Iranski psycholah Mahdzi Ameli abiacaje za paŭhodu navučyć luboha ruchać pradmiety pozirkam.
| Mahdzi Ameli FOTA ANDREJA LANKIEVIČA |
Paźniej u Iranie mnie daviałosia sutyknucca ź jašče bolšymi štukarstvami. Na aŭhanskaj miažy, u Charasanie, mianie znajomili ź śviatarami, što mahli pozirkam ruchać ciažkija šafy j kufry. Ale heta što, kazali jany, voś u Kumie žyvie ajatałah, jaki padčas malitvy ŭzdymajecca ŭ pavietra na svaim malitoŭnym kabercy. Na žal, ja tak i nia vybraŭsia ŭ Kum papytać u jaho parady na žyćcio.
U čas znachodžańnia sp.Mahdzi ŭ redakcyi «NN» žurnalisty dakumentalna zafiksavali jaho niezvyčajnyja zdolnaści. Doktar taksama adkazaŭ na pytańni.
«NN»: Jak Vy nazyvajecie hety fenomen?
Mahdzi Ameli: Siła kancentracyi ŭvahi.
«NN»: Usie ludzi zdatnyja na hetkaje?
M.A: Kožny čałaviek maje try asnoŭnyja vymiareńni. Pieršaje jaho vymiareńnie — cieła. Druhoje — duša, duch. Treciaje — jahonyja zdolnaści, bahaćcie, zakładzienaje ŭ nas Usiavyšnim. Siońniašni čałaviek dasiahnuŭ prahresu ŭ pieršym i druhim vymiareńniach, ale ŭ trecim vymiareńni značnych i hetak patrebnych krokaŭ nia zroblena. Tamu siońniašni śviet nia moža dać čałavieku adčuvańnia sapraŭdnaha ščaścia. Daje bieźlič raznastajnych asałodaŭ, ale asałoda — heta zusim nia ščaście. Siońniašni śviet zdajecca mnie vialikaj viaźnicaj. Jana śvietłaja i pryvabnaja znadvorku, ale ŭsiaredzinie — ciemra. Ludzi źjaŭlajucca viancom Boskaha tvareńnia. Ale hetyja samyja vysakarodnyja istoty pastajanna źniavolenyja niejkimi drobnymi turbotami. Čakajučy skonu, jany zaniatyja paŭtoram adnaho j taho samaha z pakaleńnia ŭ pakaleńnie.
Kožny čałaviek moža raźvić siłu kancentracyi ŭvahi. Hospad zakłaŭ u nas mnostva nievymierna bolš mahutnych zdolnaściaŭ, ale tolki toj, chto spaznaje j raskryje ich u sabie, zmoža imi skarystacca.
«NN»: Jak raskryć hetyja zdolnaści?
M.A: Heta niaciažka. Toje, što vy sfatahrafavali, — ništo, ja mahu šmat bolšaje, ale ciapier ja zmučany darohami.
Ja hatovy dapamahčy ŭsim achvotnym raskryć svaje zdolnaści. Kali biełaruskija ŭłady daduć mnie mahčymaść žyć u vašaj krainie, ja zaprašu ŭsich achvotnych vučycca. Uźnimać nievialikija kavałki papiery možna navučycca prykładna za paŭhodu.
«NN»: Hetyja zdolnaści majuć niejkaje dačynieńnie da «daskanałaści» duchu?
M.A: Nie. Hetkaja praktyka spryjaje duchoŭnamu rostu, ale zusim nie pakazvaje na ŭzvyšanaść ci daskanałaść niečaha duchu. Heta mohuć rabić i złačyncy. Z relihijaj taksama prostaj suviazi niama — rabić takoje moža musulmanin, chryścijanin, ateist. Ale zdolnaść hetaja zakładziena ŭ nas Boham.
«NN»: Jakim čynam, na Vašu dumku, čałaviek maje ruchacca da daskanałaści?
M.A: Najvyšejšaja mudraść palahaje ŭ tym, kab spaznać siabie. Navat spaznańnie Boha biez spaznańnia siabie — marnaść. Padmurkam budynku samaspaznańnia jość rozdum. Ja maju na ŭvazie razvažańnie nad adpaviednaj «syravinaj», pieradusim nad saboj, jakoje viadzie da spaznańnia. Spaznańnia, što naradžaje j pieścić u čałavieku luboŭ. Luboŭ, jakaja pryvodzić čałavieka ŭ ruch. Ruch jak Raźvićcio, što viadzie da daskanałaści.
Hutaryŭ Siarhiej Rak
Prakamentavać ubačanaje my paprasili biełaruskaha fizyka Ihara Mikłaševiča.
«NN»: Jakim terminam možna nazvać hetuju źjavu — ruchańnie pradmietaŭ pozirkam? Ci była jana kali zaśviedčanaja navukova?
Ihar Mikłaševič: Takaja źjava zaviecca telekinez, i navukova jana nikoli nie była zaśviedčanaja. Telekinez nibyta naziraŭsia, ale — «u chatnich umovach». Kali ž navukoŭcy stavili hety eksperyment zhodna z usimi praviłami, zaŭsiody vyjaŭlali niejkuju chibu, falšavańnie, niezaŭvažnaje ŭ zvyčajnych umovach. Najčaściej heta prosta krucielstva — «sprytnaść ruk». Padkładajuć mahnity i h.d. Naahuł, nivodzin surjozny navukoviec u isnavańnie hetaj źjavy nia vieryć.
«NN»: Ci možna vytłumačyć telekinez z punktu hledžańnia navuki?
I.M.: My nia možam navukova abhruntavać telekinez. Sproby znajści krynicu jaho, biezumoŭna, byli, ale heta — sproby rastłumačyć nienavukovyja vyniki (bo karektna pastaŭlenych paśpiachovych eksperymentaŭ nie było) z navukovaha punktu hledžańnia.
Vam varta prapanavać čałavieku, jaki zajaŭlaje, što jon vałodaje takimi zdolnaściami, paŭtaryć usio ŭ niejkim navukovym asiarodku. Apošnim časam u hramadztvie źjaviłasia mnostva šarłatanaŭ z fenamenalnymi zdolnaściami. Treba adrazu zaprašać takich ludziej zaśviedčyć svoj dar u navukovych umovach.
My prapanavali doktaru Ameli paŭtaryć eksperyment u navukovych umovach. Jon zhadziŭsia: «Padčas nastupnaha pryjezdu ŭ Miensk hetaj viasnoj».
Siarhiej Radštejn
Ciapier čytajuć
Vynieśli prysud Palinie Zyl — błohiercy, jakaja stała nulavym pacyjentam spravy Hajuna, bo ŭ jaje znajšli tuju samuju spasyłku ad Matolki15
Kamientary