Litoŭcy pašyrajuć lustracyju

Litoŭski Sojm pašyryŭ śpis asobaŭ, na jakich z pryčyny ich raniejšaha supracoŭnictva z KHB raspaŭsiudžvajecca zabarona pracy na dziaržaŭnaj słužbie.

Papraŭki ŭ lustracyjny zakon raspaŭsiudžvajucca na byłych rezervistaŭ savieckaha KHB, jakija ŭ bližejšyja dva hady nia zmohuć pracavać miž inšym na pasadach ministraŭ, prakuroraŭ, a taksama ŭ litoŭskaj dyplamatyi i specsłužbach.

Inšaja zabarona, jakaja dziejničaje da 2009 h., tyčyłasia vyklučna kadravych pracaŭnikoŭ KHB z peryjadu, jaki papiaredničaŭ atrymańniu Litvoj niezaležnaści. Zakon, pryniaty ŭ 1999 h., kolki razoŭ krytykavaŭsia Eŭrapiejskim trybunałam pa pravach čałavieka, bo jon zabaraniaje byłym štatnym kehebitsam pracavać taksama i ŭ pryvatnym sektary, miž inšym u firmach achovy, telekamunikacyjnychfirmach, a taksama ŭ bankavaj spravie.

Litoŭcy adkazvali eŭrapiejskim krytykam, što zakryćcio stratehičnych sektaraŭ dla pracaŭnikoŭ savieckaj biaśpieki jość sprobaj praduchilić adnaŭleńnie rasiejskaj ahientury ŭ hetaj krainie. U eŭrapiejski sud trapić, vidać, taksama i ŭčorašniaje dapaŭnieńnie da zakonu, bo šmat chto z rezervistaŭ KHB tłumačyć, što jany anivodnaha dnia nie pracavali na karyść savieckich specsłužbaŭ.

U Savieckim Sajuzie kožny vypusknik vyšejšaj navučalnaj ustanovy aŭtamatyčna pieravodziŭsia ŭ rezerv — u zaležnaści ad atrymanaj specyjalnaści i zdolnaściaŭ jon traplaŭ u mabilizacyjnyja śpisy, naprykład, piachoty ci fłotu. Častka vypusknikoŭ stanaviłasia rezervistami KHB, jakomu panačalvalisia miž inšym vojski pamiežnaj achovy. Na dumku častki prychilnikaŭ litoŭskaha lustracyjnaha zakonu, heta, adnak, amal zaŭsiody było źviazanaje ź ich raniejšym supracoŭnictvam ź biaśpiekaj.

Inicyjatyva dapaŭnieńnia da lustracyjnaha zakonu pachodziła z partyi byłoha prezydenta Rałandasa Paksasa, jaki časta abvinavačvajecca ŭ Litvie ŭ ahienturnych suviaziach z Rasiejaj i z hetaj pryčyny byŭ adchileny ad ułady. Achviaraj pašyranaj lustracyi, kali jana nia budzie apratestavanaja prezydentam, zrobiacca miž inšym były kiraŭnik MZS i były ambasadar Litvy ŭ Polščy Antanas Valonis, a taksama ciapierašni kiraŭnik adździełu dziaržaŭnaj biaśpieki (kontrraźviedki) Arvidas Počus.

Na dumku krytykaŭ pašyranaj lustracyi, jana źjaŭlajecca instrumentam palityčnaj baraćby ŭ Litvie, u jakoj časta vykarystoŭvajucca nie zaŭsiody apraŭdanyja abvinavačvańni ŭ suviaziach z rasiejskaj raźviedkaj. Mnohija deputaty hałasavali za novaje zakanadaŭstva z nadziejaj na adstaŭku kiraŭnika kontrraźviedki, jaki sam šmat razoŭ pieraścierahaŭ pierad suviaziami častki litoŭskaj elity z Maskvoj.

Reč u tym, što choć Počus i publična pierakonvaŭ, što važnyja litoŭskija čynoŭniki pieradavali ŭ Maskvu infarmacyju, źviazanuju miž inšym z pryvatyzacyjaj naftapierahonnaha zavodu Mažejki, dyk paśla jon sam pryznavaŭ, što dla hetaha niama dokazaŭ.

• 0
• 0
• 0
• 0
• 0
• 0
• 0
• 0