Kalidor padślednaha (Pavał Baradzin choča prakłaści praź Biełaruś novuju tranzytnuju mahistral)

Jury Śvirko

Kalidor padślednaha

Pavał Baradzin choča prakłaści praź Biełaruś novuju tranzytnuju mahistral

Užyvanyja (abo, jak kažuć rasiejcy, “b/u”) kiraŭniki prezydenckich spravaŭ pamianialisia rolami. Miascovy zaŭhas Ivan Ciciankoŭ pajechaŭ rabić hrošy ŭ Maskvie, a jahony rasiejski kaleha pa ščaści Pavał Baradzin, jaki staŭ dziaržaŭnym sakratarom pakul fantomnaje sajuznaje dziaržavy Biełarusi dy Rasiei, usio bolš pryhladajecca da Miensku.

“U sioletnim biudžecie Sajuzu z 2 miljardaŭ 230 miljonaŭ rasiejskich rubloŭ tolki 2% pojduć na patreby niepasredna čynoŭnaha aparatu”, — paskardziŭsia biełaruskim žurnalistam u Maskvie spadar Baradzin, jakoha taki stan rečaŭ vidavočna nie zadavalniaje. Kab padpravić svajo finansavaje stanovišča, jon choča prakłaści praź Biełaruś novy tranzytny kalidor.

“Transpartny kalidor, za jaki mianie šmat krytykujuć i jaki mnohim zdajecca fantastyčnym, — nie maja asabistaja ideja, mnie jaje prapanujuć suśvietna viadomyja firmy, jakija dobra praličyli ŭsiu vyhadu prajektu”, — zaznačyŭ sp.Baradzin, na aryšt jakoha jašče ŭ studzieni 2000 hodu byŭ vydadzieny order ženeŭskaje prakuratury.

“Order vydaŭ śledčy sudździa Daniel Devo. My abvinavačvajem Baradzina ŭ admyvańni hrošaj tut u Ženevie, a nie ŭ karupcyi ŭ Rasiei”, — raspavioŭ mnie Bernar Bertusa, hieneralny prakuror švajcarskaha kantonu Ženeva.

Pavodle jahonych słovaŭ, švajcarskija firmy “Mabetex” i “Mercata”, što zajmalisia rekanstrukcyjaj Kramla za panavańnia tam Barysa Jelcyna dy jahonaha zaŭhasa Paŭła Baradzina, pieradali roznym rasiejskim čynoŭnikam vielmi vialikija sumy tak zvanych kamisijnych.

“Pra Baradzina my viedajem vielmi šmat. Jon atrymaŭ nadta vialikija sumy hrošaj”, — zajaviŭ spadar Bertusa j dadaŭ: “Ahulnaja suma zamarožanych srodkaŭ pa spravach firmaŭ “Mabetex” i “Mercata” składaje 65 miljonaŭ dalaraŭ, ale ja nie mahu ŭ intaresach śledztva skazać, jakaja častka hetaje sumy naležyć Paŭłu Baradzinu”.

Adnak ahienctva “Ju.S.Ńjus” atrymała źviestki, što na ženeŭskich bankaŭskich rachunkach, jakija kantralavalisia spadarom Baradzinym, zamarožanyja 11 miljonaŭ dalaraŭ. Cikava, što sajuzny dziaržsakratar abiacaŭ padać na prakuraturu Ženevy ŭ sud za paklop, ale potym pra jahonuju pozvu nichto ničoha nia čuŭ. Nijakaje aficyjnaje reakcyi nie było j na červieńskaje interviju Bernara Bertusy, nadrukavanaje ŭ hazecie “Narodnaja vola”, dzie jon raspavioŭ pra kryminalnuju spravu suprać hałoŭnaha čynoŭnika sajuznaje dziaržavy.

