Źmieny buduć

Kreml uzmacniaje psychalahičny cisk na Łukašenku. Upieršyniu ŭ historyi adbylisia kansultacyi ŭpłyvatvorčych asiarodkaŭ Rasiei ź biełaruskimi pravymi partyjami. Umovaju ŭdziełu było niecytavańnie źmiestu razmovaŭ.

Biełaruski śpis udzielnikaŭ «kruhłaha stała» «Ŭnutrypalityčnaja sytuacyja ŭ Rasiei j Biełarusi. Raźvićcio rasiejska-biełaruskich adnosinaŭ na šlachu zbližeńnia z Eŭropaj», arhanizavanaha Radaj pa zamiežnaj i abaronnaj palitycy (RZAP) Rasiei, krasamoŭny: Alaksandar Dabravolski, Jury Chadyka, Vincuk Viačorka, Piatro Sadoŭski, Halina Siamdzianava, Vacłaŭ Areška, Leanid Zaika, Valer Karbalevič, Pavał Danejka, Valancin Hołubieŭ i Jarasłaŭ Ramančuk. Biełaruskija partyi sami vyznačali, kaho vypravić u Maskvu.

Z rasiejskaha boku prysutničali kiraŭnik RZAP palitolah Siarhiej Karahanaŭ, prezydent fondu «Palityka» Viačasłaŭ Nikanaŭ, dyrektar Rasiejskaha instytutu stratehičnych daśledavańniaŭ Jaŭhien Kažokin, kaardynatar mižfrakcyjnaha deputackaha abjadnańnia Dziarždumy «Eŭrapiejski klub» Uładzimier Kopcieŭ-Dvornikaŭ, siabar praŭleńnia «Itery» Viačasłaŭ Nazaraŭ, supracoŭnik referentury prezydenta Rasiei Stanisłaŭ Ismahiłaŭ, kiraŭnik adździełu analityčnaj dyrekcyi rasiejskaha «Pieršaha kanału» dy inš.

Niahledziačy na pačatkovuju napružanaść z abodvuch bakoŭ, razmova, sa słovaŭ adnaho z udzielnikaŭ, była «taktoŭnaja». Pradstaŭniki BNF uvohule ŭpieršyniu ŭ historyi sustrakalisia z rasiejskaj palityčnaj elitaj. Temy razmovy: mahčymy referendum ab praciahu paŭnamoctvaŭ Łukašenki, prablemy pryvatyzacyi, sajuznych damovaŭ, uviadzieńnia ŭ Biełarusi rasiejskaha rubla, eŭrapiejskija perspektyvy Rasiei j Biełarusi.

Pazycyja pradstaŭnikoŭ Biełarusi była adnaznačnaja ŭ pytańniach niezaležnaści krainy i ŭ tym, što «sajuznyja pahadnieńni nia majuć pad saboj lehitymnaj bazy», adznačyŭ V.Viačorka. Bolš padrabiazna vykazanyja za kruhłym stałom dumki baki damovilisia nie cytavać.

Pavodle słovaŭ Vacłava Areški, adkaznaha ŭ BNF za PR-kampanii, fakt sustrečy — heta «praryŭ abodvuch bakoŭ va ŭsprymańni adzin adnaho. Rasiejskaja elita pabačyła ŭ biełaruskich palitykach nacyjanalnaha kirunku siłu, jakaja budzie ŭpłyvać na sytuacyju ŭ krainie paśla źmienaŭ. A toje, što źmieny buduć, rasiejskimi palitykami nia stavicca pad sumnieŭ».

Praviedzienuju sustreču možna razhladać jak «psychalahičny cisk» rasiejcaŭ na Łukašenku. Na dumku palitolaha Valera Karbaleviča, «Kreml sprabuje šukać u Biełarusi alternatyŭnyja palityčnyja siły i nia choča składać usie jajki ŭ adzin košyk. Heta, mahčyma, i sposab cisku na Łukašenku, kab atrymać ad jaho sastupki ŭ pytańniach z rasiejskim rublom i pryvatyzacyjaj «Biełtranshazu».

U takim razie heta taksama pryznańnie abmiežavanaści mahčymaściaŭ Maskvy ŭpłyvać na Łukašenku. Maskva pierastaje rabić vyhlad, niby «biełaruskaje pytańnie» možna vyrašyć pa-muraŭjoŭsku. Demakratyčnaja ž apazycyja pierastaje dziejničać tak, niby Maskva nijak nie ŭpłyvaje na biełaruski palityčny praces.

AłŠ, MB

• 0
• 0
• 0
• 0
• 0
• 0
• 0
• 0