Paśla davoli chałodnaha pryjomu ŭ Rasiei prezydent Venesueły Uha Čaves, u kampanii svaich syna, dački i ŭnukaŭ, prybyŭ u Miensk. Jon sustreŭsia z Alaksandram Łukašenkam, razam jany kpili z Złučanych Štataŭ.
Pohlady Biełarusi i Vieniesueły na ciapierašniaje śvietaŭładkavańnie i pazicyi ŭ mižnarodnych arhanizacyjach absalutna identyčnyja. Pra heta zajaviŭ Alaksandr Łukašenka, adkryvajučy 29 červienia sustreču z prezidentam Vieniesueły Uha Čaviesam u pašyranym farmacie. «Heta — nadziejnaja asnova dla supracoŭnictva i padtrymki na mižnarodnaj arenie», — skazaŭ prezident Biełarusi.
Pavodle jaho słoŭ, Biełaruś i Vieniesueła ŭžo raspačali realizacyju sumiesnych prajektaŭ. «Užo siońnia jość kankretnyja vyniki ŭ halinie zdabyčy nafty, pastavak u Vieniesuełu kalijnych uhnajeńniaŭ, samazvałaŭ, traktaroŭ, — skazaŭ A.Łukašenka. — Ažyćciaŭlajucca prajekty ŭ halinie sielskaj haspadarki, architektury, pramysłovaści, siejsmatechniki».
Pry hetym prezident asabliva padkreśliŭ, što takija vyniki dasiahnuty ŭsiaho za adzin hod. «Ale siońnia jość nieabchodnaść abmierkavać šerah pytańniaŭ biełaruska-vieniesuelskaha supracoŭnictva, tamu što naš patencyjał značna bolšy i vyšejšy», — ličyć biełaruski prezident.
U svaju čarhu Uha Čavies zajaviŭ: «Jość mała narodaŭ, na jakija tak mocna ciśnie impieryja, jak na Biełaruś. Biełaruś adčuvaje mocnyja pahrozy z boku impieryi, i ŭ hetaj baraćbie my — braty».
U.Čavies adznačyŭ, što hałoŭnaja meta jaho vizitu — nieabchodnaść nadać novy impuls adnosinam. «Treba pieraadoleć šmat pieraškod, asabliva z-za tych sił, jakija suprać nas. Impieryja, jakaja nas nazvała dyktatarami, sama sprabuje ŭstanavić suśvietnuju dyktaturu», — padkreśliŭ prezident.
Pavodle słoŭ U.Čaviesa, Biełaruś i Vieniesueła buduć i nadalej raźvivać usie zapłanavanyja prajekty. «Kali my za hod stolki zrabili, to kolki my zrobim za tyja 20 hadoŭ, jakija nam jašče zastavacca va ŭładzie!» — zajaviŭ U.Čavies. Łukašenka adreahavaŭ na heta: “Nie pužaj amerykancaŭ”.
Vizit delehacyi Vieniesueły zaviaršajecca ranicaj 30 červienia.
Fota Julii Daraškievič
Fotarepartaž z prybyćcia Uha Čavesa ŭ Miensk
Kamientary