У Італіі рамантуюць унікальную мазаіку, якая пацярпела ад дзіўнага турыстычнага рытуалу
У міланскай Галерэі Віктара Эмануіла II пачалі рэстаўрацыю па аднаўленні знакамітай мазаікі з выявай турынскага быка, якую пашкодзілі турысты, што імкнуліся прыцягнуць «удачу», піша Бі-бі-сі.
Згодна з прыкметай, каб прыцягнуць удачу, наведвальнік павінен з заплюшчанымі вачыма тройчы павярнуцца на пятах, стаўшы на «месца сілы» — на выяву геніталій быка.
Турысты, якія імкнуцца прыцягнуць удачу, ужо вытапталі цэлую яму на «шчаслівым месцы», цалкам сцёршы мазаіку.
«Тысячы людзей штодня выконваюць знакаміты рытуал, круцячыся на пятах», — патлумачылі прадстаўнікі гарадскіх улад.
Там адзначылі, што ружовыя пліткі, якія адлюстроўваюць геніталіі быка, цалкам сціраюцца.
На падлозе цэнтральнай васьмікутнай залы галерэі, узведзенай у другой палове XIX стагоддзя, размешчаныя мазаікі з выявамі гербаў чатырох галоўных гарадоў Каралеўства Італія: Рыма (ваўчыца), Мілана (чырвоны крыж), Фларэнцыі (лілея) і Турына (бык).
Цяпер гандлёвая галерэя Віктара Эмануіла II з'яўляецца адной з турыстычных славутасцяў Мілана. Яна адкрытая для наведвальнікаў кругласутачна. Тут размешчаныя крамы многіх модных брэндаў і рэстараны, а таксама праводзяцца выставы і канцэрты.
Рэстаўрацыя мазаікі з выявай герба Турына пачалася на гэтым тыдні: выяву быка агарадзілі. Рэстаўратары працуюць над тым, каб вярнуць твору мастацтва яго ранейшую веліч, гаворыцца ў заяве гарадской рады Мілана.
На фатаграфіі бачна, як майстар Джанлука Галі стаіць на каленях перад мазаікай, уручную выразаючы новыя каменныя фрагменты.
Вакол яго збіраюцца назіральнікі, пазбаўленыя пакуль магчымасці выканаць рытуал «на ўдачу».
Рытуал прыцягнення «ўдачы» з дапамогай мазаікі стаў папулярным сярод жыхароў Мілана яшчэ ў XIX стагоддзі.
«Гэта, верагодна, кранальная традыцыя, але даволі шкодная для твора мастацтва», — кажа Джанлука Галі.
Плітка зношваецца адносна хутка: апошнюю рэстаўрацыю мазаікі з быком праводзілі ў 2017 годзе, расказалі члены гарадской рады Эмануэле Контэ і Марка Гранэлі.
«Галерэя — гэта жывая спадчына, якая можа разбурацца менавіта таму, што яе любяць і актыўна выкарыстоўваюць: мы клапоцімся пра яе, каб яна заставалася такой, якой была створана», — дадалі яны.
Маршрут выхаднога дня на захад ад Мінска: дух барока, унікальныя мазаікі і скрыжаванне рэлігій
Прыпынак з мазаікай у Рэчыцкім раёне ўратаваць не ўдалося — яго рыхтуюць да зносу
У Егіпце знайшлі антычнае судна, якое раней бачылі толькі на мазаіках
Беларускі архітэктар пабываў у Стакгольме і застаўся ў поўным захапленні — не ад багацця, а ад прадуманасці і разнастайнасці
Цяпер чытаюць
«Сіл няма, рэсурсаў няма, усе стаміліся». Лукашэнка заявіў, што вайна ва Украіне ў найбліжэйшыя месяцы будзе скончаная14
Каментары