Ceny na kvatery ŭ rehijonach pajšli ŭ hałop

Sioletniaj viasnoj nazirajecca badaj samaja mocnaja chvala padaražańnia kvater na druhasnym rynku Minska, a taksama ŭ abłasnych centrach i navat u nievialikich haradach. Zhodna z infarmacyjaj dyrektara Biełaruskaj asacyjacyi «Nieruchomaść» Mikałaja Prastałupava, heta situacyja nazirajecca zaraz na fonie istotnaha skaračeńnia ahulnaj kolkasci prapanoŭ i časam ažyjatažnaha popytu.

Va ŭsich ahienctvach nieruchomasci stalicy adznačajuć vielmi chutkaje daražańnie ŭsich vidaŭ kvater. Tolki za apošnija 20 dzion adnapakajovyja kvatery padaraželi minimum na 3—6 tysiač dołaraŭ. Zhodna z tablicami statystyki respublikanskaha katałoha, u krasaviku staličnyja kvatery daražejuć z dynamikaj 22—50 dołaraŭ koštu kvadratnaha mietra za tydzień.

Zaraz siaredni košt adnapakajovych kvater u stalicy dasiahnuŭ 67 820 dołaraŭ, a cana kvadratnaha mietra žylla ahulnaj płoščy stała 1979 dołaraŭ. Samyja tannyja, słabieńkija pa płoščy i jakasci małyja kvatery kaštujuć užo 56—57 tysiač dołaraŭ. Košt «kvadrata» ŭ dvuchpakajovaj kvatery staŭ 1750—1800 dołaraŭ, a siaredni košt takoha žylla — 87 500 dołaraŭ. Trochpakajovyja kvatery ŭ Minsku daražejuć z tempam 30—35 dołaraŭ u tydzień za kvadratny mietr. Siaredni košt takich kvater zaraz dasiahnuŭ amal 117 tysiač dołaraŭ, a kvadratny mietr ahulnaj płoščy roŭny 1730 dołaraŭ. Prykmietaj času staličnaha rynku žyllovaj nieruchomasci stała pavieličeńnie prapanovy i popytu pakojaŭ u zvyčajnych kvaterach. Siońnia takija pakojčyki kaštujuć užo sama mieniej 25—26 tysiač dołaraŭ.

Pavodle infarmacyi dyrektara RUP «Dziaržaŭnaje ahienctva nieruchomasci» h. Viciebska Uładzimira Kabanava, za apošnija 3 miesiacy adnapakajovyja kvatery padaraželi na 8—10 tysiač dołaraŭ. Jašče ŭ studzieni staryja «chruščoŭki» ŭ piacipaviarchovych damach kaštavali 18—19 tysiač, a zaraz takoje žyllo prapanujecca za 25—26 tysiač dołaraŭ. Istotna padaraželi kvatery palepšanaj płaniroŭki ŭ adnosna novych dzieviacipaviarchovych damach. Kvatera ahulnaj płoščaj 38 kvadratnych mietraŭ kaštuje zaraz 32—33 tysiačy dołaraŭ. Dvuchpakajovyja kvatery padaraželi jašče macniej. Staryja «chruščoŭki» z 23 tysiač «palacieli» da 33—35 tysiač dołaraŭ, a kvatery palepšanaj płaniroŭki ahulnaj płoščaj 48—50 kvadratnych mietraŭ stali prapanoŭvacca ŭžo za 45 tysiač dołaraŭ. Siońnia ŭ hetym abłasnym centry istotna pamienšyłasia kolkaść nievialikich kvater, jakija prapanujucca na prodaž. Šmat varyjantaŭ pa jakasnych kvaterach uvohule zdymajucca z rekłamy na prodaž. Uładalniki takoha žylla zbirajucca pačakać jašče adnoj chvali padaražańnia.

Razam z tym, zaraz u horadzie i pryharadzie pavialičyŭsia popyt na asobnyja žyłyja damy i katedžy, jakija pačali pradavacca bolš aktyŭna.

U Breście žyllovaja nieruchomaść praciahvaje daražeć, pačynajučy z vosieni minułaha hoda. Z pačatku hoda košt adnapakajovych kvater pavialičyŭsia prykładna na 7—8 tysiač dołaraŭ. Takija kvatery tut kaštujuć sama mieniej 35 tysiač i bolš. Košt kvadratnaha mietra nievialikaha pa płoščy žylla dasiahnuŭ 1000—1100 dołaraŭ. Dvuchpakajovyja kvatery tut kaštujuć ad 42 da 53 tysiač dołaraŭ. Amal bieź vialikich prablem mahčyma adšukać nie vielmi darahija trochpakajovyja kvatery, jakija ŭ starych damach na krajnich pavierchach prapanujucca za 57—58 tysiač dołaraŭ. Zvyčajny košt krychu lepšych trochpakajovak dasiahaje 62—65 tysiač dołaraŭ.

Kiraŭnik dziaržaŭnaha ahienctva pa akazańniu ryełtarskich pasłuh h. Bresta Anton Vajtovič adznačaje, što popyt na maleńkija kvatery ŭ horadzie nad Buham siońnia ažyjatažny. Adnapakajovaja kvatera, pry ŭmovie «čystaha» prodažu pa prymalnaj canie atrymlivaje novaha haspadara ŭžo praź niekalki dzion. Śpiecyjalisty žyllovaj nieruchomasci hetaha abłasnoha centra ličać, što kvatery buduć daražeć navat letam, bo istotna pavialičyŭsia košt budaŭnictva niesacyjalnaha žylla. Budaŭniki kamiercyjnaha žylla prapanujuć siońnia budavać kvatery, dzie kvadratny mietr ahulnaj płoščy budzie kaštavać 850—900 dołaraŭ, adnak «kvadrat» u pabudavanych novabudoŭlach pradajecca zaraz za 1070 dołaraŭ.

Ceny na sacyjalnaje žyllo dla čarhavikoŭ i nadalej buduć kantralavacca dziaržavaj. Hetyja ceny siońnia napałovu nižejšyja za rynkavyja.

• 0
• 0
• 0
• 0
• 0
• 0
• 0
• 0