Chronika

Ofis likvidavanaha HA «Hramadzianskija inicyjatyvy» (Homiel) 24 žniŭnia ahledzieli supracoŭniki abłasnoj padatkovaj słužby j Upravy finansavych raśśledavańniaŭ KDK, kab daviedacca, što znachodzicca ŭ budynku. 25 žniŭnia Viarchoŭny sud paćvierdziŭ rašeńni nižejšych sudoŭ pra nierehistracyju HA «Hramadzianskaja alternatyva» (Homiel): maŭlaŭ, statut arhanizacyi ŭ siami punktach «nie adpaviadaje zakanadaŭstvu», choć statut toj pierapisany słova ŭ słova z zarehistravanaha statutu BRSM. Nie zarehistravanyja inicyjatyŭnyja hrupy Valerja Ščukina, Uładzimiera Viareniča, Uładzimiera Łapceviča. 25 žniŭnia kamisija ŭ spravach niepaŭnaletnich vyniesła papiaredžańni j pastaviła na ŭlik Alaksandra Małčanava j Ivana Šutko, zatrymanych i źbitych AMAPam na akcyi 21 lipienia. Pracoŭnaj hrupie pa advolnych zatrymańniach Kamisii AAN pa pravach čałavieka 25 žniŭnia admovili ŭ naviedańni źniavolenaha Michaiła Maryniča. 26 žniŭnia ŭtrymańnie Maryniča pad vartaj padoŭžyli jašče na miesiac i vyłučyli novaje abvinavačańnie — nibyta kradziež majomaści HA «Dziełavaja inicyjatyva», jakoje jon i ŭznačalvaŭ. Alaksandru Papkovu i Alaksandru Budahoŭskamu, siabram inicyjatyŭnaj hrupy Siarhieja Sałaša (PBNF, Barysaŭ), 26 žniŭnia telefanavali nieviadomyja j patrabavali vyjści z hrupy. Valer Levanieŭski 25 žniŭnia spyniŭ haładoŭku, a 26-ha pačaŭsia sudovy praces nad im i Alaksandram Vasiljevym za abrazu prezydenta. Viarchoŭny sud 26 žniŭnia nie admianiŭ papiaredžańnia AHP za ŭdzieł u kaalicyi «5+» i akcyi «Łancuh nieabyjakavych čytačoŭ», a 27 žniŭnia — BSDH. Na baćku i syna Marozavych, siabroŭ inicyjatyŭnaj hrupy čalca AHP Anatola Rubanava (Babrujsk), 26 žniŭnia napali dva chulihany ŭ maskach; adzin z napadnikaŭ byŭ zatrymany i, sa słovaŭ Marozavych, pryznaŭsia, što jaho naniaŭ deputat PPNS pa hetaj akruzie Hłuchoŭski. U Rečycy 26 žniŭnia ŭzbrojenyja supracoŭniki milicyi abšukali siabroŭ inicyjatyŭnaj hrupy Leanida Nievara, staršyniu RHA «Perspektyva» Anatola Šumčanku i namieśnika staršyni RHA «Biełaruski Chielsynski kamitet» Hary Pahaniajłu, a taksama praviali pieratrus Nievaravaj chaty. Kancert «Rok paśla vakacyjaŭ» u klubie «Blindaž» 27 žniŭnia byŭ zabaronieny ŭładami. 27 žniŭnia pretendentu ŭ kandydaty ŭ deputaty Źmitru Barodku (Barysaŭ) u pašpartnym stale zajavili, što atrymali ad KDB instrukcyju «pakul prytrymać» stanoŭčaje rašeńnie pra piačatku z dazvołam na vyjezd u inšyja krainy. Ministar infarmacyi Ŭładzimier Rusakievič 27 žniŭnia prypyniŭ na try miesiacy vychad hazety «Navinki»: vydańniu zakidajuć poźniaje paviedamleńnie pra źmienu jurydyčnaha adrasu, niapoŭnyja vychodnyja źviestki, niedasyłku «kantrolnych» numaroŭ hazety ŭ dziaržorhany. 27 žniŭnia Vušacki rajsud nie zadavoliŭ skarhi aktyvista PBNF Źmitra Sałaŭjova na admovu rajvykankamu dać dazvoł na pieradvybarny mitynh. 28 žniŭnia ŭ Šarkaŭščynie byŭ zatrymany aktyvist AHP Valer Karaloŭ, jaki raspaŭsiudžvaŭ ulotki «Piaciorki-plus» i niezaležnuju presu. Staršyniu viciebskaj abłasnoj arhanizacyi AHP Hienadzia Anańjeva zatrymali 29 žniŭnia na kirmašy ŭ Voršy, dzie jon biaspłatna razdavaŭ hazetu «Vriemia». 30 žniŭnia pretendent u kandydaty Jarasłaŭ Biernikovič (PBNF, Hłybokaje) atrymaŭ papiaredžańnie ad vybarčaj kamisii za vykarystańnie asabistych srodkaŭ dla ahitacyi za kandydata. 30 žniŭnia ŭ Žłobinskim rajsudzie pačaŭsia praces nad aktyvistam AHP Uładzimieram Kacoram, jakoha vinavaciać u dziejnaści ad imia niezarehistravanaj arhanizacyi.

AŠ

• 0
• 0
• 0
• 0
• 0
• 0
• 0
• 0