Па дапамогу ў міліцыю звярнулася жыхарка Гродна, якая страціла амаль 127 тысяч рублёў. Такую суму ў яе выдурыла «брокер адной з анлайн-платформаў біржавых таргоў», паведамляе міліцыя.
Гісторыя пачалася з аб'явы аб «дзяржаўнай праграме па павышэнні дабрабыту беларусаў». Жанчына ўбачыла яе ў Instagram. Пакінула заяўку, зарэгістравалася, перавяла $100 першапачатковага капіталу, і ўжо праз некалькі хвілін ёй патэлефанавала «брокер Аляксандра».
Пасля кожную раніцу дзяўчына паведамляла наваспечанаму «трэйдару» аб паспяховых здзелках, прасіла папаўняць рахунак. Усе налічэнні адбіваліся ў балансе.
Калі грошы скончыліся, беларуска брала крэдыты ў банку, абрасла даўгамі. Аднак абнаявіць рахунак не атрымалася: прадстаўнікі платформы на любых падставах угаворвалі яе не сыходзіць з біржы. «Аляксандра» нават прасіла яе прадаць кватэру. У выніку кампанія паставіла ўльтыматум: унесці чарговы плацеж або рахунак будзе ануляваны. Пасля гэтага жанчына напісала заяву ў міліцыю.
Распачалі крымінальную справу аб махлярстве ў асабліва буйным памеры.
Каментары