Як 21-гадовага хлопца за каментары адправілі ў калонію на 6 гадоў
21-гадовага гродзенца Аляксея Багдзея за каментары ў тэлеграме асудзілі на 6 гадоў калоніі ўзмоцненага рэжыму. Раней КДБ унёс хлопца ў спіс асобаў, датычных да тэрарыстычнай дзейнасці — за заклікі звергнуць тыранію.
Аляксей Багдзей нарадзіўся і жыў у Гродне. Па словах яго сваякоў, вучыўся добра.
«Узяўшы яго атэстат у рукі, пыталі: што ж ён у вас з гэткімі адзнакамі і тут сядзіць», — кажуць яны пра поспехі Аляксея.
Аляксей скончыў музычную школу па класе домры, добра спяваў. Быў прызёрам музычных конкурсаў.
Вучыўся Аляксей у гродзенскай школе №12. Архіў сайта навучальнай установы мае колькі допісаў пра школьнае жыццё Багдзея. 11 «Б» клас, дзе ён вучыўся, напрыклад, у 2018 годзе названы «самым разумным». Яго вучні ўдзельнічалі ў тэлевізійнай гульні-конкурсе «Самы разумны клас» і перамаглі. У паведамленні пра тое напісана: «Багдзей Аляксей атрымаў сертыфікат на падвышаную стыпендыю». Таксама яму выказаная падзяка за ўдзел у валанцёрскім школьным руху.
Пасля хлопец паступіў у Гродзенскі дзяржаўны ўніверсітэт імя Янкі Купалы, на факультэт матэматыкі і інфарматыкі. У яго сацсетках пазначана, што ён пры гэтым працаваў барменам у забаўляльным цэнтры «Галактыка».
Падставай для крымінальнага пераследу хлопца і суворага судовага выраку сталі яго допісы ў тэлеграм-каналах. Паводле праваабаронцаў «Вясны», у матэрыялах справы адзначана, што Аляксей Багдзей у жніўні 2020 года ў тэлеграм-канале «Гродна для жыцця» размяшчаў тэкставыя паведамленні з заклікамі да гвалтоўных дзеянняў. Таксама ў іх гаварылася пра выраб кактэйляў «Молатава», звяржэнне дзейнай улады, ужыванне гвалту, блакаванне праездаў, аказанне супраціву прадстаўнікам улады.
Асудзілі Аляксея Багдзея яшчэ на пачатку ліпеня. Суд Ленінскага раёна Гродна прызнаў хлопца вінаватым у падрыхтоўцы да арганізацыі масавых беспарадкаў (артыкул 293 КК) і адправіў на 6 гадоў у калонію ўзмоцненага рэжыму.
4 жніўня ў Гродзенскім абласным судзе яго апеляцыйную скаргу пакінулі без задавальнення і прысуд раённага суду набыў моц.
Родныя асуджанага некалькі разоў бачыліся з Аляксеем у следчым ізалятары. На пытанне пра яго эмацыйны стан адказваюць, што трымаецца і намагаецца зжыцца з тымі ўмовамі, у якіх апынуўся. На спатканнях гаварыў пра свае мары і затрыманне.
Каментары