Калега памерлага выкладчыка Шчукіна: Яго кінула жонка з дзецьмі, пачалася дэпрэсія. У выніку звольнілі за прагулы
29 мая стала вядома, што ў дворыку БНТУ пры спробе затрымання памёр выкладчык — экс-загадчык кафедры вышэйшай матэматыкі факультэта інфармацыйных тэхналогій і робататэхнікі. Ва ўніверсітэце сказалі, што прычынай смерці 47-гадовага Міхаіла Шчукіна стаў сардэчны прыступ. Праўда, у афіцыйным каментары сталічнай міліцыі факт смерці, як і яе прычыны, зусім апускаюцца.
«Наша Ніва» пагутарыла пра сітуацыю з выкладчыкам БНТУ. Ён не верыць у версію пра раптоўны сардэчны прыступ, які здарыўся сам па сабе, і схіляецца да таго, што прычынай смерці Міхаіла Шчукіна былі дзеянні міліцыянераў.
Ён пераказаў, што зараз абмяркоўваюць ва ўніверсітэце.
Міхаіл Шчукін скончыў механіка-матэматычны факультэт Беларускага дзяржаўнага ўніверсітэта. Выкладаць пачаў з 2003 года, з 2014-га працаваў на кафедры вышэйшай матэматыкі, быў яе загадчыкам. Меў больш за 30 друкаваных навуковых і навучальна-метадычныя прац, адказваў за арганізацыю навукова-даследчай працы са студэнтамі. Таксама ён прапаноўваў свае паслугі ў якасці рэпетытара — яго сярэдні рэйтынг на прафесійным сайце — 4,69 па пяцібальнай шкале. Мужчына быў жанаты, меў дваіх дзяцей.
Як сцвярджае суразмоўца, Шчукін трапіў на факультэт без пропуску і планаваў паразмаўляць з кіраўніцтвам.
«Ён хацеў, каб яго зноў узялі на працу. Не ўяўляў сябе без БНТУ. Гэта быў круты матэматык, вядомы ў вузкіх колах. Але да яго ніхто не выходзіў — і пасля закруціўся канфлікт».
Гэта пацвярджае версію міліцыі пра «незаконнае траплянне Шчукіна на тэрыторыю ўніверсітэта і канфлікт з адміністрацыяй», але зняпраўджвае чуткі пра тое, што сілавікі хацелі затрымаць экс-выкладчыка па падазрэнні ў дамагальніцтвах.
Яшчэ ў красавіку, згодна з сайтам БНТУ, прозвішча Шчукіна было ў раскладзе пасяджэнняў кафедры, што сведчыць пра тое, што звольнілі яго зусім нядаўна.
У неафіцыйным канале сілавікоў таксама сцвярджалася, што «выкладчык быў звольнены па заканчэнні тэрміну кантракту, паколькі ў апошні час паводзіў сябе неадэкватна ў дачыненні да студэнтаў і работнікаў, чапляўся да маладзенькіх студэнтак». Наша крыніца кажа, што мужчыну звольнілі найперш за прагулы.
«Ад яго жонка сышла і з'ехала з дзецьмі, у яго была дэпрэсія. Ён стаў злы, шукаў там нейкую студэнтку — ці то гатаваць, ці што яму. Магу сказаць дакладна, што за заляцанні да студэнтак у БНТУ не звальняюць: там такога шмат. Шчукіну відавочна была патрэбная псіхалагічная дапамога, але звольнілі яго за прагулы. Не за тое, што ён студэнткам пісаў».
Суразмоўца сцвярджае, што паміж Міхаілам Шчукіным і міліцыянтамі пры затрыманні сапраўды здарылася бойка, якую прадстаўнік МУС у афіцыйным каментары падаў толькі з аднаго ракурсу: «пры затрыманні мінчук нанёс некалькі ўдараў супрацоўніку міліцыі».
«Ён камусьці з іх [міліцыянераў] умазаў, ну і яго [Шчукіна] цюкнулі», — расказвае выкладчык БНТУ версію, якая гуляе па ўніверсітэце.
Пры гэтым сцвярджае, што смерць Шчукіна была гвалтоўнай, і ў гэтым можа быць прычына недагаворванняў з боку міліцыі: «Ніякі гэта не сардэчны прыступ».
Нягледзячы на тое, што здарэнне ў БНТУ адбылося яшчэ 28 мая, афіцыйныя каментары з нагоды з’явіліся толькі на наступныя суткі, і тое няпоўныя.
Чытайце таксама: Пяць пытанняў, якія застаюцца пасля смерці экс-выкладчыка БНТУ Шчукіна, што ўцякаў ад міліцыі
Па стане на 29 мая таксама была актуальная старонка з інфармацыяй пра Міхаіла Шчукіна як супрацоўніка БНТУ на афіцыйным сайце. Яна знікла толькі пасля ўвагі да гісторыі з боку медыя.
Цяпер чытаюць
Што вядома пра экс-афіцэра Службы бяспекі Лукашэнкі Андрэя Спасава, якога пасадзілі за палітыку1
Каментары