Siońnia matčam u Homieli miž miascovym klubam i navapołackim «Naftanam» pačynajecca 17‑y čempijanat Biełarusi pa futbole.
Ad letašniaha jon mała čym roźnicca. Hałoŭnym favarytam źjaŭlajecca čempijon-2006 barysaŭski BATE. Z kamandy syšli tolki paru asnoŭnych hulcoŭ, i kamanda raźličvaje na ŭčorašnich dubloraŭ. Cikava, što sezłn u jakaści hałoŭnaha trenera pačnie zusim juny dla hetaj prafesii Viktar Hančarenka. Jamu tolki 29 hadoŭ. Reč u tym, što 7 krasavika infarkt zdaryŭsia ŭ nastaŭnika BATE Ihara Kryvušenki, tamu pačatak sezon u jaho pojdzie na papraŭku.
Stabilnaj padavałasia sytuacyja ŭ salihorskim «Šachtary», bronzavym pryzery minułaha čempijanatu. Lidery zastalisia, na niekatoryja pazycyi byli zamacavanyja nabyćciom novych hulcoŭ, ale vyniki čverćfinału ź bieraściejskim «Dynama» naściarožvaje prychilnikaŭ salihorcaŭ. «Šachcior» dvojčy sastupiŭ nia samamu mocnamu supierniku — 1:2 i 1:4.
Nialohkaje mižsezońnie pieražyli mienskija MTZ‑RIPA i «Dynama», čaćviortaja i druhaja kamanda letašniaha pieršynstva. Napiaredadni sezonu ŭ abiedźviuch kamand pamianialisia hałoŭnyja trenery. Pryčyna adstaŭki Eduarda Małafiejeva z pasady «koŭča» MTZ pa‑raniejšamu zastajecca niezrazumiełaj. Miesca Małafiejeva ŭ kamandzie zaniaŭ jahony kolišni vučań, zorka 1980-ch Andrej Zyhmantovič. Hałoŭnaje pytańnie, jak jon zmoža znajści kantakt z novym kalektyvam.
Pryčyna zvalnieńnia z «Dynama» Piatra Kačury bolš zrazumiełaja. Kamanda nie zmahła prabicca ŭ paŭfinał Kubku, razhromna prajhraŭšy doma «Niomanu» — 0:3. Prezydent «Dynama» Jury Čyž nia zvyksia ličyć da dvuch. Adstaŭka pryjšła adrazu paśla taho matču. Kačuru ŭ šturvała «Dynama» zamienić były hulec zbornaj Biełarusi Alaksandar Chackievič. Heta ŭžo 16‑y trener «Dynama» za 7 hadoŭ. Chackievič planuje sumiaščać i trenerskuju pracu i hulniu, jak niekali było ź Jurjem Šukanavym. Pakul nieviadoma ci pahodzicca na heta toj ža Jury Čyž.
Z tych, chto moža ździvić — heta «Daryda» i «Viciebsk». Kamandami kirujuć daśviedčanyja i metanakiravanyja specyjalisty Anatol Bajdačny i Andrej Čarnyšoŭ, tamu hetyja kamandy mohuć realna pazmahacca za traplańnie ŭ trojku pryzeraŭ. Nielha taksama skidvać z rachunkaŭ «Homiel», jaki maje zabiŭny tandem forvardaŭ Strypiejkis — Vasiluk.
Vidavočna, što i baraćba za vyžyvańnie budzie vielmi surjoznaj. Sioleta z čempijanata vybyvaje tolki adna kamanda, na jaje miesca z dyvizijonu 1 prydzie cełych try. Naleta ŭ čempijanacie budzie iznoŭ 16 klubaŭ.
* * *
U pieršym tury buduć hulać (matčy projduć na stadyjonach kamand, jakija paznačanyja pieršyja):
14 krasavika
Homiel — Naftan (tranślacyja na «Ładzie» a 15:55)
15 krasavika
BATE — Nioman
Smurhoni — Miensk
Viciebsk — Dniapro
Dynama (Bieraście) — MTZ‑RIPA
Tarpeda — Dynama (Miensk)
Daryda — Šachtar.
Synoptyki abiacajuć na vychodnyja soniečnaje, małavobłačnaje nadvorje biez apadkaŭ.
Kamientary