Сусветна вядомы французскі акцёр Жэрар Дэпард'ё адказаў прэм’ер-міністру Францыі Жану Марку Эро, які назваў яго «ўбогім» за тое, што акцёр пераехаў жыць у Бельгію. Дэпард'ё прыняў рашэнне эміграваць з Францыі ў Бельгію, каб не плаціць высокага падатку. Урад сацыялістаў узняў стаўку падаткаў для самых багатых да 75%.
Праўда, Эро пазней заявіў, што не называў «убогім» Дэпард'ё наймя, аднак лічыць убогімі падатковыя ўцёкі акцёра ў Бельгію і заклікае заможных французаў праявіць патрыятызм і грамадзянскую салідарнасць у перыяд эканамічнага і фінансавага крызісу. Дэпард'ё заўжды падтрымліваў правых і Сарказі, а не сацыялістаў.
Працытуем ліст Дэпард'ё цалкам.
«Я нарадзіўся ў 1948 годзе і ў 14 гадоў пачаў працаваць у друкарні, потым рознарабочым, затым як драматычны акцёр. Я заўсёды плаціў падаткі, не залежна ад урада, які быў ва ўладзе.Я ніколі не пазбягаў маіх абавязкаў. Фільмы, у якіх я здымаўся, сведчаць пра маю любоў да Францыі і да яе гісторыі.
Гэтую краіну пакінулі людзі больш вядомыя, чым я. І мне, на жаль, больш няма чаго тут рабіць.Але я буду працягваць любіць Францыю і публіку, з якой я дзяліў столькі эмоцый.
Я еду, бо вы лічыце, што поспех, талент, творы, любая спроба быць не такім, як усе, павінны быць санкцыянаваныя.
Я не прашу, каб мяне ўхвалялі, але хаця б паважалі. Нікога, з тых, хто пакінуў Францыю, не абражалі так, як мяне.Я не абавязаны тлумачыць прычыны майго выбару, іх занадта шмат, і яны занадта асабістыя.
Я еду, выплаціўшы вам 85% падаткаў з заробленых мною грошай.
Я аддаю вам мой пашпарт і маю сацыяльную страхоўку, якой я ніколі не карыстаўся. У нас з вамі няма агульнай радзімы, я праўдзівы еўрапеец, грамадзянін свету, як навучыў мяне мой бацька.
Я знаходжу «нікчэмным» судзілішча над маім сынам, якога хлапчуком прысудзілі да трох гадоў турэмнага зняволення за 2 грамы гераіну, тады як іншыя за больш цяжкія злачынствы разгульваюць на свабодзе.
Я не кідаю камень у тых, хто мае высокі халестэрын, ціск ці дыябет, ужывае алкаголь і засынае за рулём сваіх матацыклаў. Я ж адзін з іх, як любяць пляткарыць СМІ. Але я ніколі нікога не забіў, і не думаю, што заслугоўваю быць прыніжаным.
За 45 гадоў я выплаціў 145 млн падаткаў, даў працу людзям у кампаніях, якія былі створаны для іх і кіруюцца імі.
Я не хвалюся і не скарджуся, але я адмаўляюся прыняць слова «мізэрны»!
Хто Вы такі, каб мяне судзіць, я Вас пытаюся, месье Эро, прэм’ер-міністр месье Алянда, я Вас пытаюся! Хто Вы такі?
Нягледзячы на ўсе мае эксцэсы, мой апетыт і любоў да жыцця, я перш за ўсё вольны чалавек, Месье, і застануся з Вамі ветлівым».
У разгар прэзідэнцкай перадвыбарчай кампаніі ў Францыі лідар сацыялістаў Франсуа Алянд прапанаваў у мэтах пераадолення дэфіцыту бюджэту павысіць з 2013 года да 75% стаўку падаходнага падатку для грамадзян, якія зарабляюць больш за мільён еўра ў год. У сувязі з гэтым некаторыя заможныя людзі, у ліку якіх апынуўся Дэпард'ё, вырашылі пакінуць Францыю.
Эро ж паставіў у прыклад багатых французаў, якія плацяць вялізныя падаткі, аднак не з’язджаюць з краіны, бо адчуваюць сябе адказнымі за яе лёс. Паводле яго слоў, з краіны бягуць нямногія.
Цяпер чытаюць
Дзяцей-футбалістаў з Рэчыцы павезлі ў Геленджык па прыфрантавой вобласці Расіі. У аўтобус трапіў беспілотнік52
Каментары