Патокі нелегальных мігрантаў зь Беларусі «дасягнулі гістарычнага максымуму», як заявіла прэм’ер-міністарка Літвы Інгрыдэ Шыманіце ў Вене на сустрэчы з канцлерам Аўстрыі Себасьцьянам Курцам. Па словах Шыманіце, рэжым у Беларусі паабяцаў напоўніць Эўропу нелегаламі, бо 26 траўня ў беларускіх праўладных тэлеграм-каналах апублікавалі паведамленьне з рэакцыяй Лукашэнкі на санкцыі краінаў Захаду: «Мы спынялі наркотыкі і мігрантаў — цяпер будзеце самі іх есьці і лавіць».
Раней пра інтэнсіўны паток нелегальных мігрантаў зь Беларусі заяўлялі міністарка ўнутраных спраў Літвы Агне Білатайце і прэзыдэнт краіны Гітанас Наўседа.
На сустрэчы ў Вене Шыманіце заклікала да ўвядзеньня ЭЗ чацьвёртага пакету санкцый і без прамаруджаньня — пятага. Себасьцьян Курц падтрымаў заклікі Шыманіце.
