Alaksiej Janukievič:

Adzin z nas

«NN»: Ja dumała, z Vašaju specyjalnaściu ekanamista-mižnarodnika tut rabić niama čaho.

AJA: Z majho kursu šmat ludziej źjechała. Ale ja dla siabie nia baču mahčymaści realizacyi za miažoju. Kali žyvieš tut, maješ mahčymaść udzielničać u hramadzka-palityčnych pracesach. A heta najpieršaja sfera žyćcia, jakaja mianie cikavić i ŭ jakoj ja chaču realizavacca. Tam možna bahaciej žyć, bolš mahčymaściaŭ dla volnaha času i vandrovak, ale dla maje pracy tut zastavacca cikaviej.

«NN»: Heta vialikaje pytańnie — pra samarealizacyju ŭ palitycy. Šmat chto z palitykaŭ tut kanservujecca, jak ahurok u dobraj haspadyni.

AJA: Ja hetaha nie bajusia, chacia kanservacyja sapraŭdy adbyvajecca. My mahli b zajmacca siońnia pytańniami zusim inšaha ŭzroŭniu, čym zajmajemsia. Pad lažačy kamień ža vada nie ciače. Niekamu ž treba pracavać tut.

«NN»: A heta nie zaciataść? KKDz Vašych dziejańniaŭ sapraŭdy taki, što treba varočać hetyja zaržaviełyja padvažniki? Z kožnym dniom usio bolš sumnievaŭ. Razumny čałaviek musić sumniavacca pry marnaj pracy.

AJA: A ja pierakanany, što nia tolki naša pakaleńnie, ale j starejšyja buduć žyć pry inšym sacyjalna-ekanamičnym ładzie. Treba rychtavać źmieny. Navat siońnia, pry ciapierašnim režymie kiravańnia krainaj, možna rabić šmat-šmat dobraha.

«NN»: Ja ŭčora chadziła na apytańnie pa roznych rajonach Miensku — demakratyčnych, bahiemnych, čynoŭnickich — i ŭsiudy zadavała pytańnie: ci źbirajucca ludzi brać udzieł u vybarach u PP NS. Nichto nia vieryć u metazhodnaść udziełu, małaja častka źbirajecca. Daviarajuć tolki tym deputatam, jakija byli dyrektarami pradpryjemstvaŭ dy saŭhasaŭ i «zdoleli palepšyć jakaść pradukcyi». Vas nie zasmučajuć vyniki?

AJA: Sam chadžu pa kvaterach i sutykajusia z takimi ž dumkami: nichto nia vieryć, što niejki čałaviek patrapić štości źmianić. Ludzi pierakananyja, što kandydaty pieraśledujuć pryvatnyja mety. Časta ŭ ich havoryć zdarovy rozum. Niejki kandydat abiacaŭ niešta zrabić, prajšoŭ — i nie zrabiŭ. Ź ludźmi ŭsio narmalna, nia ŭsio narmalna z palitykami. Heta zasmučaje, ale našmat lahčej pamianiać palitykaŭ, čym źmianić hramadztva.

«NN»: A čym ža Vy prymusicie vybarcaŭ vieryć — paśla tych havarunoŭ?

AJA: Adzin sa słohanaŭ majoj dziejnaści zastajecca: «Ja naradziŭsia tut, i ja budu žyć tut». Jon padabajecca ludziam niezaležna ad sacyjalnych i ŭzrostavych katehoryjaŭ. Pryvabnaść ža maja jak palityka j kandydata najpierš u tym, što ludzi mohuć mianie ŭbačyć na parozie svajoj kvatery, pahladzieć mnie ŭ vočy i pierakanacca, što ja nie chłušu, bo ja sapraŭdy nie chłušu. Ja nie abiacaju im, a pytajusia: jakija ŭ vas prablemy. Ja nie abiacaju vyrašyć usie hetyja prablemy, ale kažu, što nikudy nia źniknu z vašych arbitaŭ, budu žyć tut i pracavać tut dziela vas. Pastarajusia prablemy vyrašyć. A pakolki ja małady, vieru ŭ siabie, maju zdaroŭje, siły, enerhiju j dobruju adukacyju, sa mnoj kamanda ludziej, jakija šmat na što zdolnyja…

«NN»: A kali Vas spytajuć, što Vy zrabili sa svajoj adukacyjaj?

AJA: Kali niejkaja partyja abo struktura znachodzicca ŭ apazycyi, jana niepaźbiežna sutykajecca z pytańniem: «A što vy zrabili?» I ŭ Brytanii, i ŭ Biełarusi apazycyjnaja partyja nia moža skazać, što zrabiła šmat, ale moža pakazać prahramu j bačańnie, jak kraina pavinna raźvivacca. I my spadziajomsia, što ludzi padtrymajuć nas.

«NN»: U Vašaj partyi vialiki admoŭny rejtynh. Vy ščyra kažacie vybarcam, ad jakoj Vy partyi, albo mieciacie lisinym chvastom, jak heta byvała ź niekatorymi kandydatami na minułych vybarach?

AJA: Užo treciaj frazaj ja havaru, ź jakoj ja partyi, i, kali baču, što mianie nie zrazumieli, ja paŭtaraju. Być u Partyi BNF było j zaŭsiody budzie honaram dla mianie. Byvaje, što ludzi adkazvajuć: «My BNF nie padtrymlivajem», — ale paśla razmovy kažuć: «My budziem za Vas hałasavać, vy nam padychodzicie». Heta pytańnie narmalnaje razmovy ź ludźmi. Uziać starych ludziej. Im nia stolki treba padvyšeńnie pensijaŭ (jany sami tak kažyuć), kolki pavaha da ich, ichnaha dośviedu i pracy. Im pieradusim patrebnaja ŭvaha.

«NN»: Narod nie durny j nia chvory?

AJA: Zusim nie durny. Chvareje chiba na adčužanaść. Ale j heta nie chvaroba, a biada. Kali ludziam dać perspektyvu, hety momant paddajecca vylačeńniu. My ŭsie suajčyńniki. My adzin narod.

Poŭnaściu hety artykuł možna pračytać u papiarovaj i pdf-versii "Našaj Nivy"

Hutaryła Śviatłana Kurs

*

Alaksiej Janukievič, 28 hadoŭ, naradziŭsia i žyvie ŭ mienskaj Čyžoŭcy. U 1998 skončyŭ fakultet mižnarodnych ekanamičnych adnosinaŭ BDEU pa specyjalnaści ekanamist-menedžer. Ihraje na bajanie, udarnych, hitary. Umieje słuchać muzyku nie jak fon. Lubić histaryčnuju j memuarnuju litaraturu. Adnak asnoŭny zaniatak i vybar — palityka.

• 0
• 0
• 0
• 0
• 0
• 0