciapličny efekt pahražaje pryrodzie i čałavieku.

U najbližejšyja dziesiacihodździ — śćviardžajuć navukoŭcy — najbolš pacierpiać najbiadniejšyja krainy, u asnoŭnym afrykanskija i azijackija. Zhodna z najbolš pesymistyčnym scenaram, da 2050 h. ad 1 młrd. da 3,2 młrd. ludziej buduć pakutvać ad niedachopu vady, a 200‑600 młn. — ad hoładu.

Źniknuć ladovyja šapki Arktyki, Antarktydy, karałavyja ryfy i daždžavyja lasy Amazonki. Sotniam miljonaŭ ludziej, jakija žyvuć u deltach vialikich azijackich rekaŭ, buduć pahražać źniščalnyja patopy. Z‑za razburalnych źjavaŭ nadvorja štohod buduć hinuć niekalki miljonaŭ čałaviek.

Aŭstralija nia budzie ŭ stanie vyroščvać raśliny, prydatnyja dla ježy. Nie abminuć źmieny i Eŭropu. Mižziemnamorskim krainam pahražaje zasucha i zabojčyja chvali śpiakoty, padobnyja da tych, što ŭ 2003 h. stalisia pryčynaj śmierci kala 70 tys. ludziej. Hreki ŭžo biadujuć, jak zabiaśpiečyć turystam vadu na svaich vyspach.

U Alpach budzie začynienaja bolšaść łyžnych kurortaŭ, užo ŭ hetym hodzie tam była prablema ź śnieham. Vody z rastoplenych lednikoŭ pavysiać uzrovień moraŭ, jakija mohuć zatapić miž inšym pomniki daŭniny Aleksandryi albo skarby inkaŭ u nacyjanalnym parku Ŭaskaran u Peru.

— Heta karotki pozirk na apakaliptyčnuju budučyniu, što čakaje Ziamlu — kamentuć dakład pradstaŭniki «Greenpeace». — Urady pavinny terminova adreahavać na hetyja prahnozy — kaža pradstaŭnik ekalahičnaj arhanizacyi WWF.

U historyi suśvietu takija źmieny klimatu ŭžo mieli miesca, adnak jany ciahnulisia vielmi doŭha. Ciapier ža asnoŭnaj pahrozaj jość ich małankavy temp — kamentuje prafesar Halina Lorenc, klimatolah ź Instytutu Metearalohii i Vodnaj Haspadarki ŭ Varšavie. Na jaje dumku, ekasystemy nia buduć mieć času, kab prystasavacca da źmienaŭ. Pavodle dakładu «IPCC», mohuć vymierci cełych 30 adsotkaŭ hatunkaŭ raślinaŭ i žyviołaŭ.

U sakaviku brytanski premjer Toni Błer paraŭnaŭ baraćbu z nastupstvami hlabalnaha paciapleńnia z zmahańniem z fašyzmam i kamunizmam. U Vialikabrytanii da siońniašniaha dnia heta tema numar adzin ŭ palitycy. Brytancy jakraz abmiarkoŭvajuć zakon, što pradpisvaje budučym uradam, pad pahrozaj štrafnych sankcyjaŭ, źnižeńnie emisii vuhlekisłaha hazu na cełych 60 adsotkaŭ da 2050 h.

Praz dva tydni klimatyčnyja źmieny buduć temaj pasiedžańniaŭ Rady Biaśpieki AAN.

Volha Daniševič pavodle gazeta.pl

• 0
• 0
• 0
• 0
• 0
• 0
• 0
• 0