Apazicyja nazvała sapraŭdnyja pryčyny raskołu
Na biełaruska-birmanskim kruhłym stale, jaki adbyvajecca ŭ miežach pražskaha Forumu-2000, zajšła havorka pra padzieł u stanie biełaruskaj apazicyi. Nichto nie ŭžyvaŭ słova raskoł, ale antahanizm surazmoŭcaŭ zaŭvažyli navat birmancy.
Maderatar dyskusii — dyrektar biełaruskaj «Svabody» — Alaksandar Łukašuk prapanavaŭ kožnamu adkazać na pytańnie — što raźjadnoŭvaje biełaruskuju apazycyju. Ambicyi, roznyja taktyki, kaštoŭnaści? A moža, heta pradumanaja taktyka?
Namieśnik staršyni Ruchu za Svabodu Aleś Łahviniec kazaŭ, što ŭ pieršuju čarhu apazycyja padzielenaja na prarasiejskuju i prazachodniuju, abjadnańnie adbudziecca tady, kali ŭ hramadztvie naśpieje adpaviednaja patreba.Pavodle palityka i palitolaha, biełarusy nikoli nia mieli takoha ŭzroŭniu dabrabytu, jak pry Łukašenku. Što ŭ pryncypie, biełaruskaje hramadztva nie hatovaje da pieramienaŭ, apazycyja słabaja, a «radykały» vydajuć žadanaje za realnaje.
Były deputat Viarchoŭnaha Savietu 13-ha sklikańnia Ludmiła Hraznova ŭ cełym zhadžałasia z Łahvincom.
Pavodle jaje, apazycyja padzielenaja: 1) na tych, chto pracuje z hramadztvam i 2) na tych, chto zmahajecca z Łukašenkam.Druhuju hrupu Hraznova nazvała radykalnaj. A maŭklivyja akcyi, jakija adbylisia ŭletku 2011 hodu, byli škodnyja, ułady vykarystali ich na svaju karyść. Pavodle jaje, bajkot padryvaje lehitymnaść dziaržaŭnych instytutaŭ i, jak i inšyja radykalnyja dziejańni, hraje na ruku Rasiei. Palityk ličyć, što ŭłada ciapier vymušanaja iści na reformy, Eŭropie treba bolš pracavać z namenklaturaj, a apazycyja pavinna pracavać nad madernizacyjaj systemy.
Tady Alaksandar Łukašuk pierapytaŭsia: «Hetaja madernizacyja pavinna adbyvacca pry Łukašenku ci paśla jaho?» Ludmiła Hraznova: «Nia viedaju».
Były palitviazień Alaksandr Atroščankaŭ z «Eŭrapiejskaj Biełarusi» byŭ kateharyčny ŭ dačynieńni da ŭładaŭ.
Pavodle jaho słovaŭ, u śniežni 2010 hodu režym prajšoŭ «punkt niezvarotu», lubaja imitacyja liberalizacyi budzie znoŭ i znoŭ zakančvacca jašče bolš žorstkimi represijami.Pryčynaj padziełu ŭ apazycyi jon bačyć nie skiravanaść na Zachad ci Rasieju, a staŭleńnie da režymu, nakolki jon refarmavalny. Pavodle Atroščankava, ułady pravodziać žorstkuju liniju represijaŭ, apazycyi miž inšaha treba zmahacca za vyzvaleńnie palitviaźniaŭ, i «lubaja supraca z režymam siońnia jość amaralnaja».
Inšyja ŭdzielniki taksama kazali, što prarasiejskaj apazycyi ŭ Biełarusi praktyčna niama, «za vyklučeńniem marhinalnych hrupaŭ», što Łukašenka straciŭ padtrymku hramadztva, a razam z hetym i lehitymnaść, i lubyja zakliki ŭmacoŭvać jaho instytuty ŭłady «ŭvachodziać u supiarečnaść z pracesami ŭ hramadztvie».
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary