Naviny za tydzień
Čyhira znoŭ sudziać
Novy “praces Čyhira” pačaŭsia 21 traŭnia ŭ sudzie Frunzenskaha rajonu Miensku. Viadzie jaho sudździa Natalla Varenik. Ciapier kolišniaha premjer-ministra vinavaciać u słužbovaj niadbajnaści na pasadzie staršyni Biełahraprambanku. Jon nibyta zaklučyŭ z českaj i kanadzkaj budaŭničymi firmami kantrakt, što naniesła dziaržavie ŭron bolš jak na miljon dalaraŭ. Vinavaciać jaho i va ŭtojvańni dachodaŭ padčas pracy kiraŭnikom pradstaŭnictva kancernu “Hieja” ŭ Maskvie. Eks-premjer abvinavačańni adkidaje. Nastupnaje pasiadžeńnie sudu adbudziecca 27 traŭnia.
Kredytaŭ pamienieje
Eŭrapiejski bank rekanstrukcyi i raźvićcia skaračaje svaju dziejnaść u Biełarusi, bo ŭ krainie nie adbyvajucca palityčnyja i ekanamičnyja reformy. EBRR zachavaje svoj nievialiki partfel pazyk i budzie padtrymlivać nievialikija pryvatnyja kampanii, ale zablakuje lubyja vialikija pazyki ci investycyi ŭ ekanomiku krainy. Pačynajučy z 1991 h. bank vydatkavaŭ Biełarusi kredytaŭ na ahulnuju sumu 200 młn., tady jak krainy Ŭschodniaj Eŭropy i byłoha SSSR atrymali ad jaho dapamohi na 10 młrd. eŭra.
Meraŭ nam nie vybirać
Pałata pradstaŭnikoŭ razhladaje prajekt reformy miascovaha samakiravańnia. U chodzie jaje dziaržaŭnaja ŭłada budzie decentralizavacca. Miascovyja saviety atrymajuć častku funkcyj centru, systema miascovaha samakiravańnia vyłučycca sa struktury dziaržaŭnaha kiravańnia i h.d. Adnak prajekt nie praduhledžvaje pryncypu vybarnaści kiraŭnikoŭ miascovaj ułady, źmiaščaje pałažeńnie ab stvareńni dziaržaŭnaha kaardynacyjnaha orhanu, adkaznaha za miascovaje samakiravańnie, i nie daje rehijonam ekanamičnaj samastojnaści. Tamu niezaležnyja eksperty aceńvajuć jaho krytyčna.
Zajavy Sojmu KCHP BNF
19 traŭnia ŭ Miensku adbyŭsia čarhovy Sojm Kanservatyŭna-chryścijanskaj partyi BNF. Jon pryniaŭ dźvie zajavy. U pieršaj rašuča asudžajecca stvareńnie chołdynhu na bazie litaraturna-mastackich vydańniaŭ i arhanizacyjnyja źmieny ŭ ich. Śćviardžajecca, što heta źniščeńnie apošnich asiarodkaŭ nacyjanalnaj kultury, nastup na biełaruskaje słova i jahonych nośbitaŭ. Aŭtary zajavy zaklikajuć biełaruskaje hramadztva bajkatavać “rasiejskamoŭnuju makulaturu i antybiełaruskija vydańni, što vykarystoŭvajuć našu movu”, a vydaŭcoŭ, redaktaraŭ i aŭtaraŭ — bolš pierakładać tvoraŭ zamiežnaj litaratury. Druhaja zajava pryśviečanaja pryvatyzacyi biełaruskich pradpryjemstvaŭ, što razhladajecca jak čarhovy etap aneksii Biełarusi Rasiejaj. Siabry KCHP źviartajucca da narodu z zaklikam baranić biełaruskuju majomaść i nacyjanalnyja kaštoŭnaści, zaklikajuć mižnarodnuju supolnaść źviarnuć uvahu na parušeńnie pravoŭ biełaruskaha narodu i bačać vyjście z sytuacyi ŭ novych prezydenckich vybarach pad mižnarodnym pratektaratam.
Maskva daje jarłyk
U interviju hazecie “Dień” namieśnik kiraŭnika frakcyi “Adzinstva” ŭ Dziarždumie Rasiei Franc Klincevič zajaviŭ, što mahčymaje padaŭžeńnie terminaŭ paŭnamoctvaŭ Alaksandra Łukašenki nia vykliča ŭ aficyjnaj Rasiei nehatyŭnych emocyjaŭ.
451 pa Suvoravu
U rasiejskich vajskovych vučelniach ciapier muštrujuć až 451 biełaruskaha vajskoŭca. Ź ich 126 aficeraŭ (u tym liku 14 — u Akademii Hienštabu) i 325 kursantaŭ. U 2002 h. z rasiejskich akademij u Biełaruś viernucca 63 aficery (ź ich 9 — z Akademii Hienštabu).
Uł.inf. i pavodle BiełaPAN
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty49
Kamientary