Barys Harecki: taki kanhres nam nia treba

Pasiadžeńnie sielskaha savieta u lepšyja saŭdepaŭskija časy — heta nahadvała udzielnikam učorašniaja mienskaja kanferencyja delehataŭ kanhresu demakratyčnych siłaŭ Biełarusi. Jak by nie namahalisia arhanizatary, paradak zali padtrymać nie atrymałasia. Mienski minikanhres pieratvaryŭsia ŭ haračyja sprečki j pierakrykvańnie adzin adnaho ŭžo padčas abmierkavańnia arhanizacyjnych pytańniaŭ.

U mienskaj kanferencyi delehataŭ Kanhresu pryniali ŭdzieł 162 delehaty, što skłała 9/10 ad kolkaści ŭniesienych u śpis. Ludzi pačali źbiracca na kanferencyju ŭžo za paŭtary hadziny da jaje pačatku. U zali zajmali miescy babuli j dziaduli stałaha vieku z čyrvonymi ściažkami na hrudzioch. Žyvyja kamunisty! — ździŭlalisia maładafrontaŭcy na vulicy.

Užo za paŭhadziny da pryznačanaha pačatku miescaŭ u zali nie zastałosia. Stajać vymušanyja byli j viadomy historyk Juraś Bačyšča, jakomu za ŭdzieł u vybarčaj kampanii zabaranili vykładać u piedahahičnym universytecie, i chryścijanski dziejač Mikoła Arciuchoŭ, jaki niekalki miesiacaŭ tamu chadziŭ ad dźviary da dźviary źbirajučy podpisy pad manifestam za svabodu, i navat pradstaŭnikam ambasady ZŠA nie znajšłosia miesca.

Paśla abrańnia pracoŭnych orhanaŭ, kanferencyja pierajšła da razhladu klučavoha punkta paviestki dnia — abmierkavańnia patrebnaści albo niepatrebnaści abrańnia adzinaha lidera j šlacha jaho abrańnia. Vystupy raspačaŭ staršynia BNF Vincuk Viačorka, jaki dastatkova zrazumieła davioŭ da ŭdzielnikaŭ pazycyju partyi j zaklikaŭ prychilnikaŭ narodnaha frontu hałasavać za adzinstva na kanhresie.

Paśla Viačorki ŭ boj pajšli «veterany demakratyi». Vystupiŭ pieršy sakratar CK PKB Siarhiej Kalakin, jaki adrazu ž zapatrabavaŭ ad delehataŭ hałasavać suprać abrańnia adzinaha lidera, zastrašyŭšy ŭsich tym, što lideram mohuć abrać jaho samoha! Da pałochajučych słovaŭ Kalakina dałučyŭsia j Labiedźka, jaki navat sfarmulavaŭ lozunh svajho vystupu: «Hałasuj za druhi punkt, albo prajhraješ!».

Apošnim vystupaŭ lider demakratyčnych siłaŭ Alaksandar Milinkievič, jaki adrazu admoviŭsia ad mikrafonu j staŭ havaryć u hołas, što fenamenalnym čynam prymusiła supynić razmovy navat u «čyrvonym» sektary. Milinkievič nahadaŭ prysutnym, što z momantu umoŭnaha abjadnańnia apazycyi ŭ 2001 hodzie demakraty ŭvieś čas šukali persanalnuju alternatyvu Łukašenku. Alaksandar Uładzimiravič zaznačyŭ, što mienavita isnavańnie adzinaha lidera dała demakratam mahčymaść dla udziełu ŭ prezydenckaj kampanii. Padčas luboha abychodu kvateraŭ ci ahitacyi demakratam zaŭždy zadavali pytańnie: «A chto zamiest Łukašenki?» Tamu tolki isnavańnie takoj alternatyvy dała biełarusam mahčymaść dla šerokich pratestnych akcyjaŭ za pieramieny. Ja zaklikaju usich prychilnikaŭ pieramienaŭ hałasavać za abrańnie lidera na kanhresie, navat kali im stanu nie ja, — zajaviŭ Milinkievič.

Napružańnie ŭ zali adčuvałasia ad samaha pačatku pasiedžańnia, ale sapraŭdnaha piekła žarści dasiahnuli padčas druhoha pytańnia — abmierkavańnia prapanavanych na dadatkovaje uviadzieńnie ŭ delehaty Kanhresu siami pradstaŭnikoŭ ad Miensku. Arhkamitet pa praviadzieńni mienskaj kanferencyi papiarednie dasiahnuŭ zhody pamiž partyjami ab vyłučeńni ŭ hety śpis pa adnamu pradstaŭniku ad kožnaj z metaju dalejšaha rejtynhavaha abrańnia siami ź ich tajemnym hałasavańniem. Ale damova pradstaŭnikom partyjaŭ była pierakreślenaja samimi ž partyjcami. Adrazu paśla jaje vyniasieńnia na razhlad namieśnik staršyni AHP Šynkaryk zajaviŭ, što nia zhodzien z prapanavanymi kandydaturami navat ad AHP j prosić dadać da śpisu jašče adnaho siabra svajoj partyi.

Parušać damovu praciahnuła pradstaŭnica partyi žančyn «Nadzieja», jakaja z‑za adsutnaści žančyn u partyi naahuł nie prymała anijakaha ŭdziełu ŭ padrychtoŭcy mienskaj kanferencyi.

Paśla hetaha razraziŭsia škvał roznych prapanovaŭ ad kamunistaŭ i labiedźkaŭcaŭ. Partyjcy pierakrykvali j zatykali rot adzin adnamu, zajaŭlali pra pryncyp i adrazu ž jaho parušali. Pytańnie niekalki razoŭ staviłasia na hałasavańnie, ale z‑za błahanu ŭ zali niemahčyma było nia tolki padličyć hałasy, ale j naahuł zrazumieć, za što prapanujecca hałasavać.

Z hetych kamunistyčna‑ahepešnych debataŭ jaskrava vydzialalisia delehaty Kanhresu ad Maładoha Frontu j Ruchu za Svabodu, jakija spakojna siadzieli i cyvilizavana pa‑eŭrapiejsku ciarpieli hetyja sprečki. Hetyja maładyja chłopcy j dziaŭčaty, darečy, jak i Alaksandar Milinkievič, jaki moŭčki naziraŭ za «pierastrełkaju», naahuł nie mahli zrazumieć, što ŭ demakratyčnym śviadomym lahiery moža być takoje paboišča.

Urešcie rešt namahańniami kamandnaha hołasu siabra BNF Alaksieja Kavalca ŭdałosia sucišyć vykryki ź levaha sektaru, sabrać usie prapanovy j pierajści da hałasavańnia pa abodvuch pytańniach — liderstva u ADS i farmavańnia palitrady, a taksama abrańnia dadatkovych siami delehataŭ Kanhresu.

Padčas pierapynku ludzi padychodzili da Milinieviča j kazali, što nia chočuć bačyć Biełaruś u rukach saŭdepaŭskich kabinetnych zmaharoŭ i, kali b viedali, što da hetaha pryviadzie ich ryzyka na płošč i palityčnyja zvalnieńni, to nikoli b na heta nie pajšli. Ale hetyja maładyja ludzi byli salidarnyja ŭ adnym — treba samim być mocnym rucham i nie zvažajučy na sproby kamunistaŭ viarnucca da minułaha iści napierad i być ruchavikom pieramienaŭ.

Barys Harecki — adzin z abvinavačanych pa spravie «Maładoha Frontu»

• 0
• 0
• 0
• 0
• 0
• 0
• 0
• 0