Была калісьці лаўра
Гаротны стан Куцеінскага манастыра стаў тэмай Першых Куцеінскіх чытаньняў у Воршы. Заснаваны ў 1623 г. праваслаўны манастыр пэўны час меў высокі статус лаўры. На пачатку 1990-х адрэстаўраваная за дзяржаўны кошт мураваная Сьвятадухаўская царква была перададзена адноўленаму манастыру. Аднак у двух былых яго будынках разам з насельнікамі працягваў жыць дзясятак сем’яў. І цяпер у манастыры жывуць дзьве сям’і. Распрацаваны праект рэстаўрацыі і рэканструкцыі кельляў. Але фінансаваньня які ўжо год няма. Сьвятадухаўская царква, выдатны помнік архітэктуры віленскага барока, выклікае ў некаторых царкоўнікаў адмоўныя эмоцыі — быццам бы яна мае ўніяцкі выгляд. Таму й мараць яны яе скалечыць. Дарэчы, распачаліся Куцеінскія чытаньні набажэнствам у гэтай царкве. Цікава, што яго зусім нечакана для прысутных завяршыў адзін зь вернікаў, засьпяваўшы «Магутны Божа».
▶
Юшкі не пакаштуюць
112 кіляграмаў рыбы было канфіскавана супрацоўнікамі Аршанскай інспэкцыі па ахове расьліннага і жывёльнага сьвету ў двух браканьераў з Барысава. Тыя ноччу амаль пяць гадзін лавілі рыбу з дапамогай электрычнай вуды. Злачынцаў узялі пад варту. Ім пагражае пакараньне ад буйнага штрафу да чатырох гадоў пазбаўленьня волі. Пра браканьераў паведамілі рыбаловы, якія заўважылі, што па Дняпры плывуць здохлыя малькі — яны гінуць масава, а дарослыя рыбы, калі трапляюць пад электраразрад, трацяць здольнасьць да размнажэньня. За электравуду браканьер цяпер прыцягваецца да крымінальнай адказнасьці Раней жа каралі толькі штрафам.
Яўген Жарнасек, Ворша
∎
Лукашэнку Дажынкі, случчакам клопат
Тры месяцы случчакі ў добраахвотна-прымусовым парадку штомесяц пералічвалі ў фонд сьвята, у залежнасьці ад акладу, ад 12 да 20 тыс. руб. Спачатку народ цешыўся, што сьвята пройдзе, а ўпарадкаваны горад застанецца. Аднак колькасьць і арганізацыя спраў, бясконцыя суботнікі і адлічэньні пакрысе сталі выклікаць раздражненьне. Перанос «Дажынак» прынёс яшчэ адзін суботнік зь нядзельнікам у дадатак. Ва ўсіх ёсьць, урэшце, і асабістыя справы, і свая гаспадарка. Таму настрой аднолькавы — хутчэй бы перажыць сьвята і зажыць спакойным жыцьцём.
Для каго «Дажынкі» радасьць — гэта злодзеі. Зьнікае шмат чаго: інструмэнт, будматэрыялы, неяк ноччу зьнік КамАЗ з прычапным кранам.
▶
Слуцкія кукурузьнікі
Гарадзкое насельніцтва масава далучаюць да ўборкі кукурузы. На гэтую справу пасылаюць і школьнікаў з настаўнікамі, і людзей з усіх прадпрыемстваў. Людзі жартуюць, што хутка будуць заробак атрымліваць на заводах, а працаваць у калгасах.
Сяржук Кут, Слуцак
∎
Бывайце, трусовыя шапкі
Канцэрн «Беллегпрам» вырашыў ліквідаваць бабруйскую футравую фабрыку. Сёньня на прадпрыемстве, з улікам базы адпачынку і інтэрнату, працуе 150 чалавек, пераважна жанчыны. Усе яны да 7 лістапада павінны атрымаць поўны разьлік. На сёньня ў Бабруйску 822 працоўныя вакансіі, для жанчын толькі 137.
Надзея Лісоўская, Бабруйск
∎
Дзяржзамова зьела ўсё чыста
Работнікаў сельгасвытворчага прадпрыемства «Імя Дзімітрава» ашукалі. Зьмянілася кіраўніцтва гаспадаркі, і шараговым работнікам было адмоўлена ў выдачы належнага ім паводле калектыўнага дагавору збожжа за сабраны ўраджай. Адмова матывуецца тым, што ў СВК няма збожжа: усё здадзена на дзяржзамову. Проста як пры харчразьвёрстцы…
Зінаіда Мілешчанка, Круглае
∎
Цяпер чытаюць
«Пра які саюз можна гаварыць?» Лукашэнка ў Астане раскрытыкаваў Расію за навязванне утыльзбораў4
Каментары