№ 2 (159), 10 — 17 studzienia 2000 h.
Džaz, perfomans, kamuflaž — supervobraz, supernaš!
5 studzienia z šaści viečara da 12 nočy ŭ šklanym korpusie staroha mienskaha aeraportu prachodziŭ pieršy tur akcyi «Supervobraz XXI — Huk, Koler, Forma»
Było šmat čaho: paet Jury Humianiuk pad huki flejty čytaŭ vieršy, litkrytyk H.Kiślicyna ci nie ad chvalavańnia havaryła sa sceny pa-rasiejsku, Teatar Psychičnaj Nieŭraŭnavažanaści pakazaŭ perfomans «Marmurovyja pseŭdaaniołki» (hałoŭny psychična niaŭstojlivy Hallaš Sin pry kancy dziejstva raźbivaŭ antykvarny prajhravalnik z kružełkaj i skidaŭ jaho ledź nie na hałovy hledačoŭ — ale, dziakuj Bohu, abyšłosia biez achviaraŭ); Anochina jhrała na cymbałach, Klaščoŭ — na saksafonie, a hrupa «Dyližans» — džaz; čytaŭ sa sceny svaje vieršy Alhierd Bacharevič, kolišni praletar-traktarazavodziec z rok-kamandy «Pravakacyja»; byli reprezentavanyja architekturnyja, muzyčnyja i televizijnyja prajekty. Ale, badaj, samym hałoŭnym perfom-prajektam akcyi byli milicyjanty. Badaj, ich było nia mieniej, čym hledačoŭ i ŭdzielnikaŭ mierapryjemstva. Jany byli ŭsiudy: siarod cyvilnych, pierad scenami i za scenami, pa perymetry i pasiaredzinie. Jany demanstravali nam Huk svaich racyjaŭ, Koler piarestych bušłataŭ, Formy knyrskich fihur. Stvarać supervobraz XXI stahodździa im dapamahali pažarnyja načalniki, kabieta ŭ biełym chałacie z bedžam, persanał aeraportu, cyvilnaja achova mierapryjemstva i dźvie-try hrupy padazrona adnamiernych mužyčkoŭ u adnatonnych kaściumčykach. A voś abiacanych u zaprašalniku piva-čypsaŭ nie było. Padduryli. Dziela hetaj «zasady» zaŭvažanaja na akcyi reinkarnacyja Lolika Uškina biehała pić piva ŭ kramu, a Hallaš Sin pranios biełuju, razbaŭlenuju hradusam džynu. Ale j biaź piva publika intensyŭna spustašała vitrynu baru, pahłynajučy bułki, kieksy, piražki, piečyva, zapivajučy ŭsio heta minerałkaj dy kołaj. Vidać, u XXI stahodździ supervobrazam Biełarusi budzie zastavacca žarlivy rasiejskamoŭny plebiej i mient z humaj.
Słavamir Adamovič
Konkurs «Supervobraz XXI stahodździa» ładzili Sajuz piśmieńnikaŭ, Biełdziaržuniversytet i reklamnaje ahienctva Sašy Varłamava. Žury konkursu ŭ halinie litaratury ačolvała Volha Ipatava. Jana prysudziła pieršyja premii prazaikam Iharu Sidaruku i Lavonu Vaško, eseistu Jurasiu Barysieviču, paetam Jurju Humieniuku, Alhierdu Bachareviču i Valžynie Mort, a taksama Teatru Psychičnaje Nieŭraŭnavažanaści — za perfomans na temu baraćby z abortami, u jakim Hallaš Sin rabiŭ nielehalny sparon mumii.
Ciapier čytajuć
Aryštavany 75‑hadovy Źmicier Sańko — vieteran-vydaviec3
Kamientary