Ciapier ža spadar Baradzin pakryŭdziŭsia na rasiejskija telekanały za paviedamleńni pra finansavańnie im jelcynskaje “siamji” dy znoŭ abiacaje: “Ja budu sudzicca nakont hetaha z NTV dy RTR. Ja nie kašalok Siamji, ja da Siamji adnosinaŭ nia mieŭ, u mianie jość tolki svaja siamja. Ja pryjšoŭ u Kreml u 93-m, tut byli brud i smurod, a siońniašniuju pryhažość vy možacie bačyć sami. I ŭ sajuznaj dziaržavie my pačniem takuju ž budoŭlu”.

Budoŭla, vidać, budzie nie adna, choć navat ministar transpartu Biełarusi Alaksandar Łukašoŭ skazaŭ na presavaj kanferencyi, što nia viedaje, dzie adšukać na budaŭnictva prapanavanaha kramloŭskim letucieńnikam transpartnaha kalidoru takija vializnyja hrošy, a havorka viadziecca pra miljardy dalaraŭ.

Pavał Baradzin padzialiŭsia jašče adnym prajektam stahodździa – pieravodam sajuznaha parlamentu ŭ Pieciarburh. “Nakont budaŭnictva parlamenckaha centru ŭ Sankt-Pieciarburhu na mianie vyjšła duža bujnaja ryełtarskaja kampanija z hadavym abarotam 24 miljardy dalaraŭ i hadavym prybytkam 1 miljard dalaraŭ”, — skazaŭ jon. Ale ŭ Miensku Alaksandar Łukašenka, adkazvajučy na majo pytańnie, jakija vybary ŭ Biełarusi buduć nastupnymi – prezydenckija ci ŭ sajuzny parlament, — zajaviŭ, što mienavita prezydenckija. Značyć, sajuznaha parlamentu nia budzie prynamsi jašče hod, choć najbolš vierahodna, što jaho nia budzie nikoli.

Ženeŭskaja ž prakuratura hatovaja raśśledavać spravu byłoha pamahataha Barysa Jelcyna choć dva hady. “Ale kali być aptymistam, dyk nam zusim nie daviadziecca zajmacca spravaj sp.Baradzina. Kali jon budzie asudžany ŭ Rasiei, nam nia treba budzie rabić hetaha ŭ Švajcaryi”, — skazaŭ hieneralny prakuror Bernar Bertusa. Ja spytaŭ jaho taksama, ci ličyć jon ciapierašniaha dziaržsakratara biełaruska-rasiejskaje sajuznaje dziaržavy mižnarodnym čynoŭnikam z adpaviednym statusam. “Mianie heta nie chvaluje. Jon nia maje tut nijakaha imunitetu. Heta mieła b značeńnie, kali b jon mieŭ taki imunitet u Švajcaryi, ale tut inšy vypadak”, — adkazaŭ spadar Bertusa. Pavodle jahonych słovaŭ, order na aryšt moža dziejničać tolki na terytoryi Švajcaryi, a moža i ŭva ŭsioj Eŭropie, i ŭva ŭsim śviecie. Kali sudździa vydaje taki order, jon nie raskryvaje jahonaha typu.

Cikavymi padajucca nastupnyja słovy hałoŭnaha ženeŭskaha prakurora: “Śledztva jašče poŭnaściu nia skončana, bo sprava maje zamiežnyja adhalinavańni. Ja nie mahu zaraz skazać, jakija jašče krainy ŭciahnutyja ŭ hetuju spravu, bo pakul my nia majem usich dakumentaŭ”. Mahčyma, i Biełaruś užo trapiła ŭ sietki kramloŭskich restaŭrataraŭ. Tut ja maju na ŭvazie tolki byłyja spravy Paŭła Baradzina. Bo ŭ novych jahonych prajektach Biełaruś pakul jašče fihuruje.

Prajekt transpartnaha kalidoru budzie abmiarkoŭvacca 14 listapada na pasiedžańni sajuznaha vykankamu ŭ Maskvie. Ci budzie hetaja data potym adznačacca jak “dzień Baradzina”? Chto viedaje... Mabyć, adznačać hety dzień potym buduć i ŭ zamiežnych prakuraturach – u novych kryminalnych spravach.