Chronika represij i supracivu

9 červienia sudździa Kastryčnickaha rajonu Miensku Iryna Baśko pryhavaryła Aksanu Novikavu da 2,5 hadoŭ abmiežavańnia voli za «paklop u adnosinach da prezydenta Respubliki Biełarusi». Pryčyna — ulotki, jakija Novikava raspaŭsiudžvała ŭ tuneli stancyi «Miensk-Pasažyrski». Tam viałosia pra datyčnaść vyšejšych słužbovych asobaŭ da źniknieńnia ludziej u Biełarusi. Svajoj viny Novikava nie pryznaje: «usie fakty, vykładzienyja ŭ maich ulotkach adpaviadajuć sapraŭdnaści, bo byli apublikavanyja i nikoli nikim nie byli abvierhnutyja». Vyklikać na prośbu Novikavaj u jakaści śviedkaŭ Łukašenku, Šejmana, Sivakova, Navumava sud admoviŭsia. Spadarynia Aksana haduje trochhadovuju dačku, jakuju nia maje z kim pakinuć. Kaža, što voźmie z saboju na «chimiju».

25 traŭnia ŭ Lidzie adnaho z «zubroŭcaŭ» zatrymali padčas rasklejki ŭlotak ź lahatypam «Zubra». Druhoha «zubroŭca» zatrymali na miescy vučoby — u škole №14. 2 červienia ŭ Miensku zatrymali aktyvista «Zubra» Alaksieja Laŭkoviča. Supracoŭniki Zavodzkaha RUUS zabrali jaho z pracoŭnaha miesca na zavodzie MAZ. Paśla dopytu pa spravie, što tyčyłasia nadpisaŭ «Svabodu Maryniču!», jaho adpuścili. 3 červienia ministar infarmacyi padpisaŭ zahad ab prypynieńni na try miesiacy vychadu niedziaržaŭnaha vydańnia «Rabočaja solidarnosť» na padstavie adsutnaści ŭ redakcyi jurydyčnaha adrasu. Hałoŭny redaktar «RS» Mikoła Hałko skiravaŭ Uładzimieru Rusakieviču list z prośbaj pierahladzieć rašeńnie. 6 červienia ŭ centry Miensku byli zatrymany žurnalisty zdymačnaj hrupy rasiejskaj telekampanii «Ren-TV», jakija brali interviju ŭ dvuch siabroŭ moładzievaha ruchu «Zubr» — Kaciaryny Klimko i Maksima Hromava, suprać jakich byli zaviedzieny kryminalnyja spravy za palityčnyja hrafici «Svabodu Maryniču!». Razam ź imi byŭ zatrymany jašče adzin aktyvist «Zubra» — Jaŭhien Afnahiel. Žurnalistaŭ i «zubroŭcaŭ» zatrymali supracoŭniki AMAPu ŭ cyvilnym, zajaviŭšy, što zdymać u centry Miensku možna tolki z dazvołu Słužby biaśpieki prezydenta. 7 červienia sud Pieršamajskaha rajonu Miensku (sudździa Ananič) adchiliŭ pazoŭ staršyni BCHK Taciany Proćki i jaje muža Dźmitryja Kozyra da Nacyjanalnaj teleradyjokampanii i teležurnalista Ju.Prakopava. Prakuror Biarozaŭskaha rajonu Miečysłaŭ Kuryłovič adkazaŭ na zapyt Jurasia Hubareviča, deputata Biełaazierskaha harsavietu, što dla praviadzieńnia sustrečaŭ z vybarščykami deputaty pavinny brać dazvoł u vykanaŭčaj ułady. Rašeńnie rajonnaha prakurora deputat źbirajecca abskardzić u abłasnoj prakuratury, bo ličyć, što parušajecca Zakon «Ab statusie deputata». Dniom raniej kala Domu ŭradu zatrymali siabraŭ «Maładoha frontu», jakija razdavali deputatam zvarot haładoŭščykaŭ: Źmitra Daškieviča, Mikitu Krasnova, Nastu Azarku, Alaksieja Zavidava, Paŭła Fihiryna, Siarhieja Šynkieviča i Anatola Fiodarava.

Siarhiej Budkin

• 0
• 0
• 0
• 0
• 0
• 0
• 0
• 